Poezıa adam rýhynyń bostandyqqa umtylýy. Óleń ózin ólimge baılap, aqynǵa oı erkindigin syılaıdy. Iosıf Brodskıı O.E.Mandelshtam jóninde jazǵan maqalasynda osyndaı oıdy meńzegen. (Ardaq Nurǵazyuly. «Qazaqtyń modernısik poezıasy») osyndaı oı jelisi negizinde sizderge shetel aqyndarynan

partaly bir top óleń usynyp otyr.

Frıdrıh Shıller nemistiń ulttyq mádenıetine úlken úles qosqan. Dúnıe júzi ádebıetiniń klasıkteri qatarynan kórnekti oryn alatyn aqyn, dramatýrg Frıdrıh Shıllerdiń shyǵarmalaryn álem halqy eń tańdaýly mádenıet murasynyń qoryna qosyp baǵalaıdy.  

Shashyrap shyqqan kúnniń perzentteri, Ásem gúl qyzyl ala órnekteri, Mahabbat, sulýlyqtyń belgisi dep, Sizderdi kóp boldy álem terbetkeli. Saqına órnegi bop floranyń, Kórkindeı kelesińder bul aranyń. Biraqta oılanyńdar, tolǵanyńdar, Jaınaǵan jas sulýlary gúl alańnyń. Jylańdar: ómirdiń syrt sulýlyǵy, Quıa almas jandaryńa sirá bárin. Bulbuldan, torǵaıdan soń óristep ún, Shyǵady sizder jaıly sherli ishten muń. Japyraqtaryńyzda terbetilip, Uıyqtaıdy qalǵyp qyzy perishteniń. Sizderdiń tájderińiz elden erek, Dıana qyzyn sıqyr kúıge bólep. Jiberdi aınaldyryp kóbelektiń Jasaýly kilemine bir keremet. Jylańyz, jas tógińiz, kún balasy, Belgili kóńilińniń muń – nalasy. Sizderden alys ketip aýlaq jaqqa, Alshaqtap mahabbattyń tur arasy. Biraq ta aırylysý, qaıǵy – muńdy, Qarsy alam jımaı eshbir aıylymdy. Qadyrly dosym, Nannı! Bul saýsaqtar Syı toqyr ózińe arnap qaıyrymdy. Jyrymdy, júregimdi, ómirimdi, Syr toly, názik kúıli kóńilimdi, Men sizge tapsyramyn amanat qyp, Ósıet, eń aqyrǵy senimimdi. Tabasyń bul sózimnen ne kerekti, Osy bir alaqandaı ele betti. Eń kúshti táńirden ushyratpas Kóresiń qupıa bir keremetti.  

Ashyl, saıdyń tumany! Tara, túnek munary. Qusharmyn qaıdan armandy, Qanarma jannyń qumary? Jalyndap gúlmen laýlaıtyn, Qyzyl tóbe kóremin. Qanatym qaıda samǵaıtyn, Basynda sol bir tóbeniń? Kóńiliń qalar jeńildep, Únimen syrly shekterdiń. Soǵady qońyr jel úrlep, Lebi bop nurly kóktemniń. Sol jerde jemis jarqyldap, Aǵashty turar altyndap. Dóńeste, jazyq kógalda, Soqpaıdy boran ańqyldap. O, sulýlyq, mas qyldyń! Keremet kóktem sol jerde Jutqandaı ısin jas gúldiń, Týlaıdy júrek keýdeńde. Ushamyn sonda... qıal qur! Ótetin jolym joq meniń. Aldymda asý qıa tur, Arqyratyp kók selin. Qaıyq tur... bastar qaıda adam, Jóneldiń... synda bilek bul. Jelkeni qanat baılaǵan, Eskegi naıza bir ótkir. Sen júrekke táýekel, Qudaıǵa senbe ne kerek. Keremet bolsa táý eter, Jol basshyń sol bir keremet.  

Sońyna erip úmittiń, Kettim balǵyn shaǵymda; Úıimdi de umittim, Jan qalǵan joq jadymda. Tym jupyny kıimim, Jas baladaı kóńilim. Aıdady alys ıirim, Úmitim tek serigim. Kórinbedi jol alys, Dedi maǵan bir daýys: «Tart shyǵysty betke alyp! Turar seniń jolyńda, Jer jumaǵy ne kerek, Qasıetti orynǵa Tap bolasyń keremet». Tań keshimen jalǵandy, Kesh aýysty tańmenen. İzdep sol bir armandy Ketti menen ál – dármen. Shyńyraýlar sustıyp, Shyń jotaly taý turdy. Saldym kópir kúsh jıyp, Ór tasqyndar arqyly. Kórdim kenet shyǵysqa, Tartqan ózen kók ala. Terbetilip aǵysqa, Tur bir qaıyq jaǵada. Úmitpenen, qaýippen, Keshtim ózen tereńin. Baqytymdy taýyp men Alatyndaı kóremin! Muhıttan bir belgisiz, Shyqty meniń qaıyǵym. Aldym tuman kórgisiz, Kútem kimnen qaıyrym? Aspan men jer máńgilik, Qaýyshpaıtyn sekildi. Ketti baqyt dal qylyp, Kúıge salyp ne túrly. Óleńderdi aýdarǵan: S. Máýlenov

