Almatydaǵy 300-ge jýyq jekemenshik balabaqsha beınebaqylaý kameralarymen jaraqtandyrylmaǵan. Bul kásipkerler ashqan 600 balabaqshanyń jartysyn qurap otyr. Al memlekettik bóbekjaılarda jaǵdaı birshama jaqsyraq. Biraq qosymsha kameralardy satyp alýǵa bilim basqarmasy tıisti ótinishterin daıyndap qoıypty. Balalardyń qaýipsizdigi qalaı sheshilip jatyr?
Almaty qalasyndaǵy bul balabaqshanyń aýmaǵy alaqanǵa syıyp ketkendeı. Olaı deıtinimiz, mundaǵy árbir qımyl beınebaqylaý kameralarynyń nazaryna birden iligedi. 48 kamera jatyn bólmelerde, toptarda, sport jáne mýzyka sabaǵy kabınetterinde ornatylǵan. Biraq meńgerýshiniń aıtýynsha, bul da jetkiliksiz. Óıtkeni, beınebaqylaý kameralary qyzmetkerlerdiń tártibi men ata-analarmen bolatyn keı jaǵdaılardy sheshýge kómektesedi.
«Syrt jaqta 8, ish jaqta 24 jáne balalar uıyqtaıtyn bólmelerde 9 beınekamera ornatylǵan. 2019 jyly biz búdjetke engizdik. Endi aýla jaqqa, kóshe tusqa jáne kireberis esikterge taǵy beınekameralar ornatamyz dep úmittenip otyrmyz», – dedi Almaty qalasy №109 balabaqshasynyń meńgerýshisi Orynbasar Qurmanbaev.
Ár bólmede bir kamera ornatylǵan. Keıde isten shyǵyp qalady eken. Olardy osydan bes jyl buryn ornatqan. Buǵan deıin qyzmet kórsetetin fırma 3 jyl kóleminde tegin jasap berip kelse, qazir balabaqsha kameralardyń qaltqysyz jumys istep turýy úshin aıyna 50 myń teńge kóleminde tólep otyr. Elbasynyń kezekti joldaýynan keıin balalar qaýipsizdigi úshin eshteńeni aıap jatqan joq. Endigi kezek jekemenshik balabaqshalarda.
«Biz jekemenshik balabaqshalardyń búdjetin qarastyra almaımyz. Biraq Almaty qalasy Bilim basqarmasy meńgerýshilermen kezdesip, Elbasy joldaýyn sol kisilerge jetkizý jumystaryn júrgizbekpiz. Jekemenshik balabaqshalarda da balalar júretin jerlerde beınekameralar ornatylýy kerek», – dedi Almaty qalasy Bilim basqarmasynyń bólim basshysy Álıa Saǵıeva.
Almaty qalasynda 781 balabaqsha bolsa, onyń 180-i memlekettik, qalǵan 601-i jekemenshik ıelikte. Qalalyq bilim basqarmasy 2019 jyldyń basyna qaraı mektepke deıingi barlyq mekemede beınebaqylaý kamerasy máselesi tolyqtaı sheshiletinin jetkizdi.
Aıta keteıik, jyl sońyna deıin Almatyda taǵy eki balabaqsha óz jumysyn bastaıdy. Olar Alataý men Naýryzbaı aýdanynda ornalasqan. Elbasy joldaýyna sáıkes, 2021 jylǵa deıin mektepter men balabaqshalar beınebaqylaý kameralarymen 100 paıyz qamtylýy kerek. Qazirgi jaǵdaı boıynsha bul kórsetkish mektepterde 80 paıyzdy, balabaqshalarda 58 paıyzdy qurap otyr.
