Túrkıa prezıdenti Rejep Taıyp Erdoǵan Qazaqstanǵa memlekettiń saparynyń aıasynda Túrkistandaǵy iri mádenı-aǵartýshylyq nysandardyń ashylýyna qatysady.

Ústimizdegi jyldyń 17-sáýirinde Túrkistan qalasynda Qoja Ahmet Iassaýı atyndaǵy keshendi meshittiń saltanatty ashylýy bolady. Qulshylyq ordasy túgeldeı Túrik eliniń Din isteri mınıstrliginiń qarjylaı qoldaýymen salynǵan. Qurylys jumystary 2009-jyldyń 16-qazan kúni bastalǵan bolatyn.

Qurylys jumystaryna jalpy mólsheri 10 mln AQSH dollary jumsalǵan. Meshitte bir ýaqytta 3 000-ǵa jýyq adam qulshylyq jasaı alady. Qos el arasyndaǵy baýyrlastyqty nyǵaıtyp, eki el mádenıetin biriktire órilgen meshit qabyrǵalarynan qazaq eliniń dástúrli sáýlet óneri aıqyn kóringen. Meshit qasynda kitaphana jáne zamanaýı asqana zaldary qarastyrylǵan. Sondaı-aq, azanshylar men ımamdarǵa arnalǵan bólmeler, dárisqanalar da bar.

“Óziniń Túrkıa prezıdenti retindegi alǵashqy saparynyń aıasynda Rejep Erdoǵan Astana men Túrkistanǵa barady”, – dedi Qazaqstannyń Túrkıadaǵy elshisi Janseıit Túımebaev.

Sóıtip, Astanada eki el kóshbasshylarynyń qatysýymen joǵary deńgeıli strategıalyq yntymaqtastyq keńesiniń İİ otyrysy ótedi.

“Túrkistanda Túrkıa prezıdenti iri mádenı-aǵartýshylyq nysandardy, sonyń ishinde 15-ke jýyq jylda irgetasy qalanǵan meshittiń ashylýyna qatysady”, – dedi elshi.

Sonymen qatar, M.H. Iassaýı atyndaǵy halyqaralyq qazaq-túrik ýnıversıtetiniń nysandaryn ashý josparlanýda.

“Jalpy alǵanda aldaǵy sapar jáne Qazaqstan men Túrkıa yntymaqtastyǵynyń barlyq sanamalanǵan mysaldary, kúmánsiz, eki aǵaıyn memleket pen halyqtyń ıgiligine qyzmet etedi. Ekijaqty qarym-qatynastar qazirgi tańda strategıalyq bıiktikke kóterilip qana qoımaı, sonymen birge bizdiń respýblıkanyń basqa memlekettermen baılanystarynyń ishinde úlgili oryn alatyndyǵyna degen alǵysharttarǵa ıe”, – dep túıdi Túımebaev.

Eske sala keteıik, 16 sáýir kúni Túrkıa prezıdenti Rejep Erdoǵannyń Qazaqstanǵa memlekettik sapary kútilýde.