Ábdirahman Asylbekovten aıyrylǵanymyzǵa kóp bolǵan joq, búgin taǵy qaıǵyly habar estip otyrmyz. Qazaq halqy taǵy bir aıaýly azamatynan aıyryldy. 1961 jyly SHQO, Abaı aýdanyndaǵy Saryjal aýylynda dúnıege kelgen talantty jazýshy kelmestiń kemesine minip kete bardy. 1992 jyly Semeıdi pedagogıkalyq ınstıtýtyn támamdaǵan jazýshynyń alǵashqy shyǵarmalary 1980 jyldardan bastap respýblıkalyq baspasóz betterine kórine bastaǵan. Talǵat Keńesbaev 1988 jylǵy respýblıkalyq «Jiger» festıvaliniń laýreaty. 1990 jyly marqumnyń alǵashqy kitaby «Fransýz átiriniń ıisi» jaryq kórgen bolatyn.  Qamshy.kz aqparat agenttigi marqumnyń otbasyna, jaqyndaryna, talanttysyn ardaqtaǵan barsha qazaq jurtyna qaıǵyra kóńil aıtady. Talǵat Keńesbaev týraly áleýmettik jelide jarıalanyp jatqan estelik áńgimelerdi oqyrman nazaryna usynýdy jón dep sanady.

Dáýren Qýat:

 "Seniń áńgimelerińdi beker oqydym, endi ózim jaza almaı júrmin", - dep bóstire maqtap qoıatyny bar edi. Keıingi bir kitabynyń jaryq kórýine septigim tıse kerek, sony aıtyp jáne qoımaıtyn. Qyrǵyz qalamgeri Aıdarbek aǵamen shyǵarmashylyq baılanystaryna da dáneker bolǵanym bar. Álgi bir túkke turmaıtyn qyzmetimdi ósirip: "Knáz meni Alatoonyń bıigine alyp shyqty", - dep otyratyn. Áńgimemiz de jarasyp, ázilimiz de jarasyp júrýshi edik. Kúnine bir ret, keıde eki úsh ret zvondap qoıatyn. Sol zvonoktaryn áredik artyq kórip, keıı jaýap bergen kezderim de bolypty-aý... Endi, mine, ýdaı ókinishtiń ýyty tamaǵyma tyǵylyp tur. Qaıran Tákeń!.. Ol - ózine de rıasyz kóńilmen talaı aıttym, talantty jazýshy edi. Qalamynan shyqqan ár týyndysynyń magıasy bolatyn. Senbesińe sendiretin jazýshy edi. Jazýǵa sonshalyqty adal boldy, jazyp ótti. Talǵat Keńesbaev! Osy esim soıdyń ózi basqaǵa emes, qas talantqa, qalamgerge ǵana bitken esim soı ekenin biletinbiz. Baqul bol, baǵalym, baǵylanym!".