Aqtóbede Qazaqstan Respýblıkasynyń Tuńǵysh Prezıdenti kúnine arnalǵan «Máńgiligin mánerlegen - Elbasy» merekelik sharasy ótti. Shara aıasynda Prezıdenttiń ómir joly men saıası ómirbaıanynyń negizgi kezeńderi teatrlandyrylǵan-konsert túrinde kórsetildi.
Saltanatty sharaǵa oblys ákimi Berdibek Saparbaev, Olımpıada chempıony Jaqsylyq Úshkempirov, Qazaqstannyń qoǵam qaıratkerleri men jýrnalıser, máslıhat depýtattary, ardagerler, qoǵam, partıa, kásiporyndar, mekeme ókilderi jáne t.b. qatysty.
Oblys ákimi quttyqtaý sózinde Qazaqstannyń barlyq jetistigi Elbasy Nursultan Ábishuly Nazarbaevtyń esimimen tikeleı baılanysty ekenin atap ótti.
- Qurmetti qonaqtar, qurmetti jerlester! 27 jyl buryn qazaqstandyqtar alǵash ret tuńǵysh Prezıdentterin saılady. Osy 27 jyldyń ishinde biz kóptegen qıyndyqtardy, daǵdarysty bastan ótkerip, beıbitshilik pen kelisimdi saqtap qaldyq, ekonomıkalyq damýda teńdessiz umtylys jasap, álemdegi básekege qabiletti elý eldiń qataryna endik, azamattardyń áleýmettik jaǵdaıyn qamtamasyz ettik. Búginde bizdiń el dúnıe júzine tanymal, halyqaralyq arenada bedeldi, eń bastysy – kópultty Qazaqstanda beıbitshilik, birlik pen kelisim bar. Osynyń bári memleket basshysy Nursultan Ábishuly Nazarbaevtyń kóregen ishki jáne syrtqy saıasatynyń, úzdiksiz eńbeginiń, bedeliniń arqasy,-dedi Berdibek Saparbaev quttyqtaý sózinde.
- Biz, aqtóbelikter Prezıdent saıasatyn árqashan qoldaımyz, onyń tapsyrmalaryn oryndaımyz. Oǵan memleket basshysynyń bizdiń oblysqa jýyrda jasaǵan jumys saparynda aqtóbelikterge bergen joǵary baǵasy dálel. Biz árqashan bir bolýymyz kerek, eger árqaısysymyz el bolashaǵyna óz úlesimizdi qosatyn bolsaq, Nursultan Ábishuly Nazarbaevtyń basshylyǵymen odan da zor tabysqa jetetin bolamyz. Barlyǵyńyzdy osy úlken merekemen quttyqtaımyn. Árqaısysyńyzǵa myqty densaýlyq, úılerińizge amandyq tileımin, elimizde beıbitshilik pen kelisim bolsyn, Prezıdentimiz basqaryp otyrǵan gúldengen Qazaqstanymyzdyń memlekettik týy maqtanyshpen jelbiresin,-dep jalǵastyrdy oblys ákimi.
Shara kezinde Qazaqstannyń Tuńǵysh Prezıdentiniń atyna jyly lebizder men súıiýti ánder aıtyldy.
Budan basqa, «Jomart júrek» syılyǵynyń oblystyq kezeńiniń jeńimpazdary atanǵan oblys mesenattary marapattaldy. Olardyń barlyǵy da óńir halqyna kómek kórsetip, osynda iri qaıyrymdylyq jobalaryn júzege asyrǵan. Osylaısha, bilim, mádenıet jáne áleýmettik salalardy damytýǵa úles qosyp, ómirde qıyndyqqa tap bolǵan otbasylarǵa qaıyrymdylyq kómek kórsetkeni úshin Talǵat Salfıkov «Jyl mesenaty» atandy. «Jyl adamy» atalymyna Áıteke bı aýdanynyń Qarabulaq aýylynda birqatar sporttyq jáne áleýmettik nysandar salǵan jáne jóndeý júrgizgen Qaırat Qoılybaev ıe boldy. Jetim balalarǵa jáne turmysy tómen otbasylardyń balalaryna kómek kórsetip, ınklúzıvti ortany qurýǵa úles qosqany úshin «Qazaqstannyń halyq banki» AQ oblystyq fılıaly «Úzdik jyl mekemesi» atandy. Budan ózge, eriktiler qozǵalysyn, bilim salasyn, týǵan jerin, qaıyrymdylyq mádenıeti men mesenattyqty damytýǵa qosqan úlesi úshin Edil Aımaǵambetov, Jansen Kereev, Baýyrjan Qondybaev, Tımýr Ámınov, Qarjaýbaı Álıqulov jáne Asqat Qabıev «Jomart júrek» jobasynyń túrli atalymdarynyń laýreattary atandy. Oblystyń barlyq eldi mekenderinde Tuńǵysh Prezıdent kúnine arnalǵan 700 mádenı-buqaralyq, sporttyq merekelik sharalar ótip jatyr, sonyń jetpisi aýqymdy deńgeıde. Berdibek Saparbaev Aqtóbe oblysyndaǵy shalǵaı aýyldardyń halqyn Tuńǵysh Prezıdent kúnimen quttyqtady
QR Tuńǵysh Prezıdenti kúni Aqtóbe oblysynyń ákimi Berdibek Saparbaev jumys babymen Baıǵanın aýdanynda bolyp, oblys ortalyǵynan shalǵaı jatqan aýyldarǵa bardy, olardyń damýymen, jańa nysandardyń qurylysymen jáne aýyl halqynyń turmysymen tanysty.
