Qazaqstannyń Halyq ártisi, qazaq estradasynyń jaryq juldyzy Roza Rymbaeva T.Júrgenov atyndaǵy Qazaq ulttyq óner akademıasyna qarasty vıtraj óneri týyndylaryn daıyndaıtyn sheberhanasynda «Sándik jáne qoldanbaly óner» mamandyǵy stýdentterimen kezdesti. Shyǵarmashylyq kezdesý barysynda vıtrajdy laboratorıanyń meńgerýshisi, Qazaq Respýblıkasynyń Tuńǵysh Prezıdenti qory grantynyń ıegeri Janna Tynybekova halyqtyń súıikti ánshisine fúzıng peshinde áınekti peshte pisirý tehnologıasymen júzege asyrylatyn kúrdeli vıtrajdy ónerdiń qyr-syrlarymen keńinen tanystyrdy.
Shynydan jasalatyn óner týyndylary erekshe fızıkalyq jáne dekoratıvtik qasıetterge ıe tabıǵı materıaldan daıyndalady. Alaıda asqan sheberlik pen qajyrly eńbektiń arqasynda dúnıege keletin óner týyndylary kórseń kóz toımastaı erekshe kórkem. Mundaı ǵajaıyptardy shyǵaratyn úlken eki pesh Qazaq Respýblıkasynyń Tuńǵysh Prezıdenti qorynyń qoldaýymen satyp alynǵan.
Sándik qoldanbaly óner mamandyǵynda tálim alyp júrgen 4 kýrs stýdenti Dana Alılaeva «Qazaqstan tarıhyndaǵy kórnekti tulǵanyń portreti» atty shynydan jasalǵan keskindeme kýrsynyń shyǵarmashylyq týyndysynda óziniń súıikti ánshisi, óner qaıratkeri Roza Rymbaevanyń portretin somdady. Bul oqý tapsyrmasyndaǵy eń kúrdeli kezeń. Ondaǵy maqsaty týyndyǵa ulttyq kolorıtke basym sıpat bere otyryp, portrettik uqsastyqty sheber oryndaýǵa qol jetkizý bolatyn. Jumysty daıyndaýdyń alǵashqy kezeńi móldir áınekte portret salý, sodan soń ártúrli túspen óńdeýden turady. Ekinshi kezeńde kórkemdik ereksheligine qaraı qajetti tústerge enbeıinshe qaıta-qaıta 800 gradýs ystyq peshke salyp otyrady.
Stýdentterdiń shyǵarmashylyq jumystaryna tánti bolǵan ánshi: «Elbasynyń "Mádenıet – ulttyń bet-beınesi, rýhanı bolmysy, aqyl-oıy, parasaty. Órkenıetti ult, eń aldymen, tarıhymen, mádenıetimen, ultyn ulyqtaǵan uly tulǵalarymen, álemdik mádenıettiń altyn qoryna qosqan úlkendi-kishili úlesimen maqtanady" dep aıtqan qanatty sózderin árqashan jadyda ustańdar. Iá, qazaq eliniń ardaqty uldary aqyn Abaı, han Abylaı, sýretshi Ábilhan Qasteev syndy dara tulǵalarynyń jalǵasy – búginginiń qazaq ónerin qasterleıtin jastar! Ózderińdeı daryndy jastary elimizdiń rýhanı jańǵyrýyna úles qosatynyna senimdimin», - dep jyly lebizin bildirdi Roza Qýanyshqyzy.
Kezdesýdiń sońynda keskindemeshi stýdentter ánshi Roza Rymbaevaǵa sheberliktiń ǵajaıyp úlgisimen názik ári túsi qanyq shynyǵa beınelegen portretin syıǵa tartý etti.
