Osy apta ishinde Gollıvýdta Amerıka kıno óneri juldyzdarynyń qatysýymen mártebeli «MTV Movie Awards» kıno syılyǵyn tabys etý sharasy ótti. Aıta keterligi, bul syılyq ıegerleri halyqtyń daýys berýi nátıjesinde irikteledi. Munan bólek, beısenbi kúni «Time» jýrnaly álemdegi eń bedeldi 100 adamnyń tizimin jarıa etken bolatyn.
«MTV Movie Awards» syılyǵy tabystaldy
Aǵymdaǵy jyly eń úzdik fılm mártebesi «Juldyzdar kináli» melodramasyna berildi. Sheılın Výdlı úzdik aktrısa atansa, bul atalymda erler arasynda «Mergen» atty áskerı dramada basty rólde oınaǵan Bredlı Kýperge teń keler eshkim bolmady.
Jeksenbi kúni keshkisin Gollıvýdtyń Nokia Theatre kınoteatrynda 24-shi «MTV Movie Awards 2015» kıno syılyǵyn tabystaý saltanatty sharasy ótti. Sharaǵa qazirgi zamanǵy eń úzdik ári tanymal Skarlett Iohansson, Djenıfer Lopes, Mark Rýffalo, Kara Delvın syndy kóptegen kıno juldyzdary qatysty.
Bul syılyqtyń túbegeıli ereksheligi jeńimpazdy irikteý júıesinde desek te bolady. «Oskar» syılyǵymen salystyrǵanda úmitkerlerdiń taǵdyryn kınoakademıa tóreshileriniń músheleri emes, MTV-diń resmı saıtyndaǵy daýys berýge qatysqan kórermender sheshedi.
Keshti amerıkandyq senarıshi, prodúser ári aktrısa Emı Shýmer júrgizdi. Ádettegideı jeńimpazdar pop-korn salynǵan shelek túrindegi músinshelerge ıe boldy. «Jyl fılmi» atty mártebeli atalym boıynsha basty syılyq osy joly «Juldyzdar kináli» atty jastar dramasyna berildi. Jazylmas dertke dýshar bolǵan eki jastyń qarym-qatynasy jaıynda syr shertetin bul týyndyny rejıser Djosh Býn túsirgen. Fılm ózegine 2012 jyly jaryq kórgen amerıkandyq qalamger Djon Grınniń fılmmen attas romany túrtki bolǵan.
Dál osy fılmde bas rólde oınaǵan Sheılın Výdlı «Úzdik áıel róli» atalymyndaǵy syılyqqa ıe boldy. Sonymen qatar MTV-niń súıikti aktrısasyna aınalǵan ol atalǵan fılmde Ensel Elgortpen jaqsy súıiskeni úshin pop-korn salynǵan shelekke jáne «MTV Trailblazer Award»-tyń erekshe syılyǵyna ıe boldy.
Rejıser Klınt Istvýdtyń «Mergen» týyndysynda basty róldi somdaǵan Bredlı Kýper úzdik akter atandy. Fılm lańkesterdiń janalǵyshyna aınalǵan AQSH armıasynyń mergeni Krıs Kaıldiń dramalyq ómirinen syr shertedi.
«Ormanǵa boılaı engende» múzıklinde jalmaýyzdyń rólin oınaǵan Merıl Strıpke «Úzdik mystan» syılyǵy tabystaldy. Al «Macho men botan - 2» týyndysyna túsken Chennıng Tatým «Úzdik komedıalyq ról» syılyǵyn aldy.
«Qatty qorqytý» stılindegi úzdik róli úshin syılyǵy «Tabynýshy» atty erotıkalyq trıllerde muǵalimniń rólin somdaǵan Djennıfer Lopeske buıyrdy.
«Kórshiler. Soǵys soqpaǵynda» fılmi «Úzdik dýet» (Zak Efron men Deıv Franko), «Úzdik WTF-sáti» (Set Rogen men Roýz Bırn) jáne «Maıkasyz úzdik shyǵý» (Zak Efron) sanattarynda 3 syılyqqa ıe boldy.
«Time» jýrnalynyń nusqasy boıynsha eń yqpaldy adamdardyń Top-100
Beısenbi kúni amerıkandyq «Time» jýrnalynyń redaksıasy ǵalamshardyń eń yqpaldy júz adamynyń reıtıńin túzgen bolatyn. Atalǵan tizimge ádette kórnekti saıasatkerler men memleket qaıratkerleri, sportshylar men óner adamdary kiredi. Bul tizim sońǵy 16 jyl boıy jasalyp kele jatyr. Ol «alpaýyttar», «kóshbasshylar», «pıonerler», «ártister» jáne «ıkona» atty 5 sanattan turady ári olardyń árqaısysyna 20 adamnan kiredi. İrikteý basylymnyń saıtynda daýys berý arqyly júrgizilgenimen sońǵy sheshimdi basym redaksıasy jasaıdy.
Saýalnama nátıjesine oraı basylym qyzmetkerleri 5 nómir daıyndady. Jýrnaldyń syrtqy muqabasyna Kane Ýest («alyptar»), jýrnalıs Horhe Ramos («kóshbasshylar»), balerına Mıstı Koplend («pıonerler»), Bredlı Kýper («ártister») jáne sýdıa Rýt Beıder Gınzbýrgtiń («ıkona») sýreti basyldy.
11 sáýirde aıaqtalǵan jýrnal oqyrmandarynyń daýys berýi nátıjesinde ǵalamshardyń eń yqpaldy bastapqy on adamnyń tizimine Reseı prezıdenti Vladımır Pýtın, rep-ánshisi Lı Che Rın, Ledı Gaga, Rıanna, Teılor Svıft, Emma Ýotson, Dalaı-lama, pákistandyq quqyq qorǵaýshy Malala Iýsýfzaı, Beıonse jáne Rım papasy Fransısk kirdi.
Aǵymdaǵy jyly ǵalamshardyń yqpaldy adamdarynyń júzdigine 40 áıel kirip otyr. Olardyń ishinde barsha álemdegi áıelderdiń bilim alýǵa qoljetimdiligin jaqtap júrgen pákistandyq quqyq qorǵaýshy 17 jastaǵy Malala Iýsýfzaı bar. Ol bul tizimdegi eń jas yqpaldy adam bolyp tur. «Time» jýrnalynyń Top-100-diginiń laýreaty atanǵan eń qart adam 88 jastaǵy Týnıs prezıdenti - Bedjı Saıd Essebsı.
Amerıkandyq jýrnal álemniń eń yqpaldy 100 adamynyń tizimin alǵash ret 1999 jyly jarıa etken bolatyn. Ol kezde bul tizilim 20 ǵasyrdyń eń yqpaldy adamdaryna arnalǵan edi. Sol ýaqytta beri basylym jyl saıyn bul tizimdi túzip, jarıa etip keledi.
