Keıbir adamdar bir nemese eki balany, tipti úsh balany asyraýdy qıynsynady. Alaıda bul sóz Zarına men Shırınniń otbasyna qatysty aıtylmaǵan. Olardyń shańyraǵynda qazirgi tańda 19 bala bar, bári bir anadan týmasa da, búginde bir-birin týǵan baýyrlardaı jaqsy kóredi. Bir shańyraqtyń astynda ómir súrýde.

«19 balany asyrap alǵan ol qandaı aýqatty otbasy?» dep oılap otyrǵan bolarsyz. Joq, múlde olaı emes. Asyp-tasyǵan dúnıesi joq, baspanasy da minsiz, keń saraıdaı emes. Biraq bul otbasynyń shańyraǵy shattyqqa, qýanyshqa, al mundaǵy adamdardyń júregi meıirimge toly. «Altyn júrekti» áıel búginde óziniń bes balasymen qatar, taǵdyr tálkegine ushyraǵan 14 balany qanatynyń astyna alyp, analyq meıirim men jylý syılap otyr. On tórt taǵdyrǵa jarqyn ómirdiń esigin aıqara ashyp, bolashaqqa úlken úmitpen qarap, armandaýǵa múmkindik bergen Zarına esimdi áıelmen Qamshy.kz tilshisi áńgimelesip qaıtty.

Bul Almaty oblysy, Abaı aýyly, Shaıahmetov kóshesi 36 úıdegi otbasy týraly biz bilgen jalǵyz derek. Aptanyń jumys kúnderi barar bolsaq, balalarmen kezdese almaımyz, kópshiligi mektepte. Sondyqtan aptanyń aıaǵyn kútip, demalys kúni Zarına men Shırınniń shańyraǵyna qaraı jol tarttyq.

Úlken otbasynyń tabaldyryǵynan attaǵan sátten jan-jaqtan «Sálemetsiz be?» degen daýystar kezek-kezek estilip jatty. Kópten beri saǵynysyp kórisken týystary kelgendeı bir top bala aldymyzdan júgirip shyǵyp, árqaısysy meni qapsyra qushaqtaı aldy. Aıtyp jetkize almaıtyn bir erekshe sezim boıymdy bılep ketti... Úıge kirer-kirmesten balalardyń árqaısysy «Meniń esimim – Mılada, mynaý – Marám, al myna qyz –Damıra», «Al meniń esimim – Rınat...», – dep ózderin jarysa tanystyrdy. Qabyrǵada ilinip turǵan túrli buıymdar men salǵan sýretterin kórsetip, «mynany ózimiz jasadyq...» dep qoldan istegen zattaryn talasa kórsetti. Olardyń boıynda ómirge qushtarlyq, kózderinde jalyn tunyp turǵanyn baıqadym. Olar aınalasyndaǵy adamdarǵa úlken mahabbatpen qaraıdy. Ómir bul balalardy týǵanynan erkeletpese de, olar erkeleı alady, mahabbat pen súıispenshilikke bólenip óspese de, ózgelerdi jek kórmeıdi, adamdardy jatyrqamaıdy. Al bul tárbıeniń bárin "anasy" Zarına úıretken.

Balalarmen azdap sóıleskennen keıin ishki bólmeden bizdiń keıipkerimiz Zarına shyqty. Jyly amandasyp, hal surasyp bolǵannan keıin úıdiń jaǵdaıymen tanystyryp, balalardyń jatyn bólmesin kórsetti. Bir bólmede keminde 5-6 adamnan jatady eken. Qabyrǵalardyń kún túspeıtin jeri kógerip, ylǵal tartyp tur. Úıdegi ylǵal aýanyń kúlimsi ısinen tipti, gúlder de solyp qalǵan...

Iá, úıdiń jaǵdaıy máz emes. Kúrdeli jóndeý jumystary kerek ekeni qaqpadan kirgen sátten-aq baıqaldy. Aqıqaty, bul otbasyǵa keń ári yńǵaıly jańa baspana qajet!

