Túrkistan oblysynyń barlyq mektepterine jumys.sitcen.kz portaly arqyly qatardaǵy qyzmetkerler men pedagogtardy jumysqa qabyldaýdyń avtomattandyrylǵan júıesi endirilgen. Atalǵan júıe jalpy orta bilim berý uıymdary pedagogtaryn jumysqa qabyldaýdy jáne mektep dı⁠rektorlaryn konkýrstyq taǵaıyndaý barysyn avtomattandyrady. Sondaı-aq, bilim uıymdaryndaǵy tehnıkalyq qyzmetkerlerdiń bos oryndary jaıly habarlamalar ornalastyrylǵan. Búgin bul týraly Túrkistan oblysynyń óńirlik komýnıkasıalar qyzmetinde ótken brıfıńte bilim basqarmasy basshysynyń orynbasary Ardaq Sadyqova málimdedi.

Onyń aıtýynsha, búgingi kúnge deıin atalǵan elektrondy júıede 1571 pedagog pen tehnıkalyq qyzmetkerdiń bos jumys oryndary týraly habarlama jarıalanǵan. 

«Qazirgi tańda jumys.sitcen.kz portaly arqyly 837 adam jumysqa ornalasqan. Júıege jalpy jumys izdeýshiler tarapynan qyzyǵýshylyq tanytyp, búgingi kúni 62 778 qoldanýshy tirkelip otyr. Sondaı-aq, 4632 jumysqa qabyldaý týraly ótinish kelip túsken. Sonymen qatar, 2019 jyldan bastap daryndy balalarǵa arnalǵan mamandandyrylǵan mektep-ınternattaryna qabyldaý mektep.sitcen.kz  portaly arqyly júzege asyrylatyn bolady. Atalǵan júıede mektepke qabyldaý konkýrsyn ótkizý tolyq avtomattandyrylǵan», - dedi Ardaq Mádihanqyzy.

Aıta keterligi, ata-ana óziniń balasyn portal arqyly kez-kelgen daryndy balalarǵa arnalǵan mektepke konkýrsqa qatystyra alady jáne portaldaǵy onlaın testileýden joǵary bal alǵan bala mektepke qabyldanady.

Sonymen qatar, oblystaǵy mektepter «Bilimland» sıfrlyq bilim berý resýrstarymen 100 paıyz qamtamasyz etilgen. Aǵymdaǵy jyldap bastap kúni búginge deıin 594 000 sabaq qaralymy boldy. Oblystyq búdjetten sıfrlyq bilim berý resýrstarymen qamtamasyz etý maqsatynda 1500 dana «Bilim Book» kompúter-planshet shalǵaı aýyldaǵy 195 mektepke taratylyp, sıfrlyq bilim berý resýrstaryna ınternetsiz qol jetkizýde.

Sondaı-aq, aldaǵy jyly Túrkistan oblysynyń bilim salasynda pedagogtardyń attestasıasyn jáne olardyń bilim jetildirý kýrstarynan ótýin avtomattandyrý, bilim uıymdaryndaǵy kitap qoryn paıdalanýdy jáne oqýshylardyń ystyq tamaqpen qamtylýyn avtomattandyrý júıeleri júzege asady dep josparlanýda.

Atalǵan joba bilim salasyndaǵy sybaılastyq zańbuzýshylyqty toqtatatýǵa úlken serpin beredi.