Aktobe Invest-2018 forýmynda 300 mlrd teńgege memorandýmdarǵa qol qoıyldy.

Aqtóbede oblys ákimdiginiń uıymdastyrýymen «Aktobe Invest-2018» VI halyqaralyq ınvestısıalyq forýmy ótti.

Osymen altynshy ret uıymdastyrylǵan aýqymdy sharaǵa «Senim. Ósý. Damý» taqyrybymen ótken  forýmǵa óńirdiń túrli salasyna qyzyǵýshylyq tanytqan Qytaı, Koreıa, Ázirbaıjan, Belorýs, Reseı men Ózbekstan elderiniń ınvestorlary keldi. Shet eldiń iri bıznes qaýymdastyqtyqtary qandaı jobalardy qarjylandyrady?

Forýmǵa ınvestorlar, jańa jobalardyń bastamashylary, Qazaqstanda jumys tájirıbesi bar memlekettik organdar men TUK ókilderi, otandyq bıznestiń úzdik menedjerleri, Qytaı, Ońtústik Koreıa, Nıderlandy, Ázirbaıjan, Eýropalyq keńes elderi, Belorýssıa, Reseı, Ózbekstan syndy 23 elden kelgen ınvestorlar, barlyǵy 400-den astam adamdy jınaldy.

Forýmnyń negizgi maqsaty - óńir ekonomıkasyna otandyq jáne sheteldik ınvestısıalar aǵynyn tartý.

Investorlar «Zerttelgen ken oryndary – ınvestısıaǵa arnalǵan baǵdar» kórmesimen tanysty, onda oblystyń munaı óndirý, gaz óńdeý, qara jáne tústi metalýrgıa jáne AÓK sıaqty ınvestısıany qajet etetin ekonomıkanyń basym sektorlaryndaǵy otyzdan astam perspektıvti jobalary usynyldy. Qonaqtarǵa geografıalyq kartasy men munaı-gaz salasynda taý-ken óndirýdiń jańa tehnologıalary týraly aqparattary bar erkin ken oryndary, taýashaly jobalar, sonymen qatar, «Jergilikti taýar óndirýshilerdiń elektrondyq katalogy» jáne t.b tanystyryldy.

Oblys ákimi Berdibek Saparbaev, Italıanyń Qazaqstandaǵy elshisi Paskýale De Avıno, Orynbor oblysynyń birinshi vıse – gýbernatory Sergeı Balykın, TUK basshylary, óńirdiń bıznes qoǵamdastyq ókilderi men sarapshylary qatysqan negizgi plenarlyq otyrysta ındýstrıalyq-ınnovasıalyq damý salasyndaǵy seriktestik máseleleri talqylandy.

Oblys ákimi Berdibek Saparbaev qonaqtarǵa forýmǵa qatysqandary úshin alǵysyn bildirdi.

- "AKTOBE INVEST" forýmy jyldan jylǵa júıeli túrde damyp, bıznes úshin qýatty dıalog alańyna aınalyp keledi. Qazirgi forým taqyrybynyń «Senim. Ósý. Damý» dep atalýy kezdeısoqtyq emes. Búgin oblysymyzǵa Túrkıa, Qytaı, Germanıa, Nıderlandy, Reseı jáne t.b elderden sheteldik ınvestorlar keldi. Ekonomıkanyń negizgi draıverleri bolyp tabylatyn transulttyq kompanıalardyń tizimi keńeıýde. Máselen, «SNPS «Aqtóbemunaıgaz» óziniń jumys jasaǵan jyldarynda 10 mlrd. dollarǵa, «Qazhrom» TUK» 750 dollarǵa qosalqy nysandardy júzege asyrdy - dedi, Berdibek Saparbaev.

Búgingi kúni sheteldik ınvestorlar óńirde ondaǵan iri jobalardy júzege asyryp jatyr. Olardyń qatarynda mys-myrysh ken oryndaryn ıgerýge jáne myrysh konsentratyn shyǵarý úshin tereń óńdeý óndirisin jolǵa qoıýǵa múmkindik beretin, 4.0 ındýstrıa elementteri bar "Aqtóbe mys kompanıasy" baıytý fabrıkasyn jańǵyrtý jobasy bar. Bul ónim Reseı men Qytaı naryqtarynda suranysqa ıe bolady. Italándyq "Enı" munaı-gaz kompanıasy General Electric kompanıasymen birlesip Qarǵaly aýdanynda qýaty jylyna 48 MVt bolatyn jel elektr stansıasynyń qurylysyn bastady. Investısıa kólemi 33 mlrd. teńgeni quraıdy. Bul iske asyrylyp jatqan jobalar tiziminiń sońy emes.

