Almaty ákimdiginiń ár aýdany Qazaqstan Respýblıkasynyń táýelsizdigi meıramyn aýdan kóleminde toılaýdy bastap ketti.
Osyndaı merekelik sharalardyń biri keshe Medeý aýdanynda bolsa, saltanatty jıynda búgin Bostandyq aýdanynyń turǵyndary bas qosty.
Q.Sátpaev atyndaǵy Qazaq ultyq tehnıkalyq zertteý ýnıversıtetinde ótken merekelik keshke Bostandyq aýdany ákimdiginiń aktıvi, aýdan azamattary bas qosty.
Jıyn barysynda ákim Altaı Rahymbetov aýdannyń damýyna úles qosyp kele jatqan belgili tulǵalardy, qurmetti azamattardy merekemen quttyqtap, marapattady.
«Eki kúnnen soń elimiz eń basty mereıli mereke - Táýelsizdik kúnin toılaıdy. Táýelsizdik kúni - aq naızanyń ushymen, aq bilektiń kúshimen týǵan jerin jaý qolynan alyp qalǵan, sol úshin janyn pıda etken kóptegen qazaq azamattarynyń rýhyna taǵzym etetin kún. Sonyń arqasynda Altaı men Atyraýdyń arasynda Arqa men Alataý arasynda táýelsizdik ornady. Rýhy bıik, jigeri ór memleket qalyptasty. Táýelsizdiktiń eń alǵashqy jyly lebi, bostandyqtyń qarlyǵashy eń alǵash Almatydan ushqany aqıqat. Almatyda eń alǵash Qazaqstannyń tarıhı sheshimderi qabyldandy. Jyldar ótse de bul tarıhı oqıǵanyń mańyzy bár sátke ortaıǵan emes. Biz úshin bul máńgiliktiń belgisi.
Qazaq eliniń ulttyq qundylyqtary da tarıhpen tikeleı baılanysty. Biz ony baǵalaı bilýimiz kerek. Dál osy týraly Elbasy óziniń «Uly dalanyń 7 qyry» maqalasynda aıtady. Elbasynyń syndarly saıasatynyń arqasynda búginde elimiz tanymal memleketke aınaldy», - dedi Altaı Rahymbetov.
Aýdan ákimi qurmetti azamattar men qalanyń áleýmettik-ekonomıkalyq damýyna úles qosqan tulǵalardy, túrli sala mamandaryn marapattady.
Saltanatty jınalys estrada juldyzdarynyń merekelik konsertine ulasty.
