Kórkem ádebıet synshysy, pýblısıs Amangeldi Keńshilikulynyń 50 jyldyq mereıtoıyna oraı «Qazaqty súıý» atty shyǵarmashylyq keshi ótti. Shyǵarmashylyq kesh «Rýhanı jańǵyrý» baǵdarlamasy aıasynda ótti. Ári aıta keterligi, ony uıymdastyrǵan «Nur Otan» partıasy. Keshtiń qurmetti qonaǵy «Nur Otan» partıasy Tóraǵasynyń Birinshi orynbasary Máýlen Áshimbaev mereıtoı ıesin quttyqtady.
«Amangeldi Keńshilikuly – áke izin jalǵap, qazaq ádebıetinde óziniń ornyn, qoltańbasyn qalyptastyrǵan taptyrmas qalamger. Onyń synı eńbekteri men esseleri oqyrmandardy tereń oıǵa jeteleıtini sózsiz. Bir ókinishtisi, búgingi qazaq ádebıetinde synshylyq janry damýdan keri sheginip barady. Burynǵymen salystyrýǵa kelmeıdi. Muhamedjan Qarataev, Serik Qırabaev sekildi jazýshylarymyz qalyptastyrǵan dástúrdi búginde jalǵastyryp jatqan synshylar kemde-kem. Búgingi mereıtoı sol synshylarymyzdyń izin jalǵastyryp kele jatqan tulǵalardyń biregeıine arnalady» , - dedi Máýlen Áshimbaev quttyqtaý sózinde.
Eske salyp óteıik, Memleket basshysy Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda «Rýhanı jańǵyrý» baǵdarlamasyna erekshe toqtalyp ótken edi. Ári Nazarbaev baǵdarlamanyń halyq arasynda keń qoldaý taýyp, qoǵamnyń jańǵyrýyna septigin tıgizetinin aıtyp ótken. Bastamany ári qaraı jalǵastyrý jetkiliksiz, baǵdarlamanyń aıasyn jańartyp, ózgertip, ózgeshe baǵyttarmen tolyqtyrý – Elbasynyń basty tapsyrmalarynyń biri. Osyǵan oraı elimizdiń ár óńirlerinde aýqymdy jumystar bastalyp ta ketti.
Sondaı sharalardyń biri pýblısıs Amangeldi Keńshilikulynyń 50 jyldyń mereıtoıyna arnalǵan merekelik kesh. Keshti tanymal satırık-jazýshy Kópen Ámirbek júrgizdi.
Aıta keteıik, qalamger jazýshylyqpen qatar, partıanyń da belsendi qyzmetkeri bolǵan. Bul týraly aıtqan Máýlen Áshimbaev Keńshilikulyna zor alǵysyn bildirdi. Elbasynyń tapsyrmalaryn oryndaýda ári eldiń ál-aýqatyn damytýda óziniń úlken úlesin qosqan jazýshynyń eńbegin aıryqsha atap ótti.
Áshimbaevtyń aıtýnysha, Nazarbaevtyń tapsyrmasyna oraı, «Nur Otan» partıasy aqyn-jazýshylarǵa keńinen qoldaý kórsetip keledi. Bul tusta taıaýda ǵana «Nur Otan» partıasy men Jazýshylar odaǵy arasynda memorandýmǵa qol qoıylǵan edi.
♦«Nur Otan» men Jazýshylar odaǵy yntymaqtastyq qujatyna qol qoıdy
«Partıa tórt jobany qolǵa alyp, olardy Jazýshylar odaǵymen birlesip júzege asyratyn bolady. Tórt jobaǵa toqtalyp ótsek, birinshisi aqyn-jazýshylarymyz ben synshylarymyzdy yntalandyrý ári qoldaý maqsatynda ádebı baıqaý ótkizý; qalamgerler óz oılaryn erkin bildire alatyn telebaǵdarlama ashý, «Astana» arnasynda ashylady dep josparlanyp otyr. Tehnologıa jetistikterin tıimdi paıdalana otyryp, YouTube jelisinde arnaıy ádebı kanal ashý. Sońǵysy partıalyq bastamala aıasynda aqyn-jazýshylarmen kezdesýler ótkizý, kezdesý keshterin ótkizetin arnaıy klýbtar qurý», - dep túsindirgen Máýlen Áshimbaev osy sharalardy júzege asyrý barysynda Amangeldi Keńshilikulynyń zor úlesi tıerine senim bildirdi.
Keńshilikulyn mereıtoıymen quttyqtaı otyryp, Alǵys hatpen marapattady.
Shyǵarmashylyq keshke arnaıy kelgen memleket jáne qoǵam qaıratkeri Myrzataı Joldasbekov, búgingi qazaq ádebıetiniń alyptary Tólen Ábdik, Qajyǵalı Muhanbetqalıuly, taǵy da ózge ádebıet maıtalmandary Amangeldi Keńshilikulyna aq jarma tilekterin arnady. Belgili óner juldyzdary ásem ánderimen keshtiń ajaryn asha tústi.
Amangeldi Keńshilikuly 1968 jyly 21 tamyzda Almaty qalasynda týǵan. QazMÝ-diń jýrnalısıka fakúltetin bitirgen. 1992 jyly «Arys» qorynda, 1997 jyly «Sanat» baspasynda, Qazaq teleradıosy korporasıasynda, 1999 jyldan Almaty qalalyq mádenıet jáne qoǵamdyq kelisim basqarmasynda jetekshi maman, Qazaqstan Memlekettik Ortalyq mýzeıiniń aýdarma bóliminiń meńgerýshisi bolyp qyzmet etken. «Juldyz», «Parasat», «Tańsholpan» jýrnaldarynda, «Jas Alash», «Egemen Qazaqstan», «Órken», «Altyn orda», «Qazaq ádebıeti» sıaqty gazetterde ádebıet, saıasat, áleýmettik máseleler týraly maqalalary, esseleri jaryq kórgen. 1999 jylǵy ádebıet pen óner salasyndaǵy QR Prezıdenti stıpendıasynyń ıegeri. 2002 jyly ádebıet salasyndaǵy «Soros – Qazaqstan» qorynyń grantyn jeńip aldy. Halyqaralyq «Alash» ádebı syılyǵynyń laýreaty (2005). Shyǵarmalary: Aq jaýyn. Ádebı syndar. Astana, «Elorda», 2001; Qarlyǵash-dáýren. Ádebı-syn, pýblısısıka, esseler. A., «Qalamger Ten», 2003.
