Aqtóbede alǵash ret jeke balabaqshalar arasynda «Jyl tárbıeshisi» baıqaýy ótti. Baıqaý «Atameken» kásipkerler palatasy jáne «Qazaqstandaǵy mektepke deıingi mekemeler qaýymdastyǵy» Aqtóbe fılıaly uıymdastyrdy.

Sharaǵa qaladaǵy jekemenshik mektepke deıingi uıymdardyń 15 tárbıeshisi qatysty. Olar tanystyrý, kórneki sabaq jáne óner kórsetý saıystary boıynsha baq synasty.

* Jekemenshik balabaqshalar oblysta ótkiziletin baıqaýlardan tys qalyp jatady. Bizdiń balabaqshalarda da bilikti mamandar qyzmet etetinin kórsetkimiz keledi. Sonymen qatar mundaı sharalar mektepke deıingi bilim sapasyn arttyrýǵa jáne ózara tájirıbe almasýǵa kómektesedi. Búgin meniń oıymsha jeke balabaqshalardyń kásibı deńgeıin anyqtaıtyn bolamyz,-deıdi «Aqtóbe oblysynyń jekemenshik mektepke deıingi mekemeler qaýymdastyǵynyń» tóraıymy Natalá Kaıýdına.

Saıysqa qatysýshylar án aıtyp, bı bıledi, usynylǵan tapsyrmalardy oryndaýda belsendiligimen erekshelendi. Sonymen qatar olar oqý-ádistemelik baǵdarlamalar týraly suraqtarǵa jaýap berdi. Tárbıeshi apaılaryna kishkentaı búldirshinder de kómektesip, óz ónerlerin ortaǵa saldy. Baıqaý shartyna saı olardyń tárbıelenýshilermen qarym-qatynas ornata bilý sheberlikteri de esepke alyndy. Sonymen baıqaý qorytyndysy boıynsha

1-shi oryndy – Qartbaeva Juldyz Baqytjanqyzy – «Aq erkesh» jeke balabaqshasynyń tárbıeshisi

2-shi oryn – Tyshımova Aınur Tynymbergenqyzy – «Donı» jekemenshik baqshasynyń tárbıeshisi

3-shi oryn – Reıh Aleksandra Ervınovna - «Ken ı barbı» balabaqshasynyń tárbıeshisi ıelendi.

«Mundaı baıqaýlar shyǵarmashylyqty shyńdaýǵa, kásibińdi qurmetteýge jáne alǵa umtylýǵa yntalandyrý úshin óte qajet. Bala tárbıesi – ortaq jumys bolǵandyqtan, tárbıeshilerdiń eńbegine osyndaı jolmen bolsa da nazar aýdarý-quptarlyq is. Búgingi qatysýshylardyń deńgeıine kóńilim toldy. Aldaǵy ýaqytta baıqaýdyń kólemin ulǵaıtyp, oblys kóleminde ótkizýdi usynamyn»,-deıdi baıqaýǵa qazylyq etken óńirlik kásipkerler palatasynyń bólim basshysy Nurlan Mahambetov.

Aıta ketsek, Aqtóbe qalasynda barlyǵy 86 jeke mektepke deıingi uıym jumys isteıdi. Olardyń 30-y «Qazaqstandaǵy mektepke deıingi mekemeler qaýymdastyǵyna» múshelik etedi. Qaýymdastyq balabaqshalardy qarjylandyrý, materıaldyq-tehnıkalyq bazany jaqsartý, tárbıe salasyndaǵy jańa baǵdarlamalar boıynsha dóńgelek ústelder, pikirtalas alańdary, saıystar uıymdastyrady.