Bir arnada toǵysqan qıly taǵdyr...

Úıdiń jaǵdaıyn kórip bolǵannan keıin ústel basyna jaıǵasyp, Zarınamen áńgimemizdi órbittik. Er minezdi, ózi qataldaý kelgen 37 jastaǵy «Batyr ana» áńgimeni áriden bastady. Men alǵashqy saýalymdy qoıdym.

– Bul balalarmen qashan tanystyńyz? Úlken otbasynyń múshesine olar qalaı aınaldy? Bala asyrap alýdy aldyn ala josparladyńyz ba? Jáne sizdiń mundaı sheshimińizge jaqyndaryńyzdyń, jubaıyńyzdyń kózqarasy qalaı boldy?

– «Bala asyrap alamyn» dep eshqashan da josparlaǵan emespin. Osydan bes jyl buryn, ol kezde tórt balanyń anasy edim, bir dosymyz Almaty oblysyndaǵy Baıserke aýylynan úı alyp, qonys toıyna shaqyrdy. Ol jaqqa baryp, bir kún qondyq. Túnde balalar men kúıeýlerimiz erte jatyp qaldy. Biz qurbym ekeýimiz biraz ýaqytqa deıin áńgime aıttyq. Bir kezde kórshi úıden jylaǵan balanyń daýysy estildi, uzaq jylady. Qurbymnan suraǵanda, ol: «Kórshi úıdegi otbasynyń úlkenderi bári ishimdikke salynyp ketken maskúmenmder, ózderiniń kishkentaı balalary da bar, aıadaı ǵana úıde jeti adam turady, al balalarǵa bas-kóz bolatyn eshkim joq», - dep jaýap berdi. Tań ata dúkennen azǵantaı azyq-túlik pen táttiler alyp kórshi úıge bardym. Tabaldyryǵynan attaǵanym sol turǵan ornymda qatyp qaldym, óte aıanyshty eken... Úıdiń úlkenderiniń bári mas. Balalardyń ústi kir-qojalaq. Ózderi ash, ábden qorqyp qalǵan. 11  jas shamasyndaǵy Krıstına degen qyzdan: «Munda qalaı turyp jatyrsyńdar?» dep suradym. «Óte jaman», - dep muńdy daýyspen jaýap berdi. Bul úıde úsh apaly-sińli turady eken, úsheýi de ishimdikke salynyp ketken. Al balalardyń anasy olardy apasy men aǵasyna tastap súıiktisimen ketip qalǵan.

Krıstınanyń aıtýynsha, aǵalary olardy dúısenbi, sársenbi jáne juma kúnderi ǵana tamaqtandyrady eken. Al qalǵan kúnderi balalar ash otyrýǵa májbúr. Krıstınadan "Menimen birge ketesiń be?" dep suraǵanymd ol oılanbastan: «Iá, meni myna jerden alyp ketińizshi, ótinemin sizden» dep qolymnan ustap aldy. Meniń Sofá esimdi qyzym bar, ol dál osy Krıstınamen qurdas, "ekeýi dostasyp ketedi" dep oılap, ony ózimmen birge alyp kettim.

