Bir belgili oqý ornyn úzdik bitirip jatqan stýdent qyzdyń áńgimesi eki kúnnen beri mazamdy qashyrdy.)

Aıtýynsha, dıplom jumysyn jazatyn kezi kelipti. Jetekshisi - kafedra meńgerýshisi. Biraq "dıplom jazyp áýre bolma. 170 myńǵa daıyn jumysty alasyń" depti. Stýdent qyz ózi jazǵysy keledi. Al jetekshisi jazǵan kúnde de baǵyt berip kómektespeıtinin, ony erteń komısıa qabyldamaýy múmkin ekenin, bári oıdaǵydaı bolsa da ýnıversıtettiń antıplagıat týraly baǵdarlamasynan ótkizbeıtinin aıtyp qorqytypty. Stýdent qyz «oılanaıyn» dep ketip, grýppalastarynan surasa, bárine osy talap qoıylǵan eken. Endi bir grýppa tegis 170 myńnan jınap berip, ýnıversıtettiń daıyn dıplom jumysyn satyp almaqshy...

Biz onsyz da bylǵanǵan, jemqorlyq jaılaǵan elde ómir súrip otyrmyz. Endi osy bylǵanyshty jastarǵa juqtyryp jatyrmyz? Olar da muny qalypty, tipti qajet nárse dep qabyldaı bastaıdy... 
Ókinishti emes pe?

Óz basym atyn atap turyp jazaıyn desem, «ana qyzǵa zıanym tıe me?» dep qorqyp otyrmyn. 
Ol qyz aqylsyz da emes. "Antıplagıatty ár ýnıversıtetke berip qoımaı, búkil respýblıkalyq ortaq baǵdarlamamen qarasa ǵoı. Áıtpese, qazir meniń izdenip jazǵan jumysymdy ýnıversıtet óz baǵdarlamasymen qaraıdy. Olar qoldan kedergi jasap ótkizbeı tastaýy múmkin",- deıdi... Dıplom jetekshisi osylaı qorqytyp, betin qaıtaryp tastaǵan ǵoı.

Óz qolyn bylǵaǵysy kelmeı, shyryldap otyrǵan stýdent qyzdy aıap kettim.

Jemqorlyqtan osyndaı jastardy qutqaryp qalýdyń qandaı joly bar?
Álde árqaısymyz "ózime zıany tıip ketedi" dep, jemqor qoǵamnyń aǵysymen kete beremiz be?

Nazira Bairbek, feısbýktegi paraqshasynan