Toqsan jyldyqtyń álegi. Almaty oblysy İle aýdanynyń mereıtoıyna daıyndyq kezinde 10-synyp oqýshysy qaza tapty. Alty júz bala qatysqan fleshmobtyń sońy qyrǵyn tóbelespen aıaqtalyp, kámelet jasqa tolmaǵan jasóspirim pyshaqtalǵan. Qarý týra júrek tusyna tıgen Qydyráli Beısenbaı sol jerde qansyrap jarty saǵat jatyp qalǵan deıdi týǵandary. Onyń ústine is-sharada qaýipsizdikti qamtamasyz etetin ne polıseı, ne jedel járdem qyzmeti bolmapty. Jalǵyz ulynan aıyrylǵan otbasy týraly Eýrazıa birinshi arnasy habarlaıdy.

“Qarasam qyzdarmen oınap, bılep te tur eken. «Baıqamadyń ba qyzyl kýrtkada tur» dedim. «Iá, ıá»,-dedi”.

Jalǵyz ulyn alystan baqylap, bılegenine máz bolǵan áke «qapıada aıyrylyp qalamyn dep oılamadym», -deıdi. «Eger aýdannyń mereıtoıy bolmaǵanda, ulymnyń talaı mereıin kórer edim» dep egildi. Óıtkeni İle aýdanynyń 90 jyldyǵynda shendiler alyp stadıonda 600 oqýshyny jappaı bıletpek bolypty. Úshinshi daıyndyǵyn kórýge tipti ákesi qyzymen barǵanyn aıtady. Biraq, dostarymmen qalamyn degen balasynyń kóńilin qımapty. Ózegin órtegeni de sol.  

“Aman ba dep edim, ólip qaldy dedi. Ólip qaldy degeni nesi ıt ólgendeı aıtty. Bir teptim. Nesin jasyraıyn. Qaıda jatyr dep edim. Skoryıda dedi. Balam jatyr eken. Betin jaýyp tastapty. Júreginiń tusynda trápka tur eken”,- deıdi marqumnyń ákesi Baqyt Sadyqov. 

Sóıtse, 10-synyp oqýshysy "massovkada" tóbelesken eki jigitti arashalamaq bolypty. Onyń biri kolej stýdenti eken. Pyshaqty suǵa salyp qasha jónelgen. Kámelet jasqa tolmaǵan balanyń qaltasynda ne úshin sýyq qarý júrgeni belgisiz. Týǵandary mereıtoıdy toılamaq bolǵan shendiler oqýshylardy jınaǵanymen qaýipsizdikti oılamaǵanyna kúıinedi. Sebebi daıyndyqta birde bir polıseı ne jedel járdemdi kórmepti. «Áıtpese, jarty saǵat qansyraǵan uldaryna dáriger kómekteser edi»,- deıdi. 

“Men óz kózimmen kórdim. Negizi bolý kerek. Bálenbaı aýyldan keledi. Avtobýs keledi. Senip ata-anasy jiberedi. Men Qydyrymdy senip jiberdim ǵoı” – deıdi marqumnyń ákesi Baqyt Sadyqov. 

Ómiri qyrshynnan qıylǵan oqýshy dál osy mekteptiń úzdigi, sportshysy bolǵan. Synyptastary túgili oqytýshylaryna deıin eseńgirep júr. Biraq ólimge İle aýdanynyń 90 jyldyq mereıtoıyna daıyndyǵynyń esh qatysy joq deıdi. Sebebi fleshmobqa qatysqan oqýshylar qoǵamdyq jumysqa aralasyp úırenedi eken. Tipti ol fleshmob oqýshylardyń sabaǵyna kedergi de emes, ýaqytyn da almaıdy dep tań qaldyrdy.

Eki myńǵa jýyq bala oqıtyn mektepten mereıtoıda elý oqýshy bıleıdi eken. Ár senbide ustazdary bas-kóz bolyp stadıonǵa jetekteıtinderin aıtady. Ákimdikten kelgen buıryqty buljytpaı oryndaýǵa mindettimiz deıdi. Biraq Qydyráliniń qaıdan barǵany belgisiz dep aqtalýda. 

“9-synyptyń elý oqýshysyn apardyq. Onyń janynda ózimiz dene shynyqtyrý muǵalimderine kezekshilik qoıdyq. 5-15 ketkende daıyndyq bitti. Biraq balanyń ólimi sonymen sáıkes bolyp tur”,- deıdi №13 jalpy bilim beretin mektep dırektorynyń oqý isi jónindegi orynbasary Aıgúl Jábel.

Al, shendiler aýdannyń toqsan jyldyǵyn dúrkiretip ótkizý úshin fleshmob uıymdastyrǵandaryn jasyrmaıdy. Tipti, toǵyz eldimekendegi eń uzyn, symbatty degen 640 ul men qyzdy jumyldyrýdamyz deıdi. Jyl basynan beri daıyndalǵan merekege búdjetten segiz mıllıon teńge bólingen. Erikti demeýshilerdi qospaǵanda bul. Alaıda, oqytýshy men oqýshylardyń eńbegi tegin.    

“Aýdannyń 90-jyldyǵy bir-aq ret bolaıyn dep jatqan nárse. İs-sharanyń bárin oqýshylardy qamtamasyz etemiz. Aýdannyń turǵyndarymen qamtymasaq, bizdiń aýdanda ne bolyp jatqanyn kim biledi” – deıdi İle aýdany ákiminiń orynbasary Almasbek Sátibaev. 

Sheneýnik te bul qaıǵyny kezdeısoq dep otyr. Toıǵa qatysy joq, toı toılanady báribir dedi. Al, qabyrǵasy qaıysqan otbasy uldaryn kelmeske attandyrǵan stýdentti keshirmeıtinderin aıtady. Qazir ol ýaqytsha ustaý  ızolátorynda. Aldyn-ala tergeý jumystary bastalypty.