7 qarashada Astanada ótken Qaýipsizdik keńesiniń otyrysynda Nazarbaev áleýmettik zertteýlerdiń nátıjesi boıynsha, Qazaqstan halqyn komýnaldyq qyzmet baǵasy men bilim jáne medısına qyzmetiniń qymbattyǵy alańdatady dedi.

Qazaqstan Prezıdenti úkimet pen bas prokýratýradan tarıfterdiń negizsiz kóterilýine jol bergen tulǵalarǵa qatysty barlyq quqyqtyq aktilerdiń zańǵa saı oryndalýyn talap etti.

– Elektr energıasy men jylý tarıfteri máselesi – problemanyń bir bóligi ǵana. Basqa da qyzmet kórsetýshi-monopolıster bar. Bul aýyz sý, gaz, káriz júıesi, telefon baılanysy jáne ınternet úshin kórsetiletin qyzmettermen qamtamasyz etý isine de qatysty. Monopolıaǵa qarsy komıtet osy máselelerdi de retke keltirýi kerek, – dedi Memleket basshysy.

Qazaqstan Prezıdenti energıa jetkizýshi kompanıalardyń osy áreketterinen turǵyndarǵa kelgen shyǵyn kólemi 14 mıllıard teńgege jetkenin aıtyp, energıamen qamtamasyz etetin kompanıalardyń zańsyz kirisi 15 mıllıard teńge bolǵanyn atap ótti. Sondaı-aq, tekseris nátıjesinde jergilikti atqarýshy organdar tarapynan tarıfterdi tómendetý úshin bólingen sýbsıdıalardyń tıimsiz paıdalanylǵany anyqtalǵan.

– Qapshaǵaı qalasynan bir ǵana mysal keltireıin. Baǵdarlamanyń iske asyrylý kezinde tarıf eki ese ósken. Energıamen qamtamasyz etetin qurylǵylardyń tozý kórsetkishi 53-ten 77 paıyzǵa ulǵaıǵan. Barlyq quqyq buzýshylyqtar Ulttyq ekonomıka, Energetıka mınıstrlikteri men jergilikti atqarýshy organdar tarapynan baqylaý jasalmaǵandyqtan jáne olardyń áreketsizdiginen týyndap otyr, – dedi Nursultan Nazarbaev.