Almaty áýejaıynda terorrızmge qarsy oqý-jattyǵý ótti. «Dabyl-Antıterror-2018» dep atalatyn sharada Ulttyq qaýipsizdik komıtetiniń, İshki ister mınıstrliginiń jáne Ulttyq gvardıanyń arnaıy jasaqtary oqys oqıǵaǵa degen daıyndyqtaryn pysyqtady.

Oqý-jattyǵý senarıi boıynsha lańkester Dýshanbeden kelgen ushaqty jaýlap alady, áýejaı aýmaǵynda terorrızmniń qyzyl deńgeıi jarıalanǵan. Áýe kemesinde 100-ge tarta jolaýshy bar. Arnaıy jasaq qyzmetkerleri áýe kemesindegi kepildikte otyrǵan adamdardy qutqaryp, sodyrlardy ustady. Operasıa kezinde zardap shekkender joq. 

Sodan keıin jaýyngerler qoǵamdyq kólikti kepildikke alǵan sodyrlardy qolǵa túsirdi. Artynsha arnaıy jasaq áýejaı aýmaǵynda ornalasqan ákimshilik ǵımaratyna bet aldy. Ondaǵy birneshe qylmyskerdi matap, tapsyrmany múltiksiz oryndap shyqty. Respýblıkalyq «Dabyl-antıterror-2018» jedel-taktıkalyq oqý-jattyǵýy Almaty halyqaralyq áýejaıynda eki kún qatarynan ótti.