Aqtóbede alǵash ret Prezıdenttik polki Qurmet qaraýyl rotasy áskerı qyzmetshileriniń súıemeldeýimen QR Memlekettik kúzet qyzmetiniń Prezıdenttik orkestri óner kórsetti.

Kórermender Dosymjan Tańatarov, Klara Tólenbaeva, Medet Salyqov, Oljas Súleımenov, Gúlnur Ádilbekova, Asylhan Shalqarov, Gúlsim Myrzabekova, Ásel Mádekeshova syndy orkestrdiń jetekshi oryndaýshylarynyń, «Alaman» tobynyń jáne t.b. oryndaýynda halyqtyq jáne jaz mýzykasynyń, álemdik klasıkalyq mýzyka kompozısıalaryn tamashalady.

QR Memlekettik kúzet qyzmetiniń Prezıdenttik orkestri Qazaqstannyń protokoldyq, dıplomatıalyq, memlekettik jáne ózge de saltanatty is-sharalarynyń mýzykalyq bólimin qamtamasyz etý úshin 1992 jyly qurylǵan. Shyǵarmashylyq ujym álemdik mýzyka mádenıetiniń barlyq janryn qamtıdy. Orkestrdiń ártisteri TMD memleketteriniń, Ulybrıtanıa, Italıa, AQSH, Túrkıa, Avstrıa, Belgıa, Malazıa, Egıpet, Úndistan, Germanıa jáne álemniń basqa da elderiniń sahnalarynda óner kórsetti.

Aqtóbe kórermenderin memleket basshysynyń qatysýymen ótetin memlekettik protokoldy, shetel memleket basshylaryn kútip alý jáne shyǵaryp salý joralǵylary men basqa da memlekettik máni bar is-sharalardy qamtamasyz etý jónindegi mindetter júktelgen QR Memlekettik kúzet qyzmeti «Aıbyn» Prezıdenttik polki Qurmet qaraýyl rotasy áskerı qyzmetshileriniń sheberligi nemquraıdy qaldyrmaıtyny sózsiz. Qurmet qaraýyl rotasynyń jeke quramy Qazaqstannyń ártúrli qalalarynda jáne shetelderde saptyq amaldardy sheber oryndaıtyndaryn birneshe ret pash etti.

Merekelik konsert Qazaqstan Respýblıkasynyń Tuńǵysh Prezıdenti - Elbasy Kitaphanasynyń «N.Nazarbaev: dáýir, tulǵa, qoǵam» atty jyljymaly kórme jobasynyń aıasynda ótkizilip jatqanyn atap ótý kerek. 14 qarashadan bastap kórme Aqtóbe oblystyq tarıhı-ólketaný murajaıynda eksponattalady. Aqtóbe turǵyndary men qonaqtary kórmemen 2019 jylǵy qańtar aıynyń sońyna deıin tanysa alady.