Biraz kún turǵannan keıin Krıstına salmaq qosyp, jaqsara bastady. «Bizdiń úıde turǵan unaı ma?» dep suraǵanymda, «Iá, qatty unaıdy, tek baýyrlarymdy saǵynyp kettim» dedi. Onyń Sergeı jáne Dıma atty eki inisi bar. Ertesine ekeýimiz táttiler alyp, Krıstınanyń baýyrlarynyń jaǵdaıyn bilýge bardyq. Úıine kelgende ústinde tozyp ketken kofta men butynda úlken trıkosy bar Sergeı shyǵyp: «Sen kimsiń? Kim kerek saǵan?» dep surady, al Dıma birden júgirip keldi de meni qushaqtap aldy. Júregim aýyryp ketti. Birden kúıeýime qońyraý shalyp: «Ne aıtsań da báribir, myna balalardy bul jerde qaldyrmaımyn», - dep kesip aıttym. Olardyń turmysy óte nashar edi jáne aǵalary bul balalardy aıamaı, uryp-soǵatyn. Al Dıma týǵannan múgedek, aqsańdap júredi. Kúıeýim meniń bul sheshimimdi alǵashynda qup kórmedi. «Ózimizdiń tórt bala bar, taǵy úsheý – endi jeti balany qalaı asyraımyz?» dep renjidi. Alaıda, aıtqanymnan qaıtpadym: «Qalaı bolsa da, bir amalyn tabamyz, biraq balalardy tastap ketýge bolmaıdy» dedim. Aqyrynda kúıeýim kelisip, bizdi ózi kelip alyp ketti.

– Jeti balany asyrap-baǵý qıyn boldy ma? Jalpy, ózińiz qandaı jumys isteısiz? Kúıeýińiz she?

– Árıne, alǵashynda qıyn boldy. Ólmestiń de kúnin keshtik. Kúıeýim sol ýaqytta jumyssyz bolatyn, al men «Saırandaǵy» janýarlar bazarynda ıt satamyn. Keıde aqsha bolady, keıde bolmaı qalady. Kúıeýim, negizinen, qurylysshy. Aǵasymen birge tapsyrys alyp, jóndeý jumystaryn jasaıtyn. Alaıda, ol qıyn kúnderden óttik qoı.

– Krıstına, Sergeı jáne Dımanyń ata-anasy balalaryn ońaı bere saldy ma sizge?

–Iá, balalardyń jaǵdaıy olardy tipti alańdatpady da, op-ońaı bas tartty. Degenmen, qamqorlyǵyma alý týraly qujattardy rásimdeýde biraz qıyndyq týdy. Quzyrly organdaǵy qyzmetkerlerge birneshe ret barsam da, betimdi qaıtarýmen boldy. Keıinnen maǵan Asá esimdi áıel kómektesip, qujattardy rásimdep berdi. Oǵan alǵysym sheksiz.

– Jeti balany asyrap-baǵý ońaıǵa soqqan joq dedińiz. Keıin besinshi balańyzǵa aıaǵyńyz aýyr ekenin bilgende qandaı sezimde boldyńyz?

–Krıstınany baýyrlarymen alyp ketkenimde qańtar aıy bolatyn. Keıin naýryz aıynda aıaǵymnyń aýyr ekenin bildim. Úıde jeti balany baǵyp otyrmyz, taǵy segizinshisin dúnıege ákeler bolsam, múlde qınalyp qalamyz ǵoı dep bastapqyda aldyrtyp tastaýǵa sheshim qabyldadym. Úıde qandaı jaǵdaı bolmasyn men balalarmen aqyldasyp úırengenmin. Bul sheshimimdi aıtqanymda, Krıstına birden: «Bulaı bolmaıdy, Zarına ápke. Bul sheshimińizden bas tartyńyz, dúnıege ákelińiz balańyzdy. Bir amalyn tabamyz, qaraımyz ǵoı», - dedi. Anam bolsa renjip: «Ózgeniń balalaryn baǵyp-qaǵasyńdar da, óz sábıińdi óltirmeksiń be?» - dedi. Jaqyndarymnyń qoldaýymen aqyry besinshi balamdy bosandym. Osylaı Mılada esimdi qyzym dúnıege keldi.

– Segiz balanyń qamyn oılap júrgende otbasyńyz odan saıyn keńeıe túsken eken. Qalǵan balalardyń jaǵdaıy qalaı boldy? Olarmen qaıda, qashan tanystyńyz?

– Mılada alty aıǵa tolǵanda «Krıstınanyń apasy kóz jumypty» degen habar keldi. Bizdi jerleý rásimine shaqyrdy. Qanshalyqty qıyn kúnderdi bastan ótkerse de, «bul– olardyń apasy, onyń jerleýine barý kerek» dep oıladym da, olardy ertip buryn turǵan úılerine bardym. Ol jaqta birneshe kishkentaı bala arbaǵa bir qýyrshaqty salyp alyp ary-beri aıdap júr eken. Bir kezde búldirshinniń aqyryn jylaǵan daýysy estildi. Arbaǵa qarasam, onda jatqan qýyrshaq emes, tiri bala jatyr. Shok boldym! Ózi óte kishkentaı, álsiz, ústi-basy kirden kórinbeıdi. Onyń, jylaýǵa da shamasy kelmeı, álsin-álsin daýysyn shyǵaryp qoıady. Esimi Marám eken. Onyń anasy Krıstınanyń naǵashy ápkesi bolyp keledi. Alty aılyq Marámdy qolyma alǵanymda, baıǵus qyz basyn da ustaı almaıdy, salmaǵy nebári 6 keli ǵana, ózi ash. Anasyna qarap: «Balany tamaqtandyrmaısyz ba?» dep suradym. Sóıtsem, ol birneshe kún turyp qalǵan botqa men bótelkedegi ashyp ketken sútti ákeldi. «Muny balaǵa berýge bolmaıdy» desem, anasy «Eshteńe de etpeıdi, ol mundaı tamaqtardy jep úırengen» dep jaýap berdi. Botqa men sútti mysyqtyń ydysyna tógip tastadym da, balalaryma aqsha berip, dúkenge banan ákelýge jiberdim. Banandy anasynyń qolyna ustattym da «Tym quryǵanda balaǵa banan berińiz» - dedim. Ózim syrtqa dastarhan jaıýǵa shyǵyp ketkem, bir kezde taǵy da Marámnyń jylaǵan daýysy estildi. Úıge kelsem, qasynda anasy joq, bólmeniń bir shetinde banandy ózi jep otyr. Qatty ashýlandym, tipti, qylqyndyryp tastaǵym keldi.

Marámdy ol úıge tastap ketýge bolmaıtynyn túsindim. «Balany eki-úsh aptaǵa alyp ketemin. Dárigerge aparyp kórsetý kerek», - dedim. Anasyna báribir, esh qarsylyq bildirmedi, keıinnen qyzyn izdegen de joq. Eń soraqysy, Marámdy anasy túnde jylap mazany almasyn dep týǵanynan bastap aýyzyna araq quıyp uıyqtatqan eken. Sonyń saldarynan Marámda ishimdikke táýeldilik paıda bolǵan. Baıǵus qyz ábden qınaldy, túnde uıyqtamaı jylaı beretin, aıran, sút berip, áreń degende qoıdyratyn boldyq. Ózimniń alty aılyq qyzyma múlde kóńil bóle almaı, bir aı boıy Marámǵa qarap, betin beri qarattyq. «Ólip kete me» dep qatty qoryqtym. Sebebi tym álsiz edi, ımýnıteti múlde qataımaǵan, aýrý-syrqaýǵa qarsy tura almaıtyn. Qazir ózi sup-sulý qyz bolyp ósip keledi, ózi meniń Mıladammen qurdas. Osylaı bizdiń qatarymyzǵa Marám da kelip qosyldy.

– Qandaı qıyn taǵdyr... Al endi basqa balalar jóninde aıtyp berseńiz?

– Qańtar aıy bizdiń otbasy úshin shytyrman oqıǵaǵa toly, ári «jemisti» aı (kúlip eske alady – red.). Kelesi jyly dál osy aıda bir tanysym habarlasyp: «Munda bir áıel úsh balasymen kóshede qaldy, jaldamaly páterinen qýyp jiberipti. Olardy da qasyńa alshy», - dedi. «Senderdiń esteriń durys pa? Úı bolsa tar. Olardy qaıda syıǵyzamyn?» - dep aıttym. Degenmen, eshqashan qaıda uıyqtaımyn dep ýaıymdaǵan emespin, qazir de ondaı ýaıym joq, biraq úıdegi adamdardyń barlyǵyn tamaqtandyrý kerek. Uzaq oılanbastan: «Meıli kelsin, úıde balalarǵa qarap otyrady, al men jumysqa shyǵamyn», - dedim. Sol kúni túnde úsh balasymen bir áıel keldi. Balalary kishkentaı: Damıra atty qyzy eki jasta, Dıana odan kishkene úlkendeý jáne eń úlkeni Rýslan shamamen 10 jasta edi. Ákeleri qaıtys bolǵan eken, al anasy úıde otyrǵan áıel jáne turmysy tym nashar bolǵan. Alaıda, ózi jaqsy, meıirimdi bolatyn. Balalarǵa túrli taǵamdar pisirip, úıge jóndeý jumystaryn jasaýǵa kómektesetin.

Onyń úlken uly Rýslan alǵashynda eshkimmen sóılespeıtin, ózimen-ózi bir buryshta otyryp tamaq jep, qaǵazdardy qıdalap otyratyn. Úıge psıholog shaqyrtyp, balany tekserttik. Olarǵa sýret salǵyzyp, maman psıhıkasyn tekserdi. «Sýretterge qarasam, jaǵdaılary jaqsy. Al Rýslandy dereý beıimdelý ortalyǵyna ótkizý kerek, ol aýtızmge shaldyqqan», - dedi. "Ol jaǵyn oılanyp kóremiz", - dedim, Rýslandy qımadym. Al qazir Rýslannyń jaǵdaıy birshama jaqsarǵan, ózi rep oqyǵandy qatty unatady. Bolashaqta ánshi bolýdy armandaıdy. Degenmen, Rýslan tolyqtaı aıyǵyp ketken joq, dárigerler oǵan áli naqty dıagnoz qoıa almaı keledi. Kóktem men kúz aılarynda tuıyqtalyp qalady, keıde anasynyń mazaryna bara ma dep oılaımyn.

– Bul balalardyń anasy qaza tapqan ba? Ol qalaı boldy?

– Iá! Ol bizben birge mamyr aıyna deıin birge turdy. Ózi musylman bolsa da, shirkeýge baryp turatyn. Ol áıelge barynsha qoldaý kórsetýge tyrystym. Kıim-keshek pen kerekti zattaryn alyp berip, shashtarazǵa alyp apardym. Bir kúni eshnárse aıtpastan balalaryn tastady da, ózi úıden qashyp ketti. Tipti, ne oılarymdy da bilmeı qaldym.

Kúıeýim issaparǵa ketken, al men úıde 12 balamen jalǵyz qaldym. Onyń ekeýi áli emshektegi bala edi. «Jyndanyp ketem be?» dep oıladym.. Oǵan qosa, eki jastaǵy Damıra anasy tastap ketkennen soń qatty stresske shaldyqty, butyna jiberip qoıyp júrdi, bir kezderi, tipti, shashy ýystap túse bastady. 

Balalardyń bárin jınadym da: «Renjimeńder, senderdi balalar úıine ótkizýge májbúrmin. Basqa amalym joq, óıtkeni asyraı almaımyn», - dep aıttym. Ol kezde balalarǵa eshqandaı da járdemaqy tólenbeıtin edi, al Rýslan, Dıana jáne Damıranyń birde-bir qujaty bolmady. Balalardyń kóńili birden túsip ketti, al Dıana bolsa, aıqaılap jylap jiberdi de, keıinnen esinen tanyp qaldy. Sóıtsem, ol biraz ýaqyt beıimdelý ortalyǵynda tárbıelengen eken, ol jaqta balalardy uryp-soǵatyn kórinedi. Júregim aýyryp ketti, sóıtip eshqaısyn da qımadym.

