Keshe elimizdiń ǵashyqtary Qozy Kórpesh-Baıan Sulý kúnin atap ótti.  2011 jyly Almaty qalasy ákimdiginiń jastar saıasaty basqarmasy 15 sáýirdi osyndaı ataýly kún dep belgilegen bolatyn.

Sodan beri  qazaq jastary birtindep áýlıe Valentın kúninen bas tartyp, ulttyq merekeni ulyqtaı bastady dep habarlaıdy Jetinshi arna.

Áleýmettik jelidegi jurt ádettegideı emes, merekelik kúımen oıanǵan.  Sebebi ǵalamtor betin Qozy men Baıannyń, Qyz Jibek pen Tólegenniń, búgingi ǵashyqtardyń sýretteri men quttyqtaýlar torlady.

Aǵa býyn, jastardyń Áýlıe Valentınnen aýlaq ketkenine qýandy. Al Almatyda ǵashyqtarǵa arnalǵan sý burqaq ashyldy. Dál osy sátte ulttyq degen merekege qýanǵan jastardyń kóńiline kirbiń tústi.

Óıtkeni sýburqaqtyń ortasyndaǵy sáýkele kıgen qazaqtyń qyzy Baıan da emes, Jibek te emes, qaı ertegiden shyqqany belgisiz  sý perisi bolyp shyqty.

Baıan Esentaeva Instagram-daǵy paraqshasyna sý burqaqtyń ashylý saltanatynan arnaıy vıdeo  salǵan bolatyn. Óz kezeginde bul beınege qatysty ultjandy jastar renishke toly pikirler jazdy.

“Kózime sene alar emespin, sáýkele qaıda, rýsalka qaıda? Qozy men Baıannyń oǵan qatysy qansha?”, “Qazaqtyń ertegilerinde sý perileri bar delik. Biraq olar mahabbat sımvoly emes, kerisinshe, adamdardy azǵyratyn jaǵymsyz keıipker edi ǵoı”, – degen pikirler kóbeıe bastaǵan.

Odan bólek, tanymal ánshi Sáken Maıǵazıev te atalǵan eskertkishi kóńili tolmaıtynyn jetkizdi.

“Boıaýshy, boıaýshy degen saıyn saqalyna deıin boıap tastapty…”- keri kelipti.  Mynaý ne “fantazıasy”, taǵy?! Almatynyń kórnekti oryndarynyń birine ornatqan Baıan-sulý eskertkishi-mys. Sáýkele kıip, kindigin ashqan sý perisi. Sumdyq-aı!”, – dep jazady ánshi óz paraqshasynda.