Almatyda Qazaqstan Respýblıkasynyń Táýelsizdik kúnine oraılastyrylǵan saltanatty jıyn ótti. Memleket basshysynyń Jarlyǵyna saı megapolıs ákimi Baýyrjan Baıbek elimizdiń damýyna aıtarlyqtaı úles qosqan almatylyqtarǵa memlekettik marapattardy tapsyrdy.

«Bizdiń Prezıdentimizben birge táýelsiz Qazaqstan óziniń Konstıtýsıasyn, memlekettik rámizderin, ulttyq valútasyn qabyldady, Eýrazıa júreginde jańa astanany qurdy. Astana – Nursultan Nazarbaevtyń erligi, elimizdiń tarıhyna altyn áriptermen máńgilikke jazylyp qalady. Almaty - táýelsizdigimizdiń altyn besigi. Memleket basshysynyń erekshe nazary men qoldaýy arqasynda qala ekonomıkasy turaqty ósýde. Eger táýelsizdiktiń bastaýynda elimizdiń İJÓ nebári 10%-dy qurasa, al qazir Almatynyń ózi eknomıkanyń besten bir bóligin qalyptastyrýda», - dep atap ótti óziniń quttyqtaý sózinde Baýyrjan Baıbek.

Ol qazirgi kezde megapolıstiń turaqty damý Maqsattaryna, OSER standarttaryna jáne úzdik álemdik praktıkaǵa júginetinin aıtty. Keshe ǵana qala máslıhatynda bekitilgen Almatynyń keler jylǵy búdjeti Memleket basshysynyń Joldaýyn jáne «Almaty-2020» baǵdarlamasyn júzege asyrýǵa negizdelgen. Iaǵnı, naqtyly búdjettiń 40%-y áleýmettik salany, 23%-y qoǵamdyq kólik, jol ınfraqurylymy jobalaryn, qala kóshelerin rekonstrýksıalaýdy qarjylandyrýǵa jumsalady.

Saltanatty jıyn barysynda Memleket basshysynyń Jarlyǵymen 110 almatylyqqa memlekettik marapattar tapsyryldy, olardyń arasynda bilim, mádenıet, densaýlyq saqtaý, bıznes pen ónerkásip salalarynyń ókilderi bar. Bulardan ózge, azamattyq qoǵamnyń, buqaralyq aqparat quraldarynyń ókilderi, sonymen qatar kólik, qurylys, energetıka jáne qarjy salasynyń mamandary joǵary marapattarǵa ıe boldy.