Almatyda Táýelsizdik kúnine oraı qalaǵa jańadan qosylǵan aýdandarda taǵy da birqatar jańa áleýmettik nysandar boı kóterdi. Qala ákimi Baýyrjan Baıbek jumys sapary kezinde Almatynyń Naýryzbaı aýdanyndaǵy jaqynda salynǵan №26 emhanany jáne Alataý aýdanyndaǵy №186 bala baqshadaǵy sapaly atqarylǵan jumystardy kórdi.

Qalanyń Densaýlyq saqtaý basqarmasynyń basshysy Qanat Tósekbaev óziniń sózinde 500 adam qatynaıtyn emhananyń sonaý 1939 jyly salynǵan eski selolyq aýrýhana ornyna salynǵanyn aıtty. Zamanýaı jabdyqtary bar medısınalyq mekeme Taýsamaly, Tastybulaq, Taýjoly, Qaraǵaıly, Quramys jáne Qarǵaly syndy eldi mekenderdiń 30 myńǵa jýyq turǵyndaryna qyzmet kórsetetin bolady.

«Almatyda densaýlyq saqtaý salasynyń ashyqtyǵy men sapasyn arttyrý úshin pármendi sharalar qabyldanady. Osyǵan oraı, qajetti Jol kartasy jasaldy. Qazirdiń ózinde sıfrlandyrý arqasynda syrqattarǵa qyzmet kórsetý ýaqytyn 20%-ǵa, kezek kútýdi 30%-ǵa qysqartýǵa, dárigerdi úıge shaqyrýdy 1,5 ese jedeldetýge qol jetti», - dep atap ótti ol.

Dál osy kúni Baýyrjan Baıbek «Saıaly» yqsham aýdanyndaǵy qazaqsha dáris beretin 320 oryndy №186 bala baqshada boldy. Mektep jasyna deıingi mekemede 16 top bar. Onyń árqaısysynda balanyń jasyna qaraı oqytýdyń ózindik ádisteri - Montessorı, Denesh bloktary, qum terapıasy jáne basqalary qoldanylady. Baldyrǵandardy qabyldaý 19 jeltoqsannan bastalady. Ótinishter «Open Almaty» qoǵamdyq qabyldaýy arqyly júrgiziledi.

Aıta keterligi, 10 jyl ishinde Alataý aýdanyn damytýǵa 430 mlrd. teńge jumsaldy, 30 myńnan astam jumys oryndary quryldy, 2,7 mln. kv.m.turǵyn úı salyndy, 12 mektep, dál osynshama medısınalyq mekemeler, 98 memlekettik jáne jeke bala baqshalar ashyldy.

Óz kezeginde sońǵy úsh jyl ishinde Naýryzbaı aýdanynda bes medısınalyq mekeme, eki memlekettik mektep, eki memlekettik jáne 65 jeke bala baqshalar salyndy. Aýdannyń ákimshilik-iskerlik ortalyǵy boı kóterdi, munda aýdandyq ákimdik, HQKO, AHAJ, prokýratýra, sot jáne basqalary ornalasqan.