Aqtóbe oblysynyń ákimi Berdibek Saparbaev Qarǵaly aýdanyna jumys sapary kezinde qasaqana ot qