Bilim kúninde qazaqstandyq oqýshylardyń qýanyshynda shek bolmady. Sebebi aımaq boıynsha birneshe mektep qatar-qatar ashylyp, tusaýkeser rásimi ótip jatyr. Búgin Jambyl óńirinde 9 mektepte alǵashqy qońyraý soǵylyp, buǵan deıin úsh aýysymda jumys istep kelgen 3 mektep pen 3 apatty jaǵdaıdaǵy mekteptiń máseleleri tolyq sheshildi.

Oblys ortalyǵynda jańadan salynǵan «Baıterek» yqshamaýdany turǵyndary mekteptiń ashylýyn taǵatsyzdana kútken edi. Aıta keterligi atalmysh aımaqtyń oqýshylary qaladaǵy basqa mektepterge baryp oqyǵan. Endi jańa oqý jyly qýanyshty jańalyqpen bastalyp, 1200 oqýshyǵa arnalǵan mektep-lıseıi ashyldy. Aıta ketý kerek, bas merdigeri «Taraz qurylys Invest» jaýapkershiligi shekteýli seriktestigi bolǵan atalmysh mektep «Nurly jol» memlekettik aǵdarlamasymen salynǵan. Jalpy aýdany 1920 sharshy metrdi quraıdy.

Taǵy bir mektep «Shóldala» ıininde №59 orta mektebi ashyldy. «Nurly jol» baǵdarlamasy arqyly boı kótergen bul mektep 900 oqýshyǵa arnalǵan.

Oblys ortalyǵynan alys ornalasqan Qordaý aýdanynda da 2 mekteptiń tusaýkeseri ótti. Soǵandy aýyly men Kóktóbe aýylyndaǵy mekteptiń syıymdylyǵy 50 oryndy qurap otyr. Bul mektepter oblystyq búdjettiń tarapynan qarjylandyrylǵan.

Merki aýdany Teskentoǵan aýylynyń oqýshylary da Bilim kúni merekesin jańa mektepke qarsy aldy. Jańadan ashylǵan mektep 150 oqýshyǵa arnalyp salynǵan.

Taldyqorǵanda qos birdeı mekteptiń ashylý saltanaty Bilim kúni merekesimen tuspa tus keldi. Atalmysh sharaǵa oblys ákimi Amandyq Battalov ta qatysyp, sóz sóıledi.

«Búgin óńirimizde 45 myńǵa jýyq bala mektep tabaldyryǵyn alǵash ret attap otyr. Keı aýdandardyń ózinde 45 myńǵa jýyq halyq turady. Osyǵan qarap, biz búgin mektepke tutas bir aýdan turǵyndary keldi dep aıtýǵa da bolady. Bul óte qýanyshty jaǵdaı. Elimizdegi beıbitshilik pen turaqtylyqtyń arqasynda ultymyz órkendep, urpaq sanynyń artyp kele jatqandyǵynyń kórinisi – bul. Biz óz tarapymyzdan oblystaǵy balalardyń jaqsy, sapaly túrde bilim alýyna jaǵdaı jasaýǵa tıispiz. Mine, jańa oqý jylynda 7 mektep paıdalanýǵa berilip otyr. Sonymen birge 22 oqý ǵımaratyn kúrdeli jáne aǵymdaǵy jóndeýden ótkizýge 6,8 mlrd teńgeden astam qarajat jumsaldy. Al Jetisýda mektep salýǵ isi jalǵasa beredi. Taǵy bir aıta keterligi jyldyń sońynda 2 mekteptiń qurylysy aıaqtalyp, qoldanysqa beriletin bolady», dedi Amandyq Batalov.