Almaty ákimdiginde el Prezıdenti Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty halyqqa Joldaýynyń qalaı oryndalatyny týraly aıtyldy. Ol úshin megapolıs basshylyǵy bilim, densaýlyq saqtaý, turǵyn úı salalaryn sapaly damytý jáne qalalyqtar úshin jaıly ári qaýipsiz orta qalyptastyrý maqsatynda 100-den astam arnaıy sharalar engen qalalyq jospar qabyldady.
Almaty ákimi Baýyrjan Baıbek qala aktıvimen kezdesýde Elbasy júrgizip otyrǵan ekonomıkalyq turaqtylyq, birlik pen kelisim syndy salıqaly saıasattyń arqasynda halyqtyń turmys jaǵdaıyn jaqsartý úshin memlekettiń áleýmettik shyǵyndardy arttyrǵanyn atap ótti. Tek Joldaýdy júzege asyrý úshin ǵana 1,5 trln. teńgeden astam qarjy jumsalatyn bolady, al bul jekelegen memleketterdiń jyldyq búdjetterine teń.
Memleket basshysy Joldaýynyń basty baǵyttarynyń biri ýrbanızasıa máselesin oıdaǵydaı sheshý men qalalardy odan ári damytý bolyp tabylady. Qazirgi kezde álemdik ekonomıkanyń 70%-y qalalarda qalyptasady, Almaty osyndaı 600 megapolısterdiń qataryna engen.
Almaty ákimi Memleket basshysynyń tapsyrmasy boıynsha halyqaralyq keńesshilermen birge megapolıstiń uzaq merzimdi bolashaqqa boljamy – Qalanyń 2050 jylǵa deıingi damýynyń Sheberlik- josparynyń jasalyp jatqandyǵyn aıtty.
«Bizdiń mindetimiz Almatyny jaıly, yńǵaıly etý jáne ár adamnyń turmystyq jaǵdaıyn jaqsartý. Ol úshin qalada jyl saıynǵy ekonomıkalyq ósim orta eseppen kem degende 5% bolýy, eńbek ónimdiligi 2 ese artýy, 15 jylǵa jan basyna shaqqanda JÓÓ 1,5, 30 jylǵa 3 ese ósýi tıis. Munyń basty sharty ekonomıkanyń qurylymyn júıeli ózgertý bolyp tabylady. Sarapshylardyń boljamy boıynsha 2035 jyly Almaty turǵyndarynyń sany 3 mln. adamnan asady. Demek, qaladaǵy ekonomıkalyq belsendi turǵyndarynyń qatary 700 myńǵa kóbeıedi, olardy IT sektorynda, bilim berýde, densaýlyq saqtaýda,ınjınırıńte, joǵary tehnologıaly óndiriste, ónerde, týrızmde jumyspen qamtý qajet. Al bul úshin qolaıly ınovasıaly ekologıalyq orta, OESR elderindegideıi joǵary sapaly bilim men densaýlyq saqtaý qamtamasyz etilýi tıis», -dedi Baýyrjan Baıbek.
Prezıdent Joldaýynyń basty baǵyttarynyń biri kóleńkeli aınalymdy 40%-ǵa qysqartý. Qazirgi kezde Almaty ekonomıkasynyń 80%-dan astamy- saýda men qyzmet kórsetý. Sońǵy jyldary Almaty ákimdigi saýda salasyn kóleńkeden shyǵarý úshin júıeli ári turaqty sharalardy júzege asyrýda, bazarlar modernızasıalanýda. Tek sońǵy 3 jylda saýda salasyn damytýǵa 240 mlrd. teńgeden astam jeke qarjy jumsaldy.
«Sıfrlandyrý – ekonomıkanyń ashyqtyǵyn qamtamasyz etýdiń, búrokrattyqty, azamattardyń jáne bıznestiń kedergilerin joıýdyń eń utymdy mehanızmi. Qazirgi kezde Almatyda «Smart Almaty» 40-tan astam jobasy júzege asýda. Sıtýasıalyq ortalyq pen BigData jumys jasaı bastady. «Ońaı» men «A-parkıngtiń» tólemdi júıeleri iske qosyldy. Nátıjesinde 9 aı ishinde salyq túsimi ótken jyldyń osy kezeńimen salystyrǵanda 12,7%-ǵa artyp, 1,3 trln. teńgeni qurady. Óz kezeginde salyqtyń kóp jınalýy bızneske qoldaý kórsetýge jáne qala turǵyndarynyń áleýmettik shyǵyndaryna jumsalatyn qarjyny arttyrady», - dep atap ótti qala ákimi.