Berdibek Saparbaev ertemen Aqtóbeden 370 shaqyrym jerde ornalasqan Jarqamys aýylyna keldi. Aýyl bıyl ortalyqtandyrylǵan aýyz sýmen jabdyqtaý júıesimen qamtylǵan bolatyn. Bul maqsatqa memleket 230 mln teńgeden astam qarajat bóldi. Qurylys 2017 jyly tamyzda bastalyp, osy jyldyń qazan aıynda aıaqtaldy. Oblys ákimi sorǵylaý beketin, uńǵymany, elektrmen jabdyqtaýdyń avtonomdy júıesin qarap shyqty.
Baıǵanın aýylynda 24 eldi mekenniń ony ortalyqtandyrylǵan aýyz sýmen qamtylǵan. Aıta ketý kerek, bes aýylǵa bıyl sýmen jabdyqtaý júıesi júrgizildi, bul Mıaly, Oımaýyt, Kemershı, Ebeıti jáne Jarqamys aýyldary.
Aýdanda sapaly aýyz sýmen qamtýmen qatar, gazdandyrý jumystary da belsendi júrgizilip jatyr. Osy jyly Kemershi, Bulaqtykól, Jańatań, Jarly aýyldarynda gaz júıeleriniń qurylysy bastaldy.
Keıin oblys ákimi jańadan ashylǵan «Botaqan» balabaqshasyna bardy. Mektepke deıingi mekeme memlekettik tapsyrys aıasynda jumys jasaıdy jáne osy jyldyń qyrkúıek aıynda alǵashqy tárbıelenýshilerin
qabyldady. Mektepke deıingi mekemeniń barlyq standarttaryna saı jabdyqtalǵan jańa keń ǵımarat aýyldaǵy kóne shaǵyn ortalyqty jabýǵa múmkindik berdi. Aıta keteıik, búginde Baıǵanın aýdany oblystyń basqa da aýdandary sekildi balabaqshamen 100 % qamtylǵan.
Oblys ákimi sondaı-aq, Samruk KazynaTrust áleýmettik jobalardy damytý qorynyń «Meniń elim» baǵdarlamasy aıasynda salǵan balalar oıyn alańyn qarap shyqty. Munda balalar úshin vorkaýtpen aınalysatyn, jazda fýtbol - qysta hokeı oınaıtyn alań bar, balalar alańy ornatyldy. Joba quny 58 mln teńge. Samruk KazynaTrust osyndaı alańdy bıyl Qaraýylkeldi aýylyna da salǵan.
Jarqamystaǵy sapar 150 oryndyq jańa mádenıet úıiniń saltanatty ashylýyna qatysýmen aıaqtaldy. Ǵımarat aýdan búdjetine turǵyzylǵan. Jobany júzege asyrýǵa barlyǵy 86 mln teńge salyndy. Mádenıet úıinde oblys ákimi aýyl turǵyndarymen áńgimelesip, Tuńǵysh Prezıdent merekesimen quttyqtady.
- Sizder Elbasynyń aýyldardy damytýǵa qanshalyqty kóńil bólip jatqanyn bilesizder. Prezıdent jýyrdaǵy Joldaýynda «Aýyl – el besigi» arnaıy jobasynyń bastalǵanyn jarıalady. Sonyń aıasynda aýyldyq aýmaqtardyń áleýmettik ortasyn jańǵyrtý tapsyrmalary berildi. Memleket bir ǵana Jarqamys aýylyn damytýǵa 500 mıllıon teńge bóldi. Sonyń arqasynda aýyl sýmen qamtyldy, gaz ben jaryq bar. Endi bári sizderge baılanysty. Januıalaryńyz ben týǵan aýyldaryńyzdyń ıgiligi úshin eńbektenińizder, balalaryńyzdy eńbekke, ádeptilikke úıretińizder. Eńbek pen joǵary ıntellektýaldy, rýhanı baı qoǵam – bolashaq urpaqtyń ıgiligi men el kelesheginiń kepili. Búgin men sizderdi Tuńǵysh Prezıdent kúnimen, sonymen qatar mádenıet úıiniń ashylýymen quttyqtaımyn. Myqty densaýlyq, otbastaryńyzǵa bereke, elimizde beıbitshilik pen kelisim bolsyn dep tileımin,-dedi Berdibek Saparbaev.