Biraz kúnnen keıin maǵan polısıadan habarlasyp, Rýslan, Dıana jáne Damıranyń anasy qaza tapqanyn aıtty, joǵary jyldamdyqta kele jatqan kólik soǵyp ketken, oqıǵa ornynda qaza taýypty. «Máıithanada jatqanyna 9 kún boldy. Múrdesin alyp ketip jerleısizder me?» dep surady. Men oǵan qatty ashýly edim: «Joq, jerlemeımiz» dep tutqany tastaı saldym da, jylap jiberdim. Janyma Dıana kelip: "Ne úshin jylap otrsyz?" dep otyrsyz, olarǵa shyndyqty aıta almadym. Keıin balalary anasynyń zıratyna baryp turý kerek ekendigin oıladym da, «jerleımiz» dep sheshtim. Balalaryn tastap ketse de, olardy eshqashan da analaryna qarsy qoıyp, jaman nárse aıtqanym joq. Balalaryna «anamyz tastap ketti» dep aıtpaýdy úırettim. Ony izdeıtin ýaqytym da bolmady, múmkin ózi de qaıta kelýge uıalǵan bolar...

Sol jyly bizdiń otbasymyzǵa taǵy da Jená esimdi balapan qosyldy. Ol Krıstınanyń týǵan inisi, jalpy olar otbasynda 4 bala bolǵan, analary basqa erkekke turmysqa shyqqannan soń Jenány ózimen birge ala ketken. Ol anda-sanda bizdiń úıge kelip turatyn, balalarymen kezdesip, sóılesip, keıde qonyp ta ketetin. Sodan, bir kúni ol bizge Jenány ákep tastady. Kúıeýimen ajyrasyp, ózi baspanasyz qalypty. Sonymen qatar, dál sol jyly maǵan quzyrly organnan habarlasyp «Rınatty da alyp ketińiz» dedi. Ózimniń bes balam jáne taǵy 14 bala... Osylaı bizdiń shańyraǵymyz úlken otbasyǵa aınaldy.

Biz qanshama ýaqyt boıy járdemaqysyz kún kórip keldik. Quzyrly organdarǵa barǵan saıyn: «Sizdiń máseleńiz áli qaralýda», - dep jaýap beretin.. Osylaı bes jyl boıy bizdiń máselemizdi qarap, sozbaqtap jiberdi. Bir kúni qatty tıtyqtap bitken kezimde, jurttan kómek suraı bastadym. Sodan meni «Ulaǵatty januıa» qorynyń prezıdenti Marıanna Iýrevna degen kisimen tanystyrdy. Bir ǵana qońyraýmen meniń basty máselemdi sheship bergen sol kisi. Alǵysym sheksiz! Sodan keıin, aǵymdaǵy jyldyń mamyr aıynan bastap ár balaǵa 10 AEK-ten járdemaqy ala bastadym. Endigi úlken armanymyz – keń ári yńǵaıly úı bolsa eken deımiz.

– Eger balalardyń ata-anasy izdep kelip, alyp ketemiz dese, qandaı sheshim qabyldaısyzdar?

–Joq, bular meniń balalarym jáne men olardy eshkimge de bermeımin.

Balalardyń bári meni «mama» dep ataıdy, al Shırındi «papa» deıdi. Olardyń ata-anasy – biz. Keıbir adamdar meni memleketten járdemaqy alý úshin balalardy ádeıi asyrap aldy dep oılaıdy eken. Alaıda, biz bes jyl boıy ókimetten bir tıyn da almaı óz kúnimizdi ózimiz kórip keldik. Shamamen, jarty jyldaı boldy, járdemaqy alyp júrgenimizge.

–Qanshama jyldan beri mundaı úlken otbasyny qalaı asyrap-baqtyńyzdar?

–Kúıeýim ekeýimiz jáne Gena esimdi aǵamyz bárimiz jumys istedik. Gena ózi 1979 jyly, áli úılenbegen. Osy ýaqytqa deıin bizdiń qamymyzdy oılap, tynbaı jumys istep keledi. Sonyń arqasynda úıimiz qırap qalmaı, aman tur.

