Qaskeleńnen Almatyǵa qatynaıtyn avtobýstar jyl sońyna deıin jańartylatyn boldy.
Qaskeleńniń turǵyndary Almatyǵa jańa baǵyttaǵy avtobýstarmen qatynaıtyn bolady. №202 baǵyttaǵy qoǵamdyq kólik jyl aıaǵyna deıin iske qosylmaq. Sóıtip, shaǵyn avtobýstarǵa syımaı, jol azabyn tartqan jolaýshylardyń máselesi jeńildeı túspek. Qazir tasymaldaýshylar bul baǵyt úshin sý jańa avtobýstar satyp alyp jatyr eken. Al qala aýmaǵynda birneshe koǵamdyq kóliktiń baǵyty ózgerdi.
Qaskeleń men Almaty arasynda qatynaıtyn tozyǵy jetken shaǵyn avtobýstarǵa syımaı, jol azabyn ábden tartqan jolaýshylarǵa jaǵdaı jasalady. Endi qos baǵytta jańadan iske qosylatyn №202 avtobýstar júredi. Qoǵamdyq kólik Raıymbek dańǵylynyń boıymen júrip, turǵyndardy Saıran avtobeketine jetkizedi. Qazir tasymaldaýshylar bul baǵytqa sý jańa avtobýstar satyp alyp jatyr eken. 20 metrlik qoǵamdyq kólikter jyl sońyna deıin jolǵa shyǵady.
«Qalada júrgen úlken avtobýstardyń syıymdylyǵy – 80 adamdyq. Qazirgi kezde Qaskeleń, Almaty arasynda syıymdylyǵy az shaǵyn avtobýstar júredi. Biraq arly-berli qatynaıtyn adam sany kóp. Sondyqtan basqarma osyndaı máseleni qarastyryp jatyr», – dedi Almaty qalasy Jolaýshylar kóligi jáne avtomobıl joldary basqarmasynyń bas mamany Shyńǵys Baıqadamov.
Esesine, qaladaǵy №49 marshrýt kesteden alynyp tastaldy. Óıtkeni, bul baǵyttaǵy qoǵamdyq kólik Raıymbek dańǵylynyń boıymen júretin birqatar marshrýttardy qaıtalaıdy. Jalpy, Raıymbek dańǵylynyń boıyndaǵy avtokólikterdiń júrý qarqynyn azaıtý maqsatynda birneshe avtobýstyń júrisi ózgertildi. Máselen, buǵan deıin Raıymbek dańǵyly arqyly Saıahatqa qatynaıtyn №8, 17, 73 qoǵamdyq kólikter endi Maqataev kóshesimen júredi.
«Medeý aýdany turǵyndarynyń suraýy boıynsha, №73 marshrýttyń júrý syzbasy Maqataev kóshesinen, kók bazardan ary qaraı Baltabaev, Bazarbaev kóshesine jáne Shyǵys aınalma jolyna deıin uzartyldy. Sondaı-aq, №34 avtobýstyń sońǵy aıaldamasy BRT jelisinde bolǵanyna baılanysty Mustafın kóshesinen Qojabekov pen Rozybakıev kósheleriniń qıylysyna, «Mega» ortalyq mańyna qaraı ózgertildi», – dedi Shyńǵys Baıqadamov.
Al №11 marshrýt burynǵydaı «Asyl Arman» shaǵyn aýdanyna barmaıdy, júrisin Abaı saıajaılarynda aıaqtaıdy. Onyń ornyna №16 jáne №14 avtobýstar qyzmet etedi. Qalanyń qoǵamdyq kólikterindegi bul ózgeristerge turǵyndar da rıza.
« – Úlken avtobýstar júrip jatyr, keıbireýleri jaqsy júredi. Jaman emes.
– Almaty avtobýstaryna kóńilim tolady, ishi jyly, júrý aralyǵy ýaqtyly.
– Kóp tospaımyz, ýaqytymen keledi», – desti biz sózge tartqan jolaýshylar.
Nazarbaev dańǵylyn Jansúgirov kóshesine deıin uzartý jumystary aıaqtalǵanda, qosymsha taǵy da birqatar atvobýstardyń júrisi ózgeretin kórinedi. Jaýapty basqarma ókilderi Súıinbaı dańǵylymen qatynaıtyn №92, 32, 98 jáne №2 marshrýttardy Nazarbaev dańǵylynan Saıahatty aınalyp ótkizbek.
