Aqtaý qalasyndaǵy lıft sharýashylyǵynyń jaǵdaıy týraly Mańǵystaý oblysy ákiminiń apparat jıynynda qala ákimi Ǵalymjan Nıazov baıandady.

Onyń aıtýynsha, Aqtaý qalasynyń eski turǵyn-úı qorynda, ıaǵnı 2002 jylǵa deıin salynǵan 174 úıde 337 lıft bar. Standartqa sáıkes jolaýshy tasıtyn lıftilerdiń jumys jasaý merzimi 25 jyl bolyp belgilenip, sodan keıin olar jańǵyrylýy nemese paıdalanýdan shyǵarylýy tıis. Qaladaǵy alǵashqy toǵyz qabatty turǵyn úıler 1968 jyldan bastap salynǵanyn eskersek, sol úılerdegi lıftilerge búgingi tańda 50 jyl bolǵan.

«Eski turǵyn úı qoryndaǵy 174 úıde bir lıftiden jumys istep turý úshin Aqtaý qalasynyń ákimdigi 2014-2018 jyldarǵa 108 lıftini aýystyrýǵa jospar jasaǵan bolatyn. Osyǵan baılanysty jumystar júrgizilip, memlekettik búdjetten qarjy bólinip, 2014 jyly – 23 lıft, 2015 jyly – 24 lıft, 2016 jyly – 48 lıft, 2017 jyly – 33 lıft aýystyryldy. Osy kezeńde jumys isteý merzimi bitken, aýystyrý kestesine kirmegen 20 lıft qosymsha aýystyrylyp, barlyǵy 128 lıft aýystyryldy. 2019-2020 jyldary birinshi kezekte aýystyrylýdy qajet etetin lıftilerdi búdjet esebinen aýystyrýdy josparlap otyrmyz. Bir lıftiniń baǵasy shamamen 7-8 mln. teńge», - dedi qala ákimi.