Aıta keterligi, bıylǵy jyly «Nurly Jer» baǵdarlamasy boıynsha 6 myń otbasy jańa páter alady, bul ótken jylmen salystyrǵanda úsh ese kóp. «7-20-25» baǵdarlamasy belsendi júzege asýda. Eski úılerdi modernızasıalaýdyń ınvestısıalyq áleýeti 320 mlrd. teńgeni quraıdy. Aldaǵy bes jylda jeke ınvestorlardy tarta otyryp 23 myń jańa páterdi iske qosý josparlanǵan.
PIK-terdi reformalaý júıesi qatar júrýde. Zańǵa ózgeris engizý úshin ákimdik tarapynan 30 usynys berildi.Qalanyń turǵyn úı qoryn ustaý Erejesi qabyldandy. 2019 jyly barlyq PIK-ter biryńǵaı qolma-qol aqshasyz júıege kóshetin bolady. Tek 3 jyl ishinde ǵana PIK-terdiń qarjysymen 4 myńnan astam úıler jóndelip, lıfterdiń 20% -dan astamy aýystyryldy.
Elbasy bastamasynyń mańyzdy bóligi eń az jalaqyny kóterý bolyp tabylady. Tek Almatynyń ózinde ǵana aldyn- ala esepteý boıynsha bul másele 25 myńnan astam adamdy qamtıdy eken. Bulardan ózge, Memleket basshysynyń tapsyrmasy boıynsha elimizde memlekettik qyzmetkerlerge eńbekaqy tóleýdiń jańa modeli engizilýde. Osy aıdan bastap Almaty jalaqy tóleýdiń jańa modeline kóshedi. Tıimsiz shyǵyndardy ońtaılandyrý arqasynda memlekettik qyzmetkerlerdiń jalaqysy orta esppen 2 ese ósedi. Onyń ústine 49 memlekettik kásiporyn qysqardy, olardyń 32-i básekeles ortaǵa berildi.
SHOB turaqty qoldaý sharalary barysynda jyl basynan beri 24 myń jumys orny quryldy. Jyl aıaǵyna deıin taǵy 8 myń jumys orny ashylady. Memınvestısıanyń ár teńgesine 4 jeke teńgeden keledi. Qazirgi, 8 aı ishinde qala búdjetine ótken jylmen salystyrǵanda 13,2%-ǵa kóp salyq jınaldy, shaǵyn jáne orta bıznesten salyq 6% ǵa artyq tústi.
Qala keńistigin jaqsartý aıasynda megapolıstiń tarhı ortalyǵynyń úshten ekisi jańardy, 524 kóshe men 1400 eski aýlalar qaıta jasaldy. 300 km aryq, 800 km astam ınjenerlik júıe rekonstrýksıalandy. Qalanyń barlyq jer asty joldary kúrdeli jóndeýlerden ótti. Kóshedegi barlyq jaryq kózderiniń úshten biri dıodty jáne energıany saqtaıtyn shamdarǵa aýystyryldy. Trotýarlar men aýlalardaǵy jaryq baǵanalary aýystyrylýda. Jyl aıaǵyna deıin jańa qoǵamdyq kóliktiń úlesi 80%-ǵa jetedi.
Ortalyqtandyrý qaǵıdasy boıynsha qalaǵa qosylǵan Alataý jáne Naýryzbaı aýdandaryna 512 mlrd. teńgeden astam memleket qarjysy ınvestısıa retinde jumsaldy. 240 km jol, 1300 km ınjenerlik jeli, 11 mektep, 156 bala baqsha jáne 10 meduıym iske qosyldy. Jeke ınvestısıa kólemi 252 mlrd. teńgeni qurady, kásiporyndar sany 4 ese, salyq kólemi 10 ese ósti. Nátıjesinde qyzmet kórsetý sapasy jáne aýdandardyń 400 myńdaı turǵyndarynyń áleýmettik senimi artty.
