Elmıra Baıjanova «Jumyspen qamtý jol kartasy – 2020» baǵdarlamasynyń kómegimen qyz balalarǵa kıim tigetin sheberhana ashty.

Ol Atyraý oblysynan Aqtóbege 2016 jyly qonys aýdardy. Kelgen boıda kásipkerlikpen aınalysýǵa bel býady. Ol úshin «Atameken» kásipkerler palatasynyń kásipkerlik negizderin úıretetin kýrstaryna qatysyp, memlekettik qoldaý sharalary arqyly 4 mln teńge nesıe alýdyń sáti túsipti.

* Nesıe qarajatyna qajetti qural-jabdyqtar, tigin mashınasyn satyp aldym. Habarlandyrý arqyly «Shyǵys» bazarynan jalǵa beretin oryn taptym. Alǵashynda kıimderdi qysqartý sekildi usaq-túıek sharýalardy jasaǵan edik, qazir mektep formalary men konserttik kostúmder tigemiz. Jeke tapsyrystar qabyldaımyz. Atelede 3 adam jumys isteıdi,-deıdi kásipker.

Tigin sheberhanasy, negizinen, kishkentaı qyzdarǵa arnalǵan kıimder tigedi. Jas sánqoılarǵa arnalǵan túrli kóılekter men syrt kıimder daıyndaý - kásipkerdiń súıikti isi. Elmıra alǵashqy kóılekterin qyzy Ánelge arnap tigýden bastaǵan. Ánel bıyl anasynyń kıimderimen kishkentaı balalardyń sán álemindegi eleýli shara - «Luxury Brand Kids Model Awards Star 2018» baıqaýynda óner kórsetip, úzdik atandy.

* Osy jetistigimiz meni shabyttandyrdy. Aldaǵy ýaqytta tek kishkentaı qyzdarǵa arnalǵan kıimder daıyndaýmen aınalysamyn dep sheshtim. Kásibimdi keńeıtip, úlken dúken ashsam deımin. Onda aımaqtaǵy dızaınerlerdiń kıimderi men daıyn ónimderdi satýdy josparlap otyrmyn. Talǵamdy bala kezden qalyptastyrǵan jón,-degen Elmıra Bajenova jaqyn arady jańa kásip kózin ashpaqshy.

Onyń bul bastamasyna Aqtóbe oblysynyń «Atameken» kásipkerler palatasy janynda jumys isteıtin «Tiginshiler men dızaınerlerdiń óńirlik qaýymdastyǵy» jan-jaqty qoldaý bildirýde.

* Tiginshiler qaýymdastyǵynyń biz sekildi qolónermen aınalysatyn jandarǵa bereri kóp. Qalada ótetin túrli sán sharalaryna qatysamyz. Saýda núkteleri men jármeńkeler

týraly aqparat alamyz.Kásipkerlikti qoldaý sharalary týraly da der kezinde bilip otyramyz,-deıdi Elmıra.