Ýkraınanyń Ternopol oblysynda orys tilin kez kelgen formada qoldanýǵa moratorıı qabyldandy, dep habarlaıdy Qamshy.kz aqparat agenttigi. 

Orystar ana tilin "Uly orys tili" dep ataıdy. Árıne ár ult úshin óz ana tili uly shyǵar. Alaıda orys tili burynǵy SSRO-nyń quramynda bolǵan elderde ǵana qoldanylady. Desek te, post keńestik memleketterde de orys tiliniń qoldanys aıasy jyldan-jylǵa tarylyp keledi. Qaı el bolmasyn memleket tiline basymdyq berip, onyń mereıin ústem etý úshin baryn salýda. Buryn baýyrlas elder bolǵan Ýkraına men Reseıdiń arasyndaǵy kıkiljińnen keıin Ýkraına orys tilin múlde yǵystyrýdy myqtap qolǵa aldy. 

Buǵan deıin mektepterde orys tili pánin alyp tastady, Lenınniń barlyq eskertkishin qulatty. Osylaısha komsomoldy eske salatyn barlyq nysannan qutyldy. Bıyl telearnalarǵa qatysty zań qabyldandy. Oǵan sáıkes, Ýkraına telearnalarynda efır ýaqytynyń 75% ýkraın tilindegi jobalarǵa berilýi tıis.  Endi, mine, orys tiline moratorıı jarıalap otyr. 

Ýkraınanyń Lvov oblysynda orys tilin qoldanýǵa tyıym salynǵanda Reseıdiń syrtqy ister mınıstrligi syn aıtqan edi. Kóp uzamaı Ýkraınanyń basqa oblystarynda da orys tilin qoldanýǵa tyıym salyndy. 

«Oblystyq keńes, Reseı Ýkraına terıtorıasynda basqynshylyq áreketin toqtatpaıynsha Ternopol aýmaǵynda kez kelgen formada orys tilin paıdalanýǵa tyıym saldy», - delingen oblystyq keńestiń saıtynda.

Ýkraınanyń ulttyq uıymynyń 90 jyldyǵyna oraı depýtattar osyndaı sheshim qabyldaǵan. Reseı Ýkraınanyń ultshyldar uıymyn ekstremıstik dep tanydy.

Buǵan deıin Jıtomır oblystyq keńestiń depýtattary da orys tilin qoldanýǵa tyıym salǵanyn esterińizge salaıyq.