- Birinshi ınvestısıalyq forým ótkizilgen sátten bastap aımaq ekonomıkasy 23% - ǵa joǵarylap, 1,8-den 2,3 trln-ǵa deıin ósti, ekonomıkanyń barlyq salalary damydy: ónerkásip kólemi 24% - ǵa, aýyl sharýashylyǵy 33% - ǵa, saýda 27% - ǵa artty. Byltyr óńir ekonomıkasynyń ósimi 5 % qurady, bıyl da ósim sol deńgeıde saqtalady. Aldaǵy bes jylda kásiporyndar 600 mlrd. teńgege jabdyqtar men prosesterdi jańartatyn bolady. Bizdiń oblys shıkizatqa táýeldilikten arylyp keledi. Óńirde "Bolashaqtyń ekonomıkasy" baǵyttary belsendi túrde damýda, 4.0 Indýstrıa elementteri men EKSPO-2017 kórmesinde usynylǵan ázirlemeler qoldanylyp jatyr, - dep atap ótken óńir basshysy Qazaqstandaǵy eń iri ındýstrıaldy aımaqtardyń biriniń aýmaǵynda jıyrma joba júzege asyrylyp jatqanyn, onyń ishinde altaýyna sheteldikterdiń qatysy baryn da qosa aıtty. Investısıa kólemi 5,7 mlrd. teńge bolatyn bes joba endigi paıdalanýǵa berilip qoıǵan.

QR Investısıalar jáne damý mınıstrligi Investısıa komıtetiniń tóraǵasy Erlan Haırov oblystyń óńdeý ónerkásibin damytý jumysynyń nátıjelerine joǵary baǵa berdi.

- 2018 jyldyń on aıynyń qorytyndysy boıynsha ósim 13,6% qurady. Aqtóbe óńdeýshi ónerkásipke ınvestısıa salý turǵysynan elde kóshbasshylardyń biri bolyp tabylady, - dedi ol.

- Forýmnyń deńgeıi ósip, birlesken kásiporyndardyń sany artýda. Bizdiń forýmǵa qatysýymyz óńirlerimizdi jaqyndastyryp, ekonomıkalaryn damytýǵa qyzmet etetinine senimdimin, - dedi Orynbor oblysynyń birinshi vıse – gýbernatory Sergeı Balykın.

Italıanyń Qazaqstandaǵy elshisi Paskýale De Avıno óz sózinde ıtalándyq kompanıalar aqtóbelik kásipkerlermen jemisti yntymaqtastyqqa úmit artatyndaryn jáne eń ozyq tehnologıalardy tartýǵa, sondaı-aq áleýmettik jobalardy iske asyrý kezinde jergilikti mazmundy qoldaýǵa daıyn ekenderin atap ótti. Forým aıasynda quny 300 mlrd teńge bolatyn toǵyz perspektıvti jobany júzege asyrýda yntymaqtastyq týraly kelisimge qol jetkizildi. Máselen, jaqyn arada Aqtóbede qoqys óńdeý zaýytynyń qurylysyn bastaý josparlanýda. «Kazakhstan BAB Investment Group Co. LTD» JSHS ınvestory osy jobaǵa 185 mlrd. teńge salýǵa daıyn. Belorýssıalyq «Lıdselmash» holdıńiniń basqarýshy kompanıasy» AAQ aýyl sharýashylyǵy tehnıkasyn óndiretin zaýyt qurylysyn bastaýǵa nıetti. «Uros Group» (Fınlándıa) Aqtóbe naryǵyn turǵyn úı qurylysy sharýashylyǵyna İT – tehnologıalardy engizip, damytýda bolashaǵy zor dep sanaıdy. «Ýfamunaıgazmash» JSHQ bashqurt kásiporny blokty-modýldi jáne blokty-karkasty munaı-gaz jabdyqtaryn shyǵaratyn zaýyt salýdy josparlap otyr. Óńir ekonomıkasynyń damýyna oń áserin tıgizetin iri jobalardyń qatarynda "Aqtóbe mys kompanıasy" JSHS-niń ken baıytý óndirisin jańǵyrtý jáne mys-myrysh keniniń ken ornyn ıgerý jumystary, katodty mys óndiretin jáne Benkala jáne Ońtústik Benkala ken ornyn ıgeretin «SM Minerals» JSHS-niń taý-ken baıytý kesheniniń qurylysy bar.

Aıta keteıik, forýmnyń maqsaty - kórshi eldermen jáne ózge óńirlermen aradaǵy áriptestikti nyǵaıtyp, ınvestorlar tartý. Osy kezeńge deıin 50-den astam kelisimshartqa qol qoıylyp, nátıjesinde birlesken  30 joba iske asqan. Bıyl taraptar quny 300 mlrd teńgeden asatyn 9 memorandýmǵa qol qoıdy.  Basym kópshiligi munaı-ken óńdeý salasyna qatysty bolsa, túrik aǵaıyndar óńirde sement zaýytyn salýǵa ynta bildirip otyr.

Shara sońynda oblys ákimi Qazaqstan Respýblıkasyndaǵy  Italıa  elshisi Paskýale de Avınomen kezdesip, biraqatar máselelerdi talqylady. Sondaı-aq Berdibek Saparbaev  óńir ekonomıkasynyń damýyna úles qosqan, úzdik ınvestorlardy alǵys hatpen marapattady.

Esterińizge sala keteıik, sońǵy bes jylda óńir ekonomıkasyna 2,2 trln teńge ınvestısıalanǵan. Osy jyldyń ózinde 510 mlrd teńge ınvestısıa tartý kózdelip otyr.