Táýelsizdik kúni qarsanyńda Almatynyń Medeý aýdanynyń belsendi turǵyndary qurmet gramotalarymen marapattaldy.

Oqýshylar saraıynda QR Táýelsizdigi kúnine oraı uıymdastyrylǵan merekelik konsert Almaty ákimdiginiń qoldaýymen ótti.

Saltanatty sharaǵa Medeý aýdanynyń ákimi Jylqybaev Erjan,  jeltoqsanshylar, memlekettik qyzmetkerler jáne aýdan turǵyndary qatysty.

«Máslıhat depýtattary men qala ákiminiń qoldaýymen bizdiń aýdanda kóptegen jaqsy ózgerister boldy. Atap aıtsaq, aýdanymyzdyń joldaryn jóndeýge, saıabaqtardy kórkeıtýge 7-8 mln teńge baǵyttaldy. «Dýman» yqsham aýdanyndaǵy, Mendiqulov kóshesiniń  aldyndaǵy saıabaqtar men meshitterdiń aldy retke keltiriletin bolady. Odan bólek, Dostyq, Tóle bı, Áıteke bı kóshelerin jaryqtandyrý qolǵa alynady. Sonymen qatar, aldaǵy úsh jylda 57 jekemenshik balabaqsha ashylady dep kútilýde», - dedi Erjan Jylqybaev.

Konsertti «Jigitter» toby «Biz - Otannyń ulanymyz» atty ánimen ashty. Aıta keteıik, shara barysynda atalmysh toptyń múshesi Baǵlan Ábdiraıymov te Medeý aýdanynyń marapatyna ıe boldy.

«Barlyq merekelerdiń arasynda men úshin eń mańyzdy, eń súıiktisi - Táýelsizdik kúni. Mereke qarsanyńda qurmet gramotasyn alǵanyma óte qýanyshtymyn»,- dedi ánshi.