Aqtóbede oblystyq tarıhı-ólketaný murajaıynyń jańa ǵımaratynda «N.Nazarbaev: dáýir, tulǵa, qoǵam» kóshpeli qor kórmesi saltanatty túrde ashyldy.

Sharanyń tusaýkeserine QR Prezıdenti keńsesiniń bastyǵy – QR Tuńǵysh Prezıdenti – Elbasy kitaphanasynyń dırektory mindetin atqarýshy Mahmud Qasymbekov pen Aqtóbe oblysynyń ákimi Berdibek Saparbaev, ardagerler men jurtshylyq, stýdent jastar qatysty. Mahmud Qasymbekov óziniń sálemdesý sózinde Aqtóbege Prezıdenttiń arnaıy tapsyrmasymen kelgenin atap ótti.

* Qutty meken Aqtóbeniń turǵyndarymen jáne qonaqtarymen kezdeskenime qýanyshtymyn. Osynda kóshpeli kórmeni ótkizý – memleket basshysynyń tapsyrmasy ekenin erekshe atap ótkim keledi. Elbasymyzdyń mýzeıin el táýelsizdiginiń shuǵylaly shejiresi dep ataýǵa bolady. Sebebi, Elbasymyz ben el táýelsizdigi – egiz uǵym. Biz búgin bul kórmege myńnan asa eksponattar, qundy qujattar, foto jáne beıne materıaldar alyp kelip otyrmyz. Olar elimizdiń táýelsizdik jyldarynda júrip ótken dańqty joldaryn aıqyn kórsetip tur,-dedi ol.

Oblys ákimi Berdibek Saparbaev oblys halqyn eleýli oqıǵamen quttyqtady.

* Búkil aqtóbeliktiń atynan Mahmud Bazarqululyna jáne Elbasy kiaphanasynyń barlyq qyzmetkerlerine kórmeni uıymdastyrǵandary úshin alǵys aıtamyn. Kórme oblys turǵyndarymen qosa, bizdiń qonaqtarǵa da qyzyq bolatynyna senimdimin. Árqaısysymyz memlekettiń qalaı qalyptasqanyn, qandaı aýyr kúnder bolǵanyn, Qazaqstan osy 27 jyldyń ishinde Memleket basshysy Nursultan Nazarbaevtyń dana saıasatynyń arqasynda dúnıejúzilik qaýymdastyqta shúbásiz bedelge qalaı ıe bolǵanyn bilip, este saqtaýldarymyz kerek,-dedi oblys ákimi.

«N.Nazarbaev: dáýir, tulǵa, qoǵam» kórmesiniń negizgi maqsaty – Qazaqstan Respýblıkasynyń Tuńǵysh Prezıdenti – Elbasynyń táýelsiz Qazaqstannyń tarıhı ómirindegi rólin júıeli túrde keńinen kórsetý. Kórmege kelýshiler Elbasy kitaphanasynyń arhıvtik, kitap, murajaı qorlarynyń materıaldarymen tanysa alady. Alǵash ret Aqtóbe jurtshylyǵynyń nazaryna N.Á. Nazarbaevtyń joǵary memlekettik nagradalarynyń biregeı jınaǵy, memleket basshylary jáne qazaqstandyq avtorlar tartý etken qoltańbasy bar kitaptar, sonymen qatar N.Á. Nazarbaevtyń shet tilderge aýdarylǵan eńbekteri usynyldy. Kórme tórt bólimnen turady. «Elbasy joly» bólimi QR Tuńǵysh Prezıdenti – Elbasy N.Á.Nazarbaevtyń ómir kezeńderinen syr shertedi. Elbasynyń joly rýhanı sananyń dáýiri men shyǵýy mazmunyn bildiretin

tarıhı úderister men oqıǵalardy sıpattaý arqyly kórsetiledi. Qazaqstan Prezıdentiniń alǵashqy búkilhalyqtyq saılaýy elimizdiń táýelsizdiginiń negizgi baǵyttaryn aıqyndaǵan basty tarıhı tańdaýy boldy. «Elbasy fenomeni» bólimi Qazaqstan Respýblıkasynyń negizin qalaǵan, jahandyq keńistikte turaqtylyq pen qaýipsizdiktiń jańa ıdeıalaryn engizgen N.Á. Nazarbaevtyń memlekettik qurylym tujyrymdamasynyń qalyptasýy men damýy tarıhyna jeteleıdi. Kóshbasshy fenomeni Semeı ıadrolyq polıgonynyń jabylýynan bastap, memleket astanasyn aýystyrý ıdeıasyn júzege asyrýǵa deıingi tarıhı mańyzy bar sheshimder men bastamalar arqyly kórinis tapqan. «Álem tanyǵan Elbasy» bóliminde Qazaqstan Respýblıkasynyń qarqyndy syrtqy saıasaty kórsetiledi. Bul – álemdik deńgeıdegi saıasatker, Qazaqstan Respýblıkasynyń Tuńǵysh Prezıdenti N. Á. Nazarbaevtyń bıik bedeli men asqaq abyroıynyń jemisi. Elimizdiń kópvektorly syrtqy saıasaty dıplomatıalyq tartý-taralǵylar, jeke jazbalar, arhıvtik materıaldar arqyly kórsetilgen. Árbir syı-sıapattan kez kelgen qaýip-qater men túsinbeýshilikten azat beıbit álemdi qalyptastyrýdaǵy N. Á. Nazarbaevtyń eren eńbegin tanyǵan sheteldik memleket jáne úkimet basshylarynyń jeke qurmeti aıqyn kórinedi. «Elbasy mártebesi – el mártebesi» bóliminde Memleket basshysynyń jáne Qazaqstan halqynyń jahandyq úderisterdiń turaqtylyǵy men órkendeýine qosqan úlesi úshin tabys etilgen Elbasynyń joǵary memlekettik marapattary usynylǵan. Kórme ekspozısıasynyń negizinde sholý ekskýrsıalarynan basqa «Tarıhı tańdaý», «Atameken», «Elbasy mártebesi – el mártebesi» taqyryptyq ekskýrsıalary júrgiziledi. Ekskýrsıalar ártúrli sanattaǵy – balalar men eresekter syndy kelýshilerge arnalady. Qor kórmesi Qazaqstan Respýblıkasynyń Tuńǵysh Prezıdenti – Elbasy kitaphanasynyń atalmysh kóshpeli kórme jobasynyń basty oqıǵasy bolyp tabylady. Joba aıasyndaaýqymdy ǵylymı-bilim berý, mádenı-aǵartý sharalary, sonymen qatar Aqtóbe oblysy boıynsha kóshpeli ekskýrsıalar uıymdastyrylady. Elbasy kitaphanasynyń qyzmeti tájirıbesinde «Jádigerler sóıleıdi» toptamasynan kóshpeli dárister, mýzeı sabaqtary, kóshpeli ekskýrsıalar syndy mádenı-aǵartýshylyq qyzmettiń erekshe túrleri belsendi qoldanylyp keledi. Elbasy kitaphanasynyń jobasy 2017 jylǵy qarashada Almatydan bastaý alyp, 2018 jylǵy aqpan aıynda Shymkentte jalǵassa, al qyrkúıek aıynda Atyraý oblysynda tabysty ótti. Jalpy 2017-2018 jyldary kórmeni 350 myńnan astam adam tamashalady. Kórme 2019 jylǵy qańtar aıynyń sońyna deıin jalǵasady.