Almatyda jerasty týnelderin salý tıimdi. Bul týraly Almaty qalasy Sáýlet jáne qala qurylysy basqarma basshysynyń orynbasary Ahmedjanov Almasqan aıtty.

Basqarma basshysynyń orynbasary  Ahmedjanov Almasqan týnel salýdyń qymbat bolǵanmen, jol jóndeýge arnalǵan qarajattyń qysqarýyna sep bolatynyn basa aıtty.

«Bizdiń joba, bizdiń usynys - qalada keshendi týnelderdiń sqemasyn qurý. Týnel - qubyr jelisi men kabeldiń uzaq paıdalanýyna kepildik beredi. 2-3 jyl saıyn asfálttaýǵa kóp shyǵyn shyǵarmaı, kapıtaldyq joldardy jasaýǵa múmkindik ashady»,- dedi Almasqan Ahmedjanov.

Onyń aıtýynsha, bir týneldi salý úshin sol joldyń 5 jyldyq qarajaty ketýi múmkin.

«Biz ınjenerlik komýnıkasıalardyń qaıta salýyna kóp aqsha qurtamyz. Týneldi salǵan kezde joldyń astynan barlyq ınjenerlik toraptardy qyzyl syzyqtyn ar jaǵyna jiberý kerek. Jolmen qyzyl syzyqtyn arasy - 8 metr. Biraq bul jerde basqa problema bar. Jerasty sýlaryna baılanysty aǵashtar  jol boıynda 2 qatar otyrǵyzylǵan. Sondyqtan biz bir ret asfáltty ashyp, ol jaqqa týneldy salyp, torlardy basqa jerge qoıýdy usynýdamyz»,- dedi ol.

Almasqan Ahmedjanov týnelder jaıly ıdeıasyn qala ákimi Baýyrjan Baıbekke aıtqan. Qala ákimi onyń ıdeıasyn qoldap, júzege asyrý qajettigin eskertken. 

Ahmedjanovtyń  aıtýynsha, týnelderdiń ishinde vıdeokameralar ornatylsa, avtomatty túrde olardyń jaǵdaıyn baqylap otyrýǵa bolady.