Almatyǵa jumys sapary kezinde Parlament senatynyń depýtaty Darıǵa Nazarbaeva qaladaǵy Jumyspen qamtý ortalyǵyn aralady.
Osydan 7 jyl buryn qurylǵan mekeme búginde ashyq keńse qaǵıdatyna súıenip, tyń tásilmen qyzmet kórsetýge kóshken. Ásirese, múmkindigi shekteýli jandardy qoldap, kásip tabýǵa munda aıryqsha den qoıylǵan. Jalpy, jyl basynan beri ortalyqqa jumys izdegen 35 myńnan astam turǵyn júgingen. Olardyń 30 myńy jumysqa ornalasypty. Ásirese, tájirıbesi joq jas mamandarǵa qoldaý erekshe kórsetilýde. Sondaı-aq, probasıalyq baqylaýda turǵan azamattardyń da qoǵamǵa qosylyp, el qatarly jumys isteýine kedergi joq. Qazir osy sanattaǵy azamattardyń eńbekke qabilettiligi taldanyp jatyr.
«Birtalaı azamat kúnde kelip turady eken. Olardyń 70-80 paıyzy ózderiniń jumys oryndaryn taýyp qyzmet istep jatyr. Menińshe, osy jumysty odan ary jalǵastyrý kerek. Analıtıka jaǵynan da birtalaı jumys isteý kerek. Kim kelip jatyr, qandaı vakansıalar bar, qandaı qyzmetke jańa mamandar kerek, sonyń bárine taldaý jasap, Úkimetke jiberip turý kerek. Osy turǵydan jumysty jaqsartý qajet», – dedi QR Parlamenti senatynyń depýtaty Darıǵa Nazarbaeva.
Senator budan ózge, Open Almaty qoǵamdyq qabyldaýyna da bas suqty. Darıǵa Nazarbaeva bılik pen qala turǵyndary arasyndaǵy ózara baılanystyń biregeı alańyna aınalǵan qyzmet jumysymen tanysty. Bul mekemede turǵyndar memlekettik qyzmetkerlerden qajetti aqparattar men keńesterin alady.
Sondaı-aq, Darıǵa Nazarbaeva megapolıs jastarymen kezdesti. Olardyń talap-tilekterin tyńdap, memleket basshysynyń sońǵy joldaýyn túsindirip berdi. Aıta ketsek, Prezıdent 2019 jyldy «Jastar jyly» dep jarıalaǵan edi. Bul ásirese, stýdentter qalasy atanyp ketken Almaty úshin óte mańyzdy. Búginde shaharda jataqhana máselesi sheshimin taýyp, «Jastardy qoldaýdyń jol kartasy» iske asýda.
«Prezıdenttiń joldaýynda jastarǵa qatysty kóp másele kóterilgen. Oqý granttary, jańa múmkindikter men jastardyń eńbek etý týraly da aıtyldy. Tómen jalaqyǵa jumys isteıtinder jaıy da sóz boldy. Endi olardyń jalaqysy kóteriledi. Jalpy, elimiz boıynsha shamamen, 1,5 mıllıon adamnyń eńbekaqysy ósedi», – dedi Darıǵa Nazarbaeva.
