«Slaván bazary» baıqaýynyń júldegeri, Memlekettik «Daryn» syılyǵynyń ıegeri, jas ánshi Ámireniń tanymaldylyǵy kúnnen kúnge artýda. Qamshy.kz aqparat agenttiginiń tilshisi jas ánshimen bolǵan suhbatty oqyrman nazaryna usynady.
— Ernar Sadyrbaevqa «Ámire» ataýy sáttilik ákeldi me?
— Azan shaqyryp qoıǵan esimim – Ernar. Atymdy anam qoıǵan. Ia, osy laqap atty qoıǵaly biraz ózgerister oryn aldy. Biraq jetistikke jetip jatsam, ol kóp jylǵy eńbektiń jemisi. Maǵan sáttilik ata-anam men ustazdarymnyń, qoldaýshylarym men prodúserimniń arqasynda keldi.
— «Ámire» laqap atyn usynǵan kim?
— Meni 2016 jyldyń qarasha aıynda «DAR RECORDS» mýzykalyq kompanıasy birlesip jumys jasaýǵa shaqyrdy. Sondaǵy basshylar maǵan sahnaǵa «Ámire» bolyp shyǵýǵa usynys bildirdi. Alǵashynda kelisýge qınaldym, óıtkeni bul esimdi jatyrqadym. Keıin maǵan basshylar bul esimniń mańyzdylyǵyn túsindirdi. Ámire Qashaýbaevtyń ómirbaıany men shyǵarmashylyǵyn tolyq zertteı kele bul esimde bir jaýapkershilik baryn túsindim. Ýaqyt óte kele úırenip, osy jaýapkershilikti alyp júretinime degen senimim kúsheıdi. Qazir meni kóbi Ámire dep ataıdy.
— Memlekettik «Daryn» syılyǵynyń ıegeri atandyńyz. Qandaı kúıdesiz?
— Ia, nebári 23 jasymda «Daryn» syılyǵyna ıe bolý da men úshin bir baqyt. Bul marapat maǵan alǵa qaraı umtylýǵa kúsh berdi. Keýdeme tósbelgi ǵana emes, úlken jaýapkershilik ilindi. «Daryn» tósbelgisine tek meniń ǵana emes, ata-anam men ustazdarymnyń, prodúserim men jaqyndarymnyń da sińirgen eńbegi zor. Sonyń ishinde ustazdarym Lakı Kesoglýǵa, Aleksandr Kalýgınge, prodúserim Jan Muqanovqa erekshe alǵys bildiremin. Tósbelgi taqqan qandaı baqyt dep baıaǵydan armandaýshy edim. Mine, 23 jasymda alǵashqy tósbelgimdi taqtym.
— Siz oryndaıtyn ánińizdiń mátinine mán beresiz be, álde áýenine me?
— Shyqqan týyndynyń jamany joq. Biraq men ózimniń ánimdi áli izdeýdemin. Buryn kóbine áýenge mán beretinmin. Qazir sózine de qaraımyn. Ánniń áýeni de, sózi de, tipti óńdeýi de jaqsy bolýy kerek. Baıaǵydaı emes, qazir ánniń mátinin árkimge jazdyra bermeımin. Maǵan qazaqsha retro ánderdi aıtqan unaıdy. Solardy óńdep, jańasha stılmen jaryqqa shyǵarǵym keledi.
— Bıyl ótken «Slaván bazary» baıqaýy sizdiń shyǵarmashylyǵyńyzǵa qandaı ózgeris ákeldi?
«Slaván bazary» meniń ómirimdi jaqsy jaǵynan ózgertti. Bári basqasha bola bastady. Jurttyń maǵan degen kózqarasy ózgerdi. «Slaván bazaryna» deıin de men sol Ámire edim, baıqaýdan keıin de sol Ámiremin. Biraq bári maǵan ózgeshe qaraı bastady. Oǵan deıin osyndaı deńgeıde elenbeýshi edim.
— Tyńdarman Dımash baǵyndyrǵan belesten sizdi de kórgisi keledi. Ol úshin baq kerek pe, bap kerek pe?
— Dımash – qazaq eline buıyrǵan baq. Elimizdiń atyn álemge tanytyp júr. Sol úshin alǵysym sheksiz. «Slaván bazaryna» daıyndalyp júrgenimde aqylyn aıtyp, jol kórsetti. Ol meniń ári dosym, ári baýyrym. Qytaıda júrse de «Juldyzdy jekpe-jek» baıqaýynda jeńilip qalǵanymda ózi habarlasyp, qoldaýyn aıamady. Keshe ǵana ótken «Topjarǵan» baıqaýynan keıin ekeýmiz Astanada jolyqtyq. Bul baıqaýdan ekinshi oryn aldym. Sol úshin Dımash maǵan «Ondaı baıqaýlarǵa qatyspa, sen álemdik sahnalarda án aıtýǵa laıyqsyń» dep keńesin aıtyp jatyr. Tyńdarmannyń Dımashpen salystyryp jatqany meni qýantady. Biraq Dımash jalǵyz. Ol – fenomen. Dımash salǵan dara jolmen men de aqyryndap kele jatyrmyn. Baýyrymnyń jetistigi maǵan da buıyrsyn. Men álemdik sahnada án aıtýǵa tolyqtaı daıynmyn.
Ámire, ónerińiz órleı bersin! Álemdik sahnada qazaq ánin sharyqtatyńyz!
Áńgimelesken Aqerke Ábilhan
