Koróldik otbasyǵa jaqyn úsh derekkózdiń agenttikke habarlaýynsha, "ondaǵan hanzada" jáne koróldik otbasynyń basqa da músheleri taq murageri retinde basqa adamdy kórgisi keledi, biraq olar Saýd Arabıasynyń 82 jastaǵy koroli Salman ben Abdel Áziz Ál Saýd tiri kezinde eshqandaı áreket jasamaıdy. Koról "súıikti ulyna" qarsy shyǵa qoımas dep esepteıdi olar.

Derekkózderdiń biriniń málimeti boıynsha, koróldik otbasy Salman koróldiń jalǵyz inisi - 76 jastaǵy Ahmedti qoldaýǵa daıyn. AQSH sheneýnikteri de sony jaqtaǵan.

Buǵan deıin Washington Post gazetiniń óz derekkózine súıenip habarlaýynsha, Ortalyq barlaý basqarmasy Saýd Arabıasynyń taq murageri Muhammed ben Salman Ál Saýd oppozısályq jýrnalıs Jamal Hashoggıdi óltirýge tapsyrma berýi múmkin ekenin anyqtaǵan.

Túrkıa qorǵanys mınıstri Hýlýsı Akardyń málimdeýinshe, Hashoggı denesi bólshektelip, dıplomatıalyq ókildikten chemodandarmen shyǵarylǵan. Konsýldyq qyzmetkerleri buny "dıplomatıalyq mártebesi arqyly" júzege asyrǵan dedi mınıstr.

Saýd jýrnalısi Jamal Hashoggı Saýd Arabıasynyń Stambýldaǵy elshiliginde 2 qazanda óltirildi. Áýeli Er-Rıad jýrnalıs konsýldyqtan shyǵyp ketken dep, úsh aptadan soń ony óltirgenin moıyndady.

​15 qarashada saýd prokýrory jýrnalıs ólimine aıyptalǵan bes adamǵa ólim jazasyn suraıtynyn jarıalady. Sol kúni AQSH jýrnalıs ólimine qatysy bolýy múmkin 17 azamatqa qarsy sanksıa engizdi. Er-Rıad memleket basshylyǵynyń kisi óltirýge qatysy bar degen aıyptaýlardy joqqa shyǵaryp otyr.