Qaıyrymdy adamdar da kóp, bizge bári kómektesedi. Bıyl kómek qolyn bergen jandardyń arqasynda mektepke qajetti kerek-jaraqtaryn jáne kıimderin tolyq aldym. Qoldaý kórsetken barlyq adamdarǵa basymdy ıip, alǵys aıtamyn!

– Al úıdegi sharýalardy balalar ózderi bólip isteı me?

–Iá! Jalpy, úıde adam kóp bolsa da, tártip saqtalady. Ár balanyń óziniń mindetteri bar. Sereja ıtterdiń tamaǵyn daıyndap beredi, al men olardy emdeımin. Ul balalar tolyqtaı sharýashylyqqa jaýapty, al qyzdar úıdiń jumysyn atqarady. Krıstına balalarǵa qaraıdy, biraq tańerteń sabaqqa ketip qalǵan kezinde, bári maǵan qalady, keıde úlgere almaı qalamyn. Aýlada qoıan, qaz, taýyq jáne úsh eshki bar. Olardyń bárine jigitter jaǵy jaýapty, ákelerine kómektesip, ózderi qaraıdy.

– Keıbir adamdar ózderiniń týystarynyń da balalaryna qaraı almaıdy. Al sizder bir shańyraqtyń astynda 19 balany tárbıelep jatsyzdar. Qıyn emes pe?

– Balalardy eshqashan da bólip-jarǵan emespiz. Bárin jaqsy kóremiz. Olardyń árqaısysynyń óz armany bar. Mysaly, Dıana sýretti keremet salady jáne qaǵazdan túrli oıý-órnekter jasaıdy.

Rýslan rep aıtqandy jaqsy kóredi, ózi rep jazyp, bizge oqyp beredi, al Rınat órt sóndirýshi bolǵysy keledi.

Sereja bolsa, kónkıdi keremet tebedi, ony bul ýaqytqa deıin bilmegen de ekenbiz. Jýyrda «Yqylas» qorynyń uıymdastyrýymen muz aıdynyna baryp, balalarǵa kónkı tepkizdi., Serejanyń kónkıdi jaqsy tebetinin sol kezde bildim. Al, Krıstına shash úlgisiniń sheberi, keremet jasaıdy, bıyl 9-synypty bitirip, kolejge túsken, qazir shash úlgisin jasaýdyń naǵyz sheberi atandy. Árqaısysynyń óz talaby bar, belgili bir úıirmege qatysyp, sheberlikterin shyńdaǵanyn qalaımyn. Alaıda, ol nárseni bizdiń otbasynyń búdjeti kótere almaıdy.

– Sonda da bolsa, otbasyńyzdy odan ári keńeıtý josparda bar ma?

–Men eshnárseni josparlamaımyn. Bir túsingenim, kómekke muqtaj balalardyń janynan jaıbaraqat ótip kete almaımyn.

Suhbatyńyzǵa kóp rahmet!

Álemde áli de adamdardyń taǵdyryna, balalardyń bolashaǵyna beı-jaı qaramaıtyn meıirimdi adamdar bar. Tek qoǵam olardy tanı bermeıdi. Biraq olarǵa kómek kerek. Aıta ketpeske bolmas, Zarınanyń otbasyna qazir kir jýatyn mashına aýadaı qajet.

Qandaı da bir kómek kórsetem deýshiler bolsa, tómende olardyń rekvızıtteri jazylǵan. Balaǵa meıirim, al olarǵa meıirimin tógip júrgen anaǵa qoǵamnyń qoldaýy kerek.

Kaspi gold kartasy: 5169 4931 8990 6673 - Zarına Shamılevna

IIN: 80 10 14 40 16 45

Centrcredit bank kartasy - 5104 4550 3026 9658

Áńgimelesken: Nazerke Labıhan

Sýretter: Ásel Bolatqyzy