2009 jyly Qytaıdan qonys aýdaryp kelgen 28 jastaǵy Qaırat Samarqannyń mahabbatta joly bolar emes. Qytaıda júrgen kezinde-aq sory bes eli bolǵan jigit óz Otanyndaǵy qandas baýyrlaryna aldanyp qaldym dep otyr. Júreginiń jartysyn elimizdegi atyshýly «Qalaýlym» baǵdarlamasy arqyly tappaq bolyp, aqyr sońy «qylmysker» degen atqa iligip, basy daýǵa qalypty. Aıtýynsha, efır aıaqtalǵan soń baǵdarlama qyzmetkerleri jigitti stýdıaǵa jaqyndatpaı qoıǵan. Oǵan sebep – Qaırat Qytaı men Qazaqstan arasyna iritki saldy dep aıyptalýy.

Qaırat Samarqan «Qalaýlym» baǵdarlamasyna ne aıtty? Efırdiń YouTube arnasyndaǵy nusqasyna kóz júgirteıik.

Aıtýynsha, Qytaıda júrgen kezinde áke-sheshesi joq jigit bóten kisilerdiń artynan erip kete barady. Olar Qaıratty aldap, Qytaıdyń Gýanjoý qalasyna apardy. Sóıtip aıaǵyna dári egip,  tobyǵyn qylyshpen shaýyp tastaıdy. Maqsattary – Qaıratty qaıyr tileýge jiberý. Osylaısha Qaırattyń alty jyly qaıyr tileýmen ótken. 2006 jyldary balalarǵa qaıyr tiletip otyrǵanda polısıa ustap, aýylyna qaıta kelgen. Alaıda aýyldastary muny tanymaıdy, tipti 6 jyl buryn óldige sanap, janazasyn shyǵaryp ta tastaǵan eken. Budan soń Qaırat Úrimshige qaıtady, jumys isteıdi. Jumys istep júrip Otany Qazaqstan ekenin biledi. 2009 jyldary Otanyna oralýǵa bel býady.

Bul – Qaırattyń Qazaqstanǵa kelgenge deıingi Qytaıdaǵy ómiri, óz shyndyǵy. Alaıda basynan ótken qıyndyqtardy halyq aldynda, ásirese ózin úmitker retinde usynyp otyrǵan arý Aqtotyǵa taısalmaı aıtsam degen nıetiniń sońy úlken daýǵa ákep soqqan. Qaırattyń aıtýynsha, «Qalaýlym» baǵdarlamasy «Qazaqstan men Qytaı arasyna iritki saldy» dep oǵan jala japqan. Alaıda Qaırattyń ózi polısıaǵa shaǵymdanbaq bolǵan. Nege? Qaırat Samarqan Qamshy.kz aqparat agenttiginiń tilshisine nebári 24 saǵatta basynan ótkergen oqıǵany bylaı baıandady.

«Qalaýlymnyń maqsaty – tek qana shoý. Men onda «baqytymdy tapsam eken» degen adal nıetpen bardym. Júregimnen shyqqan sózderdi, shyndyǵymdy aıttym, eshteńe jasyrǵan joqpyn. Biraq olar tańerteń meni stýdıaǵa shaqyrdy da, oıyndy ózgertti. Olardyń oılary mynadaı: «Qaırat úkimetke qarsy shyǵyp júr, osyndaı negizben Aqtoty ekeýiniń aralasyp, jaqyndasyp ketpeýin qadaǵalaıyq». Al meniń, shyn mánisinde, ondaı oıym bolǵan emes. 11 jeltoqsan kúngi efırden keıin keshkisin Aqtotymen kezdesýimiz kerek bolǵan. Tipti saǵat 18:00-ge kafeden oryn belgilep, qyzben kezdeser sátti asyǵa kútip júrdim. Ol da meni kútetinin, daıyn otyratynyn jazdy. Biraq arada 20 mınýt ótken soń Aqtoty inisi aýyryp qalǵandyqtan, kezdese almaıtynyn jazdy. Munda bir gáp baryn birden ańǵardym.

