Kádege jaraǵan eski shamdar. Alataý aýdanyndaǵy buryn-sońdy jaryq bolmaǵan 15 kóshe jaryqpen qamtylmaq. Qalanyń ortalyq kóshelerinen alynǵan eski baǵanalar eshqashan jaryqtandyrylmaǵan jerlerge ornatylyp jatyr.

Alataý aýdanyna ornatylatyn jaryq baǵanalary buryn qaladaǵy qaıta jańarǵan Abaı, Abylaı han jáne Nazarbaev dańǵyldaryna jaryq berip turǵan shamdar. Al bul kóshelerdegi shamdar energıa únemdeıtin, dıodty jaryq kózderi bar lampalarǵa aýystyrylǵan bolatyn. Paıdaǵa jarap jatqan eski baǵanalar áli talaı jyl jaryq berip turady deıdi merdigerler.

«Búginde 149 taǵan Farıza Ońǵarsynova kóshesine ornatyldy. Endi shamdary ornatylady. Ekinshi kezekte Ótemisuly kóshesi tur. Ol jaqqa 49 taǵan ornatyp qoıdyq, qazir shamdaryn júrgizip jatyrmyz. Aýdanda jaryqty qajet etetin 15 kóshe bolsa, onyń ekeýine 200-deı taǵan ornatyp tastadyq. Endi jyl sońyna deıin taǵy eki kóshege ornatyp shyǵamyz», – dedi merdiger kompanıa dırektorynyń orynbasary Saıan Óteýov.

Ornatylyp jatqan eski taǵandardyń barlyǵy da aldyn-ala boıalyp, kem-ketigi túzelip keledi eken. Bir qaraǵanda jańasynan esh aıyrmashylyǵy da joq. Aldaǵy apta jaryq shamdaryn ornatyp, osy aıdyń sońyna deıin iske qosamyz deıdi merdigerler. Qalǵan kóshelerdegi jumystar jyldyń sońyna deıin tolyq aıaqtalyp, jergilikti turǵyndardy qýantpaq.  

«Qazirgi ýaqytta Alataý aýdanyny boıynsha 15 kóshede 730 kóshe sham jaryq shamdaryn ornatý jumystary júrgizilip jatyr. Bul 15 kóshede buryn eshqandaı jaryq shamdary bolmaǵan. Bul kósheler Alataý aýdanyndaǵy mańyzdy, kólik jáne jaıaý júrginshiler kóp júretin úlken kósheler», – dedi Almaty qalasy Alataý aýdany ákimdigi kóriktendirý bóliminiń basshysy Tórebek Baıymbetov.

Alataý aýdanyn jaryqtandyrý jumystaryna 180 mln teńge bólingen. Kóshelerdiń jalpy uzyndyǵy 24 shaqyrymdy kuraıdy. Aıta keteıik, jyl aıaǵyna deıin Almatyda 24 myńnan astam jaryq kózderi energıa únemdeıtin jáne jaryqdıodty shamdarǵa aýystyrylady.