«Mımıno» kınosy úshin 1978 jyly SSRO-nyń Memlekettik syılyǵyn, 1980 jyly Grýzıanyń halyq ártisi atanǵan Vahtang Kıkabıdze buǵan deıin Keńes odaǵynyń ánurany men eltańbasyn jáne oraq pen balǵa belgisin jek kóretinin aıtqan. Tanymal ártistiń bul málimdemesi talaıdy tańqaldyrǵany da ras. Óıtkeni bar ataqty ol SSRO kezinde aldy, elge tanyldy. Keńes Odaǵynyń barlyq aýmaǵynda gastróldik saparda júrdi, jegeni aldynda, jemegeni artynda boldy. Alaıda postkeńestik elder táýelsizdik alǵannan keıin ár akter óz elinde ómir súrdi. Burynǵydaı baılanys ta damymaı qaldy. Ásirese Reseıde dańqy asqan Vahtang Kıkabıdzeniń Pýtınniń memleketine aıaq baspaǵanyna on jyldan asqan eken.
–«Pýtın men Medvedev el basqyryp otyrǵanda men Reseıge eshqqashan barmaımyn» dep málimdeme jasaǵan Vahtang Kıkabıdze shyn máninde osy kúnge deıin orys jerine aıaq basqan joq. Munyń sebebi nede?
2008 jyly grýzın-osetın jáne Grýzıa men Abhazıa arasynda teketires bastalǵanda, bul daýǵa resmı Máskeýdiń tikeleı aralasqany belgili. Sodan beri eki el arasynda dıplomatıalyq qatynas toqtady. Buǵan narazylyq retinde Vahtang Kıkabıdze «Reseıge aıaq baspaımyn» dep óziniń narazylyǵyn da bildirgen. Qazir de resmı Máskeý Grýzıa quramyndaǵy Ońtústik Osetıa men Abhazıaǵa barynsha qoldaý kórsetip otyr.
Biraq keshe orystyń birqatar aqparat quraldary habarlama taratyp, Kıkabıdzeniń Reseıge jasyryn kelip qaıtqanyn málim etken. «Sankt-Peterbýrgtyń «Shalápın» meımanhanasynda 40 mınýt án salyp, 40 myń eýro aldy» degen aqparatqa ataqty ártis ne deıdi? Bul qanshalyqty aqıqat?
–Bul – ótirik. Men 2008 jyldan beri Reseıdiń birde bir qalasynda bolǵan joqpyn. Odan beri on jyl ótti. Ázir barmaıtyn da shyǵarmyn», –dep málim etti Vahtang Kıkabıdze.
