Aqtóbeniń ataqty fýtbol klýby jekemenshiktiń qolyna ótti. Atyshýly klýbty Aqtóbe fýtbolynyń ańyzy Samat Smaqov satyp aldy.
Aqtóbe oblysy boıynsha jekeshelendirý nysandarynyń tizimine toǵyz komýnaldy jekemenshik nysany kirdi, onyń ishinde «Aqtóbe» fýtbol klýby da bar. Eldegi barlyq fýtbol klýby jekeshelendirýge jatady.
«Aqtóbe» fýtbol klýbynyń elektrondy saýdasy úsh ret ótkizilgen. 2018 jyly 20 qarashada ótken saýda-sattyqtyń nátıjesi boıynsha Smaqov Samat Kabıruly jeńimpaz atandy. Aıta ketý kerek, ol úshinshi saýda-sattyqtyń jalǵyz qatysýshysy bolatyn. Klýb senimdi basqarmaǵa keıin satyp alý quqyǵymen jeti jylǵa berildi. Kelisim 108 mln teńgeni qurady. Kelisimniń sharty klýb qyzmetiniń profıli men áreket etýshi qyzmetkerler quramynyń kem degende 75%-yn saqtaý bolyp tabylady. Senimdi basqarý kezeńinde qaıta satýǵa, kepilge berýge jáne nysanǵa, sonyń ishinde jyljymaly jáne jyljymaıtyn múlikke qatysty basqa da áreketterge tyıym salynady. Budan basqa, jańa qojaıyn klýbtyń Premer-Lıganyń klýbtarǵa qoıatyn tártipterine sáıkes barlyq mindetti týrnırler men jarystarǵa qatysýyn qamtamasyz etýi, sonymen qatar, balalar fýtbolyn, sonyń ishinde oblys aýdandarynda damytýy kerek. Jekeshelendirý menedjement sapasy men klýbty basqarý tıimdiligin kóterýge, búdjetke túsetin salmaqty tómendetýge, jeke ınvestısıalardy tartýǵa, sonymen qatar, óńirdegi fýtbol ınfraqurylymyn jaqsartýǵa múmkindik beredi dep kútilip otyr.
