Yshqynǵan jany shyǵyp aqıqattyń,

Daýysy jalǵandyqqa qarǵys attyń!

Ultymnyń kereń uly men emes em,

Keýdeńniń syrylyn da estip jattym.

Estidim,

Urandaǵan han Keneni,

Ysylyn sýyldaǵan sur jebeniń.

Ultymnyń hali múshkil,

Qansyraǵan

Qanjosa jarasyna ne sebemin?!

Dalada qobyz úni ańyraǵan,

Ulıdy,

Atameken qańyraǵan.

Dini jat,

Tili shubar,

Malǵa uqsap –

Dúbára urpaq týdy mańyraǵan.

Jer ketpek ustaǵannyń ýysynda,

Qazaqtyń bolmaǵan kún týmysynda –

Shetelde qalyp qoıyp jatyr jastar,

Eline endi qaıtyp jýysyn ba?

Áıteýir zaman týdy ıý-qıý,

Es ketip, arman boldy qulqyn tyıý...

Baıyp ap, qudaı bolam degenderge –

Qıamet boldy shirkin, esti jıý.

Buıyryp nesibemiz jatshylyqqa,

Kez boldyq jan tózgisiz tapshylyqqa.

Jerime qytaı qaptap qumyrsqadaı,

Aqyry aparmaıdy-aý jaqsylyqqa!

Kúnin de Táýelsizdik ataı almaı,

Jalanǵan jendetterge bata almaı –

Syǵalap buryshtardan qazaqtar júr,

Bataǵa pisken astan tata da almaı...

Qıamet boldy arýaqqa duǵa jasaý,

Qazaqqa mazaq bolǵan qaıdaǵy –

Asaý?!

Aldynda aıdaǵannyń kete bardy

Shulǵyǵan óz erki joq, qaıran bas-aý.

(Jan-jaǵynan qazaq ultyn qamalap,

Itter shyqty,

Jeltoqsanda abalap.

Adyram qaldy táýelsizdik degeni,

Polısaılar qazaqtardy sabalap...)

Umytqan Azattyqty qulsyńdar ma,

«Keled – dep, – ózdiginen» tursyńdar ma?!

Adyram qaldy mine, duǵalaryń

Buıyrmaı Jeltoqsandyq  qyrshyndarǵa!

Qýanysh MUQTAI

aqyn, qoǵam qaıratkeri