Búgingi naryqtyq qatynastar damyǵan qoǵamda eń aldymen adamnyń ómir súrýi onyń jalaqysyna baılanysty ekeni sózsiz. Sondyqtan úkimet Prezıdent tapsyrmasyna saı búdjettik mekemelerdiń jalaqysyn aýyq-aýyq kóterip keledi. Osyǵan baılanysty ústimizdegi jyldyń 5 qazan kúni halyqqa arnaǵan Joldaýynda Elbasy úkimetke tapsyrma bergeni belgili.
–2019 jyldyń 1 qańtarynan bastap eń tómengi jalaqyny 1,5 ese, ıaǵnı 28 myńnan 42 myńǵa deıin ósirýdi tapsyramyn. Bul barlyq sala boıynsha túrli menshik nysandaryndaǵy kásiporyndarda jumys isteıtin 1 mıllıon 300 myń adamnyń eńbekaqysyn tikeleı qamtıdy. Búdjettik mekemelerde jumys isteıtin 275 myń qyzmetkerdiń eńbekaqysy kóbeıip, orta eseppen 35 paıyzǵa ósedi. Osy maqsattarǵa 2019-2021 jyldarda respýblıkalyq búdjetten jyl saıyn 96 mıllıard teńge bólý kerek. Osyǵan oraı, endi, eń tómengi jalaqy eń tómengi kúnkóris shegine baılanysty bolmaıdy. Eń tómengi jalaqynyń jańa mólsheri búkil ekonomıka aýqymyndaǵy eńbekaqy ósiminiń katalızatoryna aınalady,–dedi Prezıdent halyqqan arnaǵan Joldaýynda.
Árıne, Elbasynyń eldiń qamyn oılap, eń tómengi jalaqyny kóterý týraly tapsyrmasy eń aldymen oryndalýymen qundy bolatyny sózsiz. Bul oraıda eńbekaqysy artatyn azamattardyń ishinde densaýlyq saqtaý salasynyń qyzmetkerleri barshylyq. Naqty aıtar bolsaq, bul salada qansha adamnyń aılyǵy kóteriledi? Biz bul saýaldy Densaýlyq saqtaý mınıstrliginiń baspasóz qyzmetine joldadyq. Bizge málim bolǵan jaýapqa nazar aýdarar bolsaq, densaýlyq saqtaý salasynyń uıymdastyrýshylyq-quqyqtyq nysanyna qaramastan eńbekaqysy az 191 myń jumysshylardyń jalaqysy 2019 jylǵy 1 qańtardan bastap kóteriledi eken. Prezıdent pármeni degen osy.
Árıne, eń aldymen basqalarmen qatar, adam janynyń arashasy bolyp júrgen abyroıy asqaq aq halatty jandardyń aılyq jalaqysynyń kóterilgeni durys. Densaýlyq saqtaý mınıstri Eljan Birtanov sonymen qatar, 2019 jyldan bastap, alǵashqy medısınalyq-sanıtarlyq kómek kórsetetin dárigerlerdiń jalaqysyn 20 paıyzǵa kóterý qarastyrylyp otyrǵanyn aıtty.
Erkin Qaldan
