Ingýshetıadaǵy jaǵdaı sál saıabyr tapty dep aıtýǵa bolmaıdy. Áli de másele sheshimin tapqan joq. Jaǵdaıdy naqty aıtar bolsaq, osydan birneshe apta buryn, 27 qyrkúıek jáne 4 qazan kúni Sheshenstan men Ingýshetıa prezıdentteri arasynda ákimshilik-terrıtorıalyq kelisimge qol qoıylǵany belgili. Magasta qoıylǵan  kelisim boıynsha ıngýshtarǵa sheshenniń 1000 gektardan astam jeri ǵana berildi. Al sheshenderge ıngýsh halqynyń 34, 1 myń jeri ótti. Sanǵa júginer bolsaq, Ingýshetıa terıtorıasynyń 18,94 paıyzy Groznyıǵa berilgen  bolyp shyǵady. Osyǵan nazalanǵan ıngýshter eki apta boıy el astanasy Magasta narazylyq mıtıńisin ótkizdi. Negizi aqyrǵy sózdi  Ingýshetıanyń Konstıtýsıalyq soty aıtýǵa tıis edi. Biraq máseleni eki kún boıy talqylaǵan sot qara qyldy qaq jaryp, eshteńe aıta almady. Budan shyǵatyn qorytyndy ne? Resmı Magas áli de jaltaqtap, Máskeýge ári Groznyıǵa qarap otyr. Onyń ústine bılik basynda Ingýshetıa prezıdenti Iýnýs-Bek Evkýrovtyń otyrǵany Máskeýge tıimdi. Bul bir. Ekinshiden, qazir kelisimge qol qoıylǵanymen,  jaǵdaı áli sheshilgen joq. Mıtıńte Iýnýs-Bek Evkýrov pen sheshen basshysy Ramzan Qadyrovqa qarsy qatty sózder aıtyldy. Buǵan Evkýrov tózimdilikpen qaraǵanymen, eshkim betine kelip kórmegen Qadyrovqa bul sózder asa aýyr tıdi.

–Eger myqty bolsańdar, bizdiń eldiń aýmaǵyna kelip, mıtıń ótkizińder. Birińdi de tiri qaldyrmaımyn, –dedi sheshen basshysy.

♦Ingýshetıa men Sheshenstan arasynda soǵys bastalýy múmkin be?

Onyń bul sózine ıngýshtyń belsendi úsh aqsaqaly da qatqyl jaýap bergen. Biraq ıngýsh ultynyń namysyna  tıetin sóz aıtqanyn artynan túsinse kerek, Ramzan Qadyrov ıngýsh aqsaqaldaryna kelip,  qolyn alyp, keshirim surap ketti. Atap aıtsaq, 80-ge kelgen aqsaqal, óte saýatty Mýhajır Nalgıev pen 76-dan asqan quqyqqorǵaýshy Ahmed Barahoev  jáne eldiń burynǵy İshki ister mınıstrliginiń basshysy Ahmed Pogorovpen áńgimede eki tarap qol alysqan. Qadyrov ortaq áńgimege kelgen, sharıǵat jolymen tatýlasqan. Naqty emes keıbir derekterge qaraǵanda, «bul kezdesýge el prezıdenti Iýnýs-Bek Evkýrov ta keldi» degen áńgime bar. Alaıda qanshalyqty qol alysyp, bir-birine dúrdarazdyqty eki jaq keshirgenimen, jer máselesine qatysty daý áli tolyq sheshilgen joq. Soǵan qaraǵanda, bul uzaqqa sozylatyn túri bar jáne ony sheshýdiń de joly tabylmaı tur. Eger ıngýshtyń Konstıtýsıalyq soty bul kelisimdi zańsyz dep tapsa, onda  bul Ramzan Qadyrovqa aýyr soqqy jáne jáne Iýnýs-Bek Evkýrovtyń  eńsesi túsip, el aldyndaǵy bedelinen aırylady. Jer daýyn referendýmda talqylasa, onda búkil ıngýshter onyń qaıtarylýyn qoldap, daýys beredi. Bul jaıtty Prezıdent Pýtınniń  Soltústik Kavkaz federaldyq aımaǵy boıynsha resmı ókili de sheshe almaı otyr. Sondyqtan Ramzan Qadyrovtyń túıindi jaıttardy tarqatý úshin úsh ret kishireıip kelip, ıngýsh aqsaqaldarynan keshirim surap ketýiniń astarynda osyndaı syr jatyr.

Aqıqatyna kelsek, Ramzan Qadyrov Kavkaz óńirinde búkil lańkesterdi qurtqan Pýtınniń oıyndaǵysyn oryndaǵan jaǵymdy obrazdaǵy adam. Biraq Qadyrovtyń ıngýsh jerine bir aıda úsh ret kelýi jergilikti halyqtyń narazylyǵyn týdyrýda. Birinshisinde - 70, odan keıin - 60, úshinshi  ıngýsh aqsaqalyna osydan eki kún buryn oqqaǵarlaryn qosqanda  40 kólikpen kelip, keshirim suraǵan  Qadyrovtyń qadiri munan artty ma?

♦70 kólikpen kelgen Ramzan Qadyrovty ıngýshtyń muzdaı qarýlanǵan 1000 sarbazy qarsy alǵan

Árıne, ol shıelenisken jaǵdaıdyń aldyn alyp,  kavkazdyq tásilmen tatýlasyp, máseleni tezirek sheshkisi keledi. Bul durys ta shyǵar. Alaıda onyń sózin keshirse de, ıngýshtar Sheshenstanǵa ótip ketken jerin qaıtara ala ma?! Túıin de osy jerde tur...