Persı Bıshı Shellı aǵylshynnyń uly aqyny. 1972 jyly 4 tamyzda aýqatty otbasynda dúnıege kelgen. Otyz jasynda opat bolǵan aqynnyń kózqarasynda, onyń jyrlarynda Baıron lebi esedi. Ol da halyqtyń sarqylmas kúshine, onyń sáýletti bolashaǵyna sheksiz sengen aqyn. Uly aqyn shyǵarmashylyǵynyń ón boıynda adamnyń sulýlyǵy, jeńilmes rýhy, erteńgi nurly bolashaǵy, sol joldaǵy bitispes kúresi pash etilgen.  

  Túsime endiń sen jańa, Oıana kettim oıǵa ala. Hosh ısti aınala, Juldyzdar júzgen jaı ǵana. Túsime enip uıyttyń, Ańǵara almaı qaldy jan. Ashyldy kep, súıiktim, Terezeń tap aldymnan. Jeldeı álsiz sharlaǵan, Saıaly alqap yǵynda. Gúldeı sezim qalmaǵan, Qulaǵyn túrmeı bulbulǵa. Beıne tústeı ómirsiz, Aldynda ótkir kózińniń. Ólip baram kóńilsiz, Keń keýdeńde ózińniń. Turǵyz meni, ber kómek, Sezimim joq, halym joq. Oıan – daǵy jedel det, Sebele nur jaýyn bop. Salqyn maǵan bul mańda, Soqqan júrek qabynyp. Óz keýdeńe qularda, Keter júrek jarylyp. Aýdarǵan: S. Máýlenov  

  1 Janarym jastan buldyrap, Tursa da, qaldym syr bermeı. Kózimdi burdym tunjyrap, Oıyńdy seniń bilgendeı. Yntyzar oty kózińnen, Jaryq etpeı qalaı bezinem. 2 Mańdaıdyń sory bes eli, Jegideı jeımin ózimdi. Ýaıymnyń jeńip keseli, Júregim muńnan ezildi. Úmitsiz halym – jasqaǵan, Jasyram ony basqadan. 3 Eshkimde kóńil bólgen joq, Ózińmen óziń ediń sen. Jyldar da ótti kerýen bop, Mahabbatym bop keldiń sen. Peılińmen bir sát emdediń, Sonan soń azap – kórgenim. 4 Tirilttiń meni qaıtadan, Meıirimiń tógip ún berdiń. Bazary múlde tarqaǵan, Jaınady solǵan gúlderim. Ernińe ernim tamsandy, Kózińnen ishtim káýsardy. Baqytty sirá bolmaspyz, Baılaýly qolym, jolym da. Bir ǵumyr keshe almaspyz, Ońym da dushpan, solym da. Nar sózdi qaıdan tabaıyn, Buǵaýdyń buzar talaıyn! 5 Úrkeksiń, názik, ásemsiń, Tirlik joq sensiz, ǵashyqpyn. Men úshin shyryn, áselsiń, Sertińe seniń asyqpyn. Janasyń óziń ot bolyp, Qaraısyń be ekensiń jek kórip?! Aýdarǵan: J. Qydyrov  

  Koról – topas, bostandyqtyń qas jaýy, Aljyǵan qyrt tájdi kıgen basyna. Shahzada da sol tuqymnan – las jany, İrip – shirip bitken jetpeı jasyna. El – jurtyńdy bıleıtuǵyn – súlikter, Kúndiz – túni bal qanyńdy sorady. Kóz ashqannan ashtyqqa bop kiriptar, Bar – joǵyńdy toq júrgender tonady. Ásker degen – kisi óltirgish has nadan, Altynǵa qul bolyp zańyń jaralǵan. Shirkeýlerde sıynady aqshaǵa, Parlamentte baıaǵyda – aq joq adam, Bári osynyń – Angllıa der edim, Alys bolmas azattyqta keler kún. Aýdarǵan: J. Qydyrov  

  Aıtshy maǵan, jaryq juldyz, syryńdy, Aıtshy maǵan, qaıda tarttyń, shynyńdy. Qara aspanda kirpik qaqpaı janasyń, Uıqy qaıda, qaı kez shyrym alasyń? Aıtshy maǵan, bozarǵan Aı, teginde, Neǵyp jursyń elsiz aspan shólinde. Tynym alar bir sátti izdep, máńgilik, Júrgeniń be jadap – júdep qańǵyryp? Jıhankezdeı sen – taǵatsyz jel ediń, Kók tútindeı bir burq etip jónediń. Jónińdi aıtshy, ne qýalap júrsiń sen, Qandaı muń bar kókeıińde, kimsiń sen? Aýdarǵan: J. Qydyrov   Daıyndaǵan: Qýanáli Almasbekuly