Nurlan Abdýllın — tanymal ánshi, prodúser, shoýmen, QR eńbegi sińgen qaıratkeri ǵana emes, qarjy áleminde baǵy janǵan bıznesmen. Onyń resmı túrde «AG Studio» jáne «Nort-A» JSHS-de úlesi bar. Oǵan qosa, Abdýllın myrza «Intelektýaldyq quqyq qorǵaý qoǵamynyń» negizin salýshylardyń biri.

«AG Studio» kompanıasyn ol 36-jasar belgili kompozıtor Rınat Gaısınmen birge basqarady. Resmı derekterge súıensek, atalǵan fırma, saýda salasyna tartylǵan. Al «Nort-A» kompanıasy konsert baǵytynda jumys jasaıdy. Nurlan Abdýllın men Rınat Gaısınnen bólek seriktester qatarynda Olga German men Tólegen Muhamedjanov bar.

Tólegen Muhamedjanovtyń esimi de kópke tanys. Aqyn, sımfonıa, opera men kameralyq shyǵarmalardyń,sonymen qatar kınofılmderdegi áýenderdiń avtory. «Nevada-Semeı» qoǵamdyq qozǵalysynyń belsendi múshesi. QR Parlament senatynyń eks-depýtaty.

Al, Nurlan Abdýllın 1964 jyly 6 qyrkúıekte dúnıege keldi. Sáýlet-qurylys ınstıtýtynyń túlegi eńbek jolyn mektepte, dene tárbıesi muǵalimi bolyp bastaǵan. Búginde «Paryz» qaıyrymdylyq qory men «Ala» shyǵarmashylyq birlestigin basqarady. «Qazaqmys» korporasıasy prezıdentiniń mádenıet jóninde keńesshisi, sonymen qatar «Dýet KZ » Magic of Nomads mýzykalyq jobalarynyń avtory. Kóptegen telearnalarda arnaıy jobalardy júrgizdi, jarnamaǵa tústi. Forbes.kz-tiń 2014 jylǵy málimetine sáıkes shoý-bıznes jáne sport ókilderiniń 25-tiginde 19-orynǵa turaqtaǵan. Iaǵnı, bir jyldyq kirisiniń baǵasy – 1,9 mln dollar.

Jaqynda Almatyda mereıtoı-konsertin ótkizgen Nurlan Abdýllın endi Máskeýde jumys istemek. Reseı prodúserleri qazaq ánshisimen iskerlik qarym qatynas ornatýǵa nıet bildirip otyr.