Sóıtsem, álgi baǵdarlamadaǵy kómekshi jigit Aqtotyǵa «menimen aralaspasyn, kezdespesin» dep aıtyp jibergen. «Ol úkimetke qarsy shyqqan, kezdesýge barma» degen. Men de óz degenimnen qaıtpadym, Aqtotyǵa erteń kezdesetinimizdi aıttym, stýdıada sóılesip, bárin sheshemiz dep oıladym. Barǵanymda túrik rejıser meni shaqyrtyp, Aqtotymen sóılesýime qarsy ekendigindi aıtty. Maǵan «úkimetke qarsy sóılediń» dedi.  Men aıtqan sózderime halyqtyń ózi kýá ekenin aıtyp, boı bermedim. «İstep otyrǵandaryńnyń bári oıyn» dep ashyq aıttym. Budan keıin efırge qatyspasam, qatyspaıyn, rejıserden Aqtotymen kezigýdi taǵy ótindim. Ruqsat bermedi. Sonda isteıtin qazaqtyń jigitteri ózime bas saldy. Aıtqanymnan qaıtpaı turǵan meni jaǵamnan aldy. Birneshe jigit jalǵyz turǵan maǵan shabýyldaı bastady. «Qalaýlymdyqtardan» zardap shekken men óz quqyǵymdy qorǵamaq nıette polısıaǵa júgindim. Polıseılerdi stýdıaǵa shaqyrtyp, bar jaǵdaıdy aıtyp berdim. Biraq baǵdarlama qyzmetkerleri de únsiz qalmady. Meni «eki el arasyna iritki salýshy» dep aıyptaı saldy. Ne kerek, polısıa «Qalaýlymnyń» sózin sóıledi de, men bólimsheden bir-aq shyqtym. Nazarbaevqa, úkimetke qarsy eshteńe aıtpaǵanymdy dáleldegim keldi, senbedi, kýáger surady. «Dálelim bolmaǵan jaǵdaıda, úkimetke qarsy shyqty» degen aıyppen sottalatynymdy aıtty. Onyń ústine buryndary Qytaıda isti bolǵanymdy alǵa tartyp,  qylmysker etip qoıdy. Alaıda zań buzatyndaı, memleketke qarsy eshbir áreketke barǵan emespin. Qytaıdaǵy jaǵdaı men óz Otanymdaǵy jaǵdaıdy salystyrýǵa da kelmeıdi.  

Temir tordan qorqyp turǵan men joq, eń bastysy - nıetim taza. Tek meni aldap soqqan, oıynshyq etken «Qalaýlym» baǵdarlamasyna degen ókpem qara qazandaı, zyǵyrdanym qaınady. Tikeleı efırden bárin tyńdap-bilip otyrǵan halyq ne deıdi? «Aqtotyǵa ózi kelip, ózi qashyp ketti» demeı me? Men de namysty adammyn. Al endi ózimdi aqtap shyǵýym úshin erteń polısıaǵa kýáger aparýym kerek eken», - dep baıandady oqıǵasyn Qaırat.

Bir aıta keterligi, Qaırat efırge shyqpas buryn baǵdarlamanyń arnaıy kelisimshartqa qol qoıǵan eken. Kelisimshartqa sáıkes, qatysýshy «Qalaýlym» jaıly birde bir jýrnalıske suhbat bermeıdi. Aýzyn ashqan jaǵdaıda 500 000 teńge aıyppul tóleýge tıis. 500 000 teńgesi joq bolsa da, Qaırat halyqqa shyndyqty jetkizgisi keledi.  

«Eger kelisimshartqa otyrmaǵanymda, aıtarym budan da kóp edi...  Shyny kerek, sottalyp ketkenim tipti jaqsy. Ózimniń jaǵdaıymdy aıtqanyma kinálimin be? Eger sottaımyn dese, tergesin, sottan-sotqa júgireıin. Biraq bárin halyq kórdi», - degen jigit baǵdarlamaǵa barǵanyna ókinishin bildirdi. Sebebi «bári pıar úshin uıymdastyrylǵan» degen oıdan aryla almady.  

«Ne men sottalamyn, ne «Qalaýlymdy» toqtatamyn! Qamasa qamasyn, shydaımyn. Namysty ermin! Qytaıdan kelgender qashanǵy qylmysker atana beredi? «Qalaýlymda» aıtqandarymnyń barlyǵy derlik shyndyq. Kimnen neni jasyramyn?», - dep Qaırat Samarqan sózin qorytyndylady.

12 jeltoqsan keshke taman Qaırattan taǵy bir habar keldi. Stýdıadaǵy qyzmetkerlerdiń judyryq ala júgirýinen onyń densaýlyǵyna nuqsan kelgen eken. Anyǵyn aıtqanda, keýde tusyna zaqym kelgen. 

Bul fotolardy Qaırat Almatydaǵy №7 qalalyq aýrýhanadan whatsapp arqyly jiberdi.