Qazaqstan men Malaızıanyń 150-den asa bıznes ókili men resmı tulǵasy Almatydaǵy Forýmǵa qatysýda. Bıznes-forýmnyń uıymdastyrýshysy – «Qazaqstan-Malaızıa İskerlik keńesi».
Uıymdastyrýshylardyń aıtýynsha, bul forýmnyń basty maqsaty men mindeti – eki eldiń iskerlik toptary arasyndaǵy ózara tıimdi yntymaqtastyqty damytý, Malaızıa naryǵynda qazaqstandyq bıznestiń múddesin ilgeriletý úshin jaıly klımatty qalyptastyrý, sondaı-aq, Qazaqstanǵa Malaızıadan ınvestısıalar tartý.
«Forým eki eldiń bıznes qaýymdastyqtary arasyndaǵy ózara tıimdi yntymaqtastyq pen seriktestikti damytýǵa arnalǵan keremet alań bolyp tabylady. Al «Qazaqstan-Malaızıa İskerlik keńesi» - Qazaqstan men Malaızıa kompanıalaryna bıznesti tolyqqandy túrde ary qaraı damytý úshin qajetti quraldardyń barlyǵyn usynatyn uıym», - dep málimdedi «Qazaqstan-Malaızıa İskerlik keńesi» ortaq tóraǵasy Dato Berikqazy Seksenbaev is-sharanyń ashylýy kezinde.
Qazaqstan Respýblıkasy Ulttyq bankiniń málimetteri boıynsha Qazaqstan ekonomıkasyna malaızıalyq tikeleı ınvestısıalardyń 2016-2017 jyldar ishindegi jáne 2018 jyldyń birinshi toqsanyndaǵy úlesi 16,6 mln. AQSH dollaryn qurady. Negizgi ınvestısıalar munaı-gaz, qurylys jáne ınfraqurylymǵa baǵyttaldy.
Eki el arasyndaǵy taýar aınalymynyń qarqyny jaǵynan 2017 jyldyń sáıkesinshe kezeńimen salystyrǵanda ózara saýdanyń 48%-ǵa (38,9 mln. AQSH dollary) óskeni baıqalyp otyr. 2018 jyldyń qańtar-sáýir aılaryndaǵy qazaqstandyq ónim eksporty 251 myń AQSH dollaryn, al ımport 38,6 mln. AQSH dollaryn qurady (2017 j. eksport - 41,5 myń AQSH dollary, ımport – 26,1 mln. AQSH dollary).
Forým jumysyna ekonomıkanyń túrli sektorlarynda (munaı-gaz salasy, metalýrgıa ónerkásibi, jeńil ónerkásip jáne t.b.) qyzmet etetin Malaızıanyń 40-tan asa kompanıasy, sondaı-aq, túrli ekonomıka sektorlarynda qyzmet etetin komersıalyq jáne memlekettik 60-tan asa qazaqstandyq kompanıa qatysyp jatyr.
Forým aıasynda iri qazaqstandyq qorlar jáne Malaızıa kompanıalary (Qazaqstan-Malaızıa İskerlik keńesi (ary qaraı - QMİK) jáne «Atameken» UKP; QMİK jáne «Qazaqınvest»; QMİK jáne «Qazaqeksport») arasynda ózara túsinistik jáne yntymaqtastyq týraly birqatar memorandýmdarǵa qol qoıylady dep kútilýde.
Forým saýda jáne ınvestısıa salasyndaǵy ózara árekettestik syndy keń taqyryptardy qozǵaıtyn plenarlyq sesıa jáne ashyq paneldik pikirtalas, V2V kezdesýleri formatynda ótip jatyr. İs-sharanyń basty spıkerleri – Malaızıadaǵy Qazaqstan elshisi Sárekenova Danıar Qabıdollauly, Qazaqstandaǵy Malaızıa elshisi Saıd Mohamad Bakrı bın Saıd Abdýl Rahman, «Resmi» kompanıalar toby dırektorlar keńesiniń tóraǵasy Qaırat Májibaev, Malaızıa-Qazaqstan İskerlik keńesiniń ortaq tóraǵasy Datýk Lý Týk Djı (Datuk Loo Took Gee) jáne t.b. tulǵalar.
