Qazaqstanda 16 jastaǵy qyzdarǵa túsik jasatýǵa zańmen ruqsat etilýi múmkin dep jazady Qamshy.kz aqparat agenttigi KTK telearnasynyń deregin negizge alyp. 

Qazirgi zańnama boıynsha kámeletke tolmaǵan qyzdarǵa medısınalyq kómek kórsetý úshin ata-anasynyń nemese zańdy ókiliniń kelisimi mindetti túrde kerek.

Densaýlyq saqtaý mınıstrligi qyz balalarǵa 16 jastan bastap ata-anasynyń kelisimin almaı-aq, jasandy túsik jasata berýdi zańǵa engizgisi kelip otyr. 

Qazirgi zańnama boıynsha kámeletke tolmaǵan qyz balalarǵa medısınalyq kómek kórsetý úshin ata-anasynyń nemese zańdy ókiliniń kelisimi mindetti túrde kerek. Densaýlyq saqtaý mınıstrligi osyny kedergi dep, zańnan alyp tastaǵysy keledi.

"Jasóspirimder 16 jastan bastap óz betinshe sheshim qabyldaıtyn bolady. Bul álemde bar tájirıbe. Qazir aıaqasty bala kóterip qalǵan qyzdar kóbeıip barady. Al osy zań júktiliktiń erte kezeńinde tıisti medısınalyq kómek alýǵa múmkindik beredi", — deıdi densaýlyq saqtaý vıse-mınıstri Lázzat Aqtaeva.  

Iaǵnı, qyz bala óz betinshe sheshim qabyldaıdy da, oǵan ata-anasy nemese zańdy ókili aralaspaıdy. Dárigerler de jasandy túsik jasaý úshin úlkenderden ruqsat surap jatpaıdy. Adam óz taǵdyryn ózi sheshetin bolsa da, mundaı jaǵdaı jasóspirimderdiń tanym-túsinigine tym aýyr, deıdi psıhologtar. 

"Kishkentaı qyzdardy túsikke aparý tyǵyryqtan shyǵýdyń joly emes. Barlyq mektepke baryp, sol qyz balalarmen, jigittermen sóılesý kerek. Jynystyq saýatyn ashýymyz qajet", — deıdi psıholog Ásıa Mámbetalına.

Resmı derekterge qarasaq, erte jastan júkti bolǵan qyzdar azaımaı otyr. Byltyrdyń ózinde olardyń sany úsh jarym myńǵa jetip qalǵan. Áıtse de zańǵa engizýge usynylǵan bul ózgerister aldaǵy ýaqytta qoǵam talqysyna túsýi kerek. Al ázirge elimizde aıaǵy aýyr jas qyzdardyń jaǵdaıyna bolysatyn 105 jastar densaýlyǵy ortalyǵy jumys isteıdi.