Búgin qalanyń densaýlyq saqtaý qoǵamdastyǵymen kezdesý barysynda Almaty ákimi Baýyrjan Baıbek Densaýlyq saqtaý basqarmasynyń jańa basshysy Qanat Tósekbaevty tanystyrdy.
Sońǵy jyldary Almatyda qala turǵyndarynyń densaýlyǵyna qatysty negizgi ındıkatorlar boıynsha oń nátıjelerge qoljetti, densaýlyq saqtaý uıymdaryn jańa zamanaýı medısınalyq tehnıkamen qamtamasyz etý 80%-ǵa jetti. Turǵyndardyń 94%-y elektrondy pasportpen qamtyldy. Jyl aıaǵyna deıin qalanyń barlyq emhanalary qaǵazsyz formatqa kóshedi. Júrgizilgen medısınalyq reformalar nátıjesinde syrqattarǵa qyzmet kórsetý ýaqyty 20%-ǵa, kezek kútý 30%-ǵa qysqardy.
«Memleket basshysy densaýlyq saqtaý salasyna únemi aıryqsha nazar aýdarady, bul másele Elbasynyń halyqqa Joldaýynda da kórinis tapqan. Prezıdenttiń tapsyrmasy boıynsha syrqatty emdeýdiń jańa ádisterin engizgen ýchaskelik medısına qyzmetkerleriniń jalaqysy 1 qańtardan bastap birtindep 20%-ǵa ósedi. Tek Almatynyń ózinde ǵana bul shara jalaqysy 199 416 teńgege jetetin ýchaskelik qyzmettiń 1028 dárigerin, eńbekaqysy 130766 teńgege deıin ósetin 2400 medbıkeni qamtıdy», - dep atap ótti Baýyrjan Baıbek.
Degenmen, atqarylǵan jumystarǵa qaramastan turǵyndardyń qalanyń medısınalyq uıymdary kórsetetin qyzmetterge kóńilderi tolmaıdy. Osyny eskere otyryp, Almaty ákimi Densaýlyq saqtaý basqarmasy jańa basshysynyń aldyna prınsıpti ári júıeli jumysty qajet etetin birinshi kezektegi mindetterdi qoıdy.
Iaǵnı, medısına uıymdarynyń barlyq qyzmeti ashyq bolýy jáne sybaılas jemqorlyqqa jol bergen basshylarǵa qatań sharalar qoldanylýy qajet. Qalanyń medısına uıymdary azamattardyń barlyq ótinishterine monıtorıń júrgizýleri, olarǵa der kezinde mán berýleri ári ózderiniń qarjylyq esepterin jarıa etýleri tıis.
Densaýlyq saqtaý basqarmasynyń jańa basshysyna qalanyń medısına mekemeleri janyndaǵy qadaǵalaý keńesiniń quramyna ÚEU, BAQ ókilderin jáne blogerlerdi engize otyryp, ony qaıta qaraý tapsyryldy. Óz kezeginde uıymdardyń ishki aýdıt qyzmeti tek qadaǵalaý keńesine ǵana tikeleı esep berýleri tıis.
Buldardan ózge dárilerdi satyp alýdy elektrondy formatqa kóshirip, medısınalyq tehnıkany satyp alǵan kezde onyń naqtyly baǵasyna jasalǵan saraptamany jiti baqylaǵan jón.
Ortalyqtandyrý qaǵıdasy boıynsha medısınalyq qyzmetti qoljetimdi etý úshin megapolıstiń ár aýdanynda uıymdyq-quqyqtyq formasy ózgergen kópprofıldi stasıonarlar qurylatyn bolady.
Osyǵan oraı, Densaýlyq saqtaý basqarmasyna medısınalyq uıymdardyń basshylaryn konkýrstyq negizde taǵaıyndaýdyń naqtyly mehanızmin ázirleý tapsyryldy, munda túpki nátıjege erekshe nazar aýdarylýy tıis. Qala basshysy talapqa saı áleýmettik lıft qurýdy jáne basshylardy merıtokratıa prınsıpi boıynsha tańdaýdy usyndy.
Aıta keterligi, Densaýlyq saqtaý basqarmasynyń jańa basshysy óziniń eńbek jolyn medısınalyq jedel járdemde feldsher bolyp bastaǵan. Ár jyldary Almatydaǵy balalardyń juqpaly aýrýlar aýrýhanasynyń jáne Astana qalasyndaǵy medısınalyq jedel járdem stansıasynyń bas dárigeri qyzmetterin atqarǵan. Jańa qyzmetke taǵaıyndalǵanǵa deıin Batys Qazaqstan oblysynyń Densaýlyq saqtaý basqarmasyn basqarǵan. Qazaq memlekettik medısına ýnıversıtetiniń jáne Gannover joǵary medısına mektebiniń túlegi.
