Aqtóbe oblysynyń ákimi Berdibek Saparbaev memleket basshysynyń Qaýipsizdik keńesi otyrysynda bergen komýnaldy qyzmetterdiń tarıf qurýlaryna qatysty tapsyrmasyn oryndaý suraqtaryna baılanysty jıyn ótkizdi.

Jıyn kezinde komýnaldy kásiporyn basshylarynyń tarıf qurý jáne jekemenshik ınvestısıalyq baǵdarlamalardy oryndaý máseleleriniń aǵymdaǵy jaǵdaıy týraly baıandamalary tyńdaldy. Qazirgi tańda prokýratýra men monopolıaǵa qarsy qyzmet organdary monopolıserdiń komýnaldy saladaǵy qyzmetteriniń zańdylyǵyn tekserýdiń keshendi sharalaryn júrgizip jatyr. Oblys boıynsha tabıǵı monopolıalardyń 47 sýbektisi tirkelgen,-dep málimdedi tabıǵı monopolıalardy retteý departamentiniń basshysy Gúlnur Masına. Oblys ákimi aýmaqtyq jáne jergilikti organdar basshylyǵynyń, tabıǵı monopolıalar sýbektileriniń nazaryn el Prezıdenti tapsyrmasynyń múltiksiz oryndalýyna aýdardy.

"Prokýratýra tekserisi aıaqtalǵan soń biz komýnaldy qyzmet tarıfteriniń qurylýy boıynsha suraqtardy qaraý úshin qaıta jınalatyn bolamyz. Prokýratýra organdary men monopolıaǵa qarsy mekemeler ınvestısıalyq baǵdarlamalardyń júzege asyrylýyna, qarajattyń tıimdi jumsalýy men monopolıserdiń materıaldyq-tehnıkalyq bazany nyǵaıtýlaryna da qatań nazar aýdarýlaryn suraımyn",-dedi qadaǵalaý organdarynyń nazaryn aýdarǵan Berdibek Saparbaev.

Budan basqa, jıyn barysynda oblys ákimi komýnaldy kásiporyn basshylarynyń esterine 2019 jyldyń 1 qańtarynan bastap eń az eńbekaqyny kóterý kerektigin saldy.

-1 qańtardan bastap eń az jalaqy 42 myń teńgeni quraıtyn bolady. Jekemenshik túrine qaramastan barlyq uıymdar, kásiporyndar Elbasy tapsyrmasynyń oryndalýyn qamtamasyz etýleri tıis. Sol úshin bıylǵy jyldyń 1 jeltoqsanyna deıin esepterdi jasap, jumysshylardyń eńbekaqylaryn kóterý kózderin anyqtaýlaryńyz qajet. Kelesi jylǵa bekitilgen eń tómen eńbekaqy mólsherin alatyn birde bir adamnyń aılyǵy kóterilmeı qalmasyn, -dep atap ótti oblys ákimi.