Mańǵystaý oblysy ákiminiń apparat jıynynda Tilderdi damytý, muraǵattar jáne qujattama basqarmasynyń basshysy Tóleýǵalıeva Gúlzaıda osylaı dedi.

Ol Qazaqstan Respýblıkasyndaǵy tilderdi damytý men qoldanýdyń 2011-2019 jyldarǵa arnalǵan memlekettik baǵdarlamasynyń 3-kezeńi iske asyrylyp jatqanyn jetkizdi.

«Oblystaǵy memlekettik tildi meńgergen turǵyndardyń úlesi – 97,7%. Úsh tildi ilgeriletý aıasynda memlekettik qyzmetshilerge tegin kýrstar uıymdastyrylyp, oǵan memlekettik organdardan 405 adam qatysqan. Memlekettik tildegi qujat aınalymyna júrgizilgen monıtorıń 2018 jyldyń 10 aıy boıynsha – 99,2%-dy qurady. Buqaralyq aqparat quraldaryndaǵy qazaq tildi kontenttiń úlesi 99,5%», - dedi Gúlzaıda Tóleýǵalıeva.

Sondaı-aq jıynda ońaltý jáne bankrottyq rásimderin jetildirý máseleleri týraly Mańǵystaý oblysy boıynsha memlekettik kirister departamentiniń basshysynyń orynbasary Jansulý Babaeva baıandama jasady. 2018 jyldyń on aıyndaǵy málimet boıynsha aımaqtaǵy salyq bereshegi 42 488,3 mln. teńgeni qurady. 3,325,0 mln. teńge esebin quraıtyn 720 boryshkerge jeke múlikterine túgendeý aktileri jasaldy. Jalpy somasy 587,0 mln. teńge quraıtyn 82 materıal «KRÝA» AQ-na satylymǵa shyǵarý úshin berildi. İstelgen sharalardyń nátıjesinde búdjetke 810,0 mln. teńge tústi. Salyq kodeksine sáıkes, 1 502,5 mln. tenge salyq bereshegi bar 20 salyq tóleýshilerge salyqty tóleý merzimi uzartylǵan.