Búgin Túrkistan oblysynyń ákimi Janseıit Túımebaev pen «Turǵyn úı qurylys jınaq banki» AQ-nyń Ońtústik fılıal dırektory Qudaıbergen Seıtmambetovpen kezdesip, «Nurly jer» memlekettik baǵdarlamasymen beriletin kredıttik turǵyn úı qurylysyn damytý máselelerin talqylady dep jazady Qamshy.kz aqparat agenttigi. 

Qos tarap kezdesý kezinde turǵyndarǵa qoljetimdi baspana turǵysynda týyndaǵan keıbir máselelerdi talqylap, sheshý joldaryn qarastyrdy.

Banktiń óńirlik jetekshisi osyǵan deıin atqarylǵan birneshe jumystardy atap ótip, aldaǵy josparlarymen bólisti. Onyń aıtýy boıynsha, qazirgi tańda «Turǵyn úı qurylys jınaq banki» AQ-tyń Ońtústik fılaly «Baspana» atty mekemesimen qol qoıý sharalaryn júrgizip jatyr. Atalmysh banktiń óńirlikjetekshisi Qudaıbergen Seıtmambetov bıylǵy jyldyń 1-shi jeltoqsanynan bastap bank ujymy «7-20-25» baǵdarlamasy boıynsha tıisti jumystardy iske asyra bastaıtynyn atap ótti.

Sonymen birge, Qudaıbergen Seıtmambetov oblys ákimine oblys turǵyndary úshin tıimdi ári yńǵaıly bolatyn usynystardyń baryn aıtyp, qulaǵdar etti.

Onyń aıtýynsha, alǵashqy salymsyz-aq baspanaly bolýǵa bolatyn jobada qarapaıym halyqtyń turmystyń hal-ahýaly basa nazarǵa alynyp, qarastyrylǵan.

Osynaý usynys, tilekterge qanyqqan aımaq basshysy, eń bastysy, baspanalardyń qoljetimdi bolýy qajettigin atap ótti. «7-20-25» baǵdarlamasyn óńirde myqtap qolǵa alý úshin túsindirme jumystaryn keńinen júrgizýdi tıisti basqarma basshylaryna tapsyrdy.

Aıta keteıik, aǵymdaǵy jyly «7-20-25» baǵdarlamasyn oblysta iske asyrý maqsatynda Túrkistan qalasynda qurylys kompanıasy «Túrkistan» ÁKK» AQ-y arqyly 6 kópqabatty turǵyn úıdiń (288 páter, 15,6 myń sh.m.) qurylysyn bastaǵan bolatyn. Bul páterlerdi 2019 jyly paıdalanýǵa tapsyrý josparlanyp, barlyq úılerdi «7-20-25» baǵdarlama arqyly taratý kózdelýde. «7-20-25» baǵdarlamasy arqyly salynǵan turǵyn úılerdi taratý oblystyń Energetıka, turǵyn úı-kommýnaldyq sharýashylyq basqarmasy arqyly júrgiziledi. Sonymen qatar, «Turǵyn úı qurylys jınaq banki» AQ basshylyǵynyń málimetine sáıkes 2019 jyly oblys ortalyǵy - Túrkistan qalasynda banktiń oblystyq fılıaly ashylatyn bolady.