Aqtóbe oblysynyń Mártók aýdanynda «Bastaý» jobasy boıynsha bilim alǵan túlekterdiń alǵashqy sleti ótkizildi. Jıynǵa jobany bıyl jáne aldyńǵy jylǵy túlekteri, aýdan ákimdiginiń, «Atameken» kásipkerler palatasynyń, qarjy ınstıtýttarynyń ókilderi jáne jergilikti turǵyndar qatysty.
Sletti aýdan ákiminiń orynbasary Bekbolat Sársenbaev ashyp, jobanyń óńir ekonomıkasyn damytýdaǵy mańyzyn atap ótti. Sharany uıymdastyrýshylar «Bastaý» jobasy boıynsha kásipkerlik bilim alǵan túlekterdiń bir-birimen tanysyp, tájirıbe almasýyn maqsat tutqan.
-«Bastaý» - eń aldymen aýyl turǵyndarynyń áleýmettik belsendiligin arttyrý úshin jasalǵan joba. Búgingi kúni baǵdarlama alǵashqy nátıjelerin bere bastady. Joba boıynsha oqýdan ótip, kásip ashqan jandardyń qatary kóbeıip keledi. Bıyl Mártók aýdany jospardy artyǵymen oryndap, aldyńǵy qatardan kórinip otyr. Baǵdarlama túlekterine «Bastaý» jobasynyń múmkindikterine senim bildirgenderi úshin alǵys aıta otyryp, olardyń bıznes jobalaryna ári qaraı da qoldaý bildire beretinimizdi aıtqym keledi,-dedi «Atameken» kásipkerler palatasy dırektorynyń orynbasary Jańaaıym Kelbatyrova.
«Bastaý» jobasy aıasynda oblysta bıyl 2 231 adam kásipkerlik negizderin oqyp, onyń 460-sy qarjy ınstıtýttary arqyly 1 105 mln teńge kóleminde nesıe qarajatyn rásimdegen jáne 901-i grant boıynsha, 5 –ýi ekinshi deńgeıli bank arqyly qarjy alyp, kásipterin bastady. Jobanyń alǵashqy túlekteriniń biri – Mártók aýdanynyń turǵyny Erkinaı Orazymbetova. Ol «Aýyl sharýashylyǵyn qoldaý qory» arqyly 1,5 mln teńge nesıe alyp, 14 bas baspaq satyp alyp, ony kóbeıtip, keıin eshki sharýashylyǵyn qolǵa aldy. Búgingi kúni aýdan ortalyǵyndaǵy «Aıagóz» eshki sharýashylyǵynyń qaımaq, irimshik, shubat sekildi ónimderi jergilikti turǵyndar arasynda úlken suranysqa ıe bolyp otyr.
- Jobany uıymdastyrýshy «Atameken» kásipkerler palatasyna úlken alǵysymdy bildiremin. Ózim kóp balaly ana bola otyryp, bilim alyp, kásiptiń kózin ashýǵa múmkindik aldym. Qazirgi kezde úlken 2 balamdy Aqtóbe qalasyndaǵy aýylsharýashylyǵy kolejine oqýǵa berip, olar bitirgen soń, sharýashylyǵymdy úlken keshenge aınaldyrsam deımin. Oǵan aýdanda barlyq múmkindik bar. Bastysy men kásipti saýatty júrgizýdi úırendim,-deıdi Erkinaı Orazymbetova
Slet kezinde «Aýyldaǵy bıznesti júrgizý áleýeti», «Ózin-ózi jumyspen qamtyǵandardy ekonomıkalyq aınalymǵa jumyldyrý» taqyrybyndaǵy baıandamalar jasalyp, túlekterdiń júzege asyrylǵan jobalary týraly beıne rolıkter kórsetildi. Shara barysynda aýdan ákiminiń, Kásipkerler palatasynyń atynan úzdik joba ıeleri alǵys hattarmen marapattaldy. Shara joba túlekteriniń ónimderi qoıylǵan jármeńkege ulasty.
- Sletti uıymdastyrýdaǵy maqsatymyz jobany bitirgen túlekterdiń bir-birimen tájirıbe almasyp, jetistikterimen bólisýine, bir-birimen tyǵyz baılanys ornatýyna yqpal jasaý boldy. «Bastaý» jobasynyń negizgi ıdeıasy -kásipkerlerdiń sanyn kóbeıtip, jumyssyzdyqty joıý, -deıdi óńirlik kásipkerler palatasynyń Mártók aýdandyq fılıalynyń dırektory Aıgúl Baýbekova.
Joba túlekterine arnalǵan slet respýblıka boıynsha alǵash ret ótkizildi. Sletke qatysýshylar mundaı sharalardyń jańa múmkindikterge jol ashatynyn jáne aýyl kásipkerlerine erekshe jiger beretinin aıtty.
Aıta keteıik, Qazaqstanda alǵash ret bıznes salasyna qatysty «Negizin salýshylar» – «Osnovatelı» atty realıtı-shoý jobasy qolǵa alyndy. Atalǵan jobaǵa qatysamyn degen azamattardan ótinim qabyldaý 2018 jyldyń 18 qazanynan bastalǵan bolatyn.
«Negizin salýshylar» – «Osnovatelı» Qazaqstandaǵy YouTube arnasyna shyǵarylatyn alǵashqy shynaıy bıznesshoý jobasy bolyp tabylady.
Joba Qazaqstandaǵy shaǵyn jáne orta bıznestiń damýy úshin jastar arasynda bıznesti bastaý jáne iske qosý isine qyzyǵýshylyqty arttyrý arqyly alǵysharttar jasaýǵa baǵyttalǵan. «Negizin salýshylar» jobasy tolyǵymen jeke joba bolyp tabylady. Onyń memlekettik uıymdarmen eshqandaı qatysy joq. Degenmen, jobanyń mańyzdylyǵyna baılanysty Qazaqstan Aqparat jáne komýnıkasıalar mınıstri Dáýren Abaev ony qoldaıtynyn málimdedi. D.Abaev atalǵan jobanyń bastalýyna oraı «Bıznes – kez kelgen ekonomıkanyń negizi bolyp tabylady. Ol halyqtyń ál-aýqatyn arttyrýdy qamtamasyz etedi, al kásipkerler orta taptyń negizin quraıdy. Qazirgi tańda Qazaqstanda bıznesti qoldaýǵa, damytýǵa úlken kúsh jumsalyp otyr», dedi. Onyń aıtýynsha, «Negizin salýshylar» – «Osnovatelı» atty bul jańa joba jastardyń bıznes bastamalaryn qoldaýǵa baǵyttalǵan ıgi qadam bolyp tabylady. Sondaı-aq mınıstr atalǵan jobanyń qazaqstandyqtar úshin tabysqa jetýdiń, ıgilikti isterdiń bastaý alatyn alańyna aınalatynyna senim bildirdi.
