Osy jeksenbide Almatynyń birneshe kósheleri ýaqytsha jabyq bolady. Qalada alǵash ret jartylaı marafon uıymdastyrylmaq. Sonymen qatar, dástúrli velosherý ótpek. Atalǵan 2 shara ál-Farabı dańǵylynyń boıynda ótedi. Budan ózge taǵy qandaı kóshelerde qozǵalysqa shekteý qoıylady? Sporttyq sharalar qansha ýaqytqa sozylady?
Jartylaı marafon Almatyda alǵash ret ótkeli otyr. Sondyqtan uıymdastyrýshylar sharany oıdaǵydaı etip ótkizý úshin tyńǵylyqty daıyndalǵan eken. Marafonǵa qatysýshylar 21 shaqyrymdy ońaı eńseredi degen senimde. Óıtkeni jol boıynda sportshylar úshin shatyrlar tigilmek. Onda qatysýshy sý iship, tez tamaqtanyp alýyna bolady.
«Jol boıyndaǵy shatyrlardy, baǵytty kórsetip turatyn belgilerdi ornatý jumystary túnde júrgiziledi. Iaǵnı túngi saǵat 12.00-den bastap Tuńǵysh Prezıdent saıabaǵynan bastap ál-Farabı dańǵylynyń keıbir bólikteri jabylady. Máselen, marafonshylar kósheniń soltústik betimen júgirse, ońtústiginde kólikter erkin qozǵala beredi. Abaı dańǵylynda soltústik baǵyty ashyq bolady. Biz júrgizýshilerge de yńǵaısyzdyq týdyrmaýdyń joldaryn qarastyrýdamyz. Jartylaı marafonǵa qatysýshylarǵa barlyq jaǵdaı jasalyp jatyr. Shara oıdaǵydaı ótedi dep oılaımyn», – dedi «Almaty Marafon» dırektory Saltanat Qazybaeva.
Jartylaı marafon tańǵy saǵat 8-de Tuńǵysh Prezıdent saıabaǵynan bastalady. Sportshylar túski 11 shamasynda ortalyq stadıonda ornalasqan márege keledi dep josparlanyp otyr. Qatysýshylardyń qaýipsizdigin qamtamasyz etý maqsatynda, marafonshylar júgirip ótetin ál-Farabı dańǵyly Nazarbaevtan Saın kóshesiniń aralyǵy, odan tómen Abaı dańǵylyna deıin kólik qozǵalysyna tyıym salynady. Bıyl jartylaı marafon sharasy dástúrli velosherýmen tuspa-tus kelip otyr. Velosıpedshiler ádettegideı tańǵy saǵat 9.30-da «Nurly Taý» bıznes ortalyǵynan Tuńǵysh Prezıdent parkine deıin júrip ótedi. Iaǵnı, ál-Farabı dańǵylynyń osy aralyǵy shamamen, saǵat 11:00-ge deıin jabyq bolady.
«Velosherý ótetin baǵyt tolyǵymen jabylmaıdy. Máselen, sportshylar jarysy bastalǵan soń, sońǵy qatysýshy Seıfýllın kóshesin júrip ótkennen keıin, sol aralyqty ashamyz. Kelesi Shashkın, Markov kósheleri dep jalǵasyp kete beredi. Kósheler kezekpen kezek ashyla beredi. Mundaı sheshim júrgizýshilerdiń de yńǵaılylyǵy úshin jasalyp otyr», – dedi velosherý uıymdastyrýshysy Aıdos Baǵashev.
Sporttyq sharalardy uıymdastyrýshylar turǵyndarǵa baǵyttaryn aldyn ala josparlap alýlaryn eskertedi. Aıta keteıik, márede barlyq qatysýshylardyń arasynda baǵaly syılyqtar men velosıpedter oınatylady. Atalmysh velosherý 2018 jyly josparlanǵan 21 velosherýdiń on toǵyzynshysy.