Burynǵy mádenıet úıi 1957 jyly salynǵan, al bes jyl buryn ǵımarat apatty jaǵdaıda dep tanyldy. Saldarynan balalardyń barlyq úıirmesi mektepte ótti. Aýyl turǵyndary byltyr bılikten jańa mádenıet úıin suraǵan bolatyn. Jańa mádenıet úıinde endigi bımen, sýret salýmen, qoldanbaly ónermen jáne t.b. aınalysatyn kabınetter bar. Júzge jýyq bala úıirmege baratyn bolady.
Baıǵanın aýdanyndaǵy jumys sapary Qojasaı ken ornynda jalǵasty. Munda oblys ákimi quny 42 mlrd teńge bolatyn Gas Processing Company JSHS-niń gaz óńdeý keshenin paıdalanýǵa berý úshin daıyndyq barysyn tekserdi. Kásiporyn jyl saıyn 350 mln tekshe metr ilespe gaz óńdep, ony qurǵaq taýarly gazǵa, gazdy kúkirtke, propanbýtan qospasyna aınaldyrady. Qurylys kezinde 1500 adam jumyspen qamtyldy, paıdalanýǵa berilgen soń 250 adam turaqty jumysqa ornalasady.
Mereke aıasynda «Táýelsizdik jáne Tuńǵysh Prezıdent» kitap kórmesi men «Ult tiregi — Elbasy» fotokórmesi ashyldy.
«Kórmede kitaphana qoryndaǵy Prezıdent Nazarbaevtyń Qazaqstan týraly, táýelsizdik jyldaryndaǵy jetistikter týraly kitaptary kórermen nazaryna usynylyp otyr. Elbasynyń taǵdyry Qazaqstannyń jáne Táýelsizdiktiń taǵdyrymen tikeleı baılanysty. Odan bólek, Nazarbaevtyń bos ýaqytynda súıip oqıtyn kitaptary da qoıyldy. Fılosof Senekadan Elbasy jıi dáıeksóz keltiredi. Súıikti avtorlar tiziminde Abaı Qunanbaıuly, Sáken Seıfýllınder bar», — dedi QR Ulttyq akademıalyq kitaphanasy dırektorynyń orynbasary Álıa Qojabekova.
«Ult tiregi — Elbasy» fotokórmesinde «Kazahstanskaıa pravda» gazetiniń fototilshisi Igor Býrgandınovtyń, «Aıqyn» gazetiniń fototilshisi Aıtjan Myrzanovtyń, «Lıter» gazetiniń fototilshisi Sovetbek Maǵzumovtyń, «Delovoı Kazahstan» gazetiniń fototilshisi Talǵat Ǵalymovtyń jumystary qoıyldy.
«Elbasy Nursultan Nazarbaevtyń 1997 jyldan beri túsirip kele jatyrmyn. Ózim ár jyldary «QazAqparat» agenttiginde, «Stolıchnoe obozrenıe» gazetinde, «Qazaqstan temirjolshysy», «Stolıchnaıa jızn», «Aıqyn» basylymdarynda jumys istedim. Jumys barysynda Prezıdentti túsirgen sýretterim kóp. Solardyń arasynan eń úzdik 8 sýretimdi iriktep, búgingi kórmege qoıdy. Jas fototilshilerge aıtarym, bedeldi adamdar qatysatyn sharalarda ýaqyt óte tyǵyz bolady. Sol az ýaqytta momentti túsirip úlgerý kerek. Kadrda adamdardyń kózqarasy jáne kúlip turǵany mańyzdy. Jaryqtyń durys túsýin de qadaǵalaý kerek», — dep keńes berdi Aıtjan Myrzanov.
Aıta keteıik, bıyl Qazaqstan halqy jetinshi ret Respýblıkamyzdyń Tuńǵysh Prezıdenti kúnin atap ótedi. 2011 jyldyń 10 jeltoqsanynda QR Parlamenti Senaty depýtattarynyń bastamasymen 1 jeltoqsan — Qazaqstan Respýblıkasynyń Tuńǵysh Prezıdenti Kúni dep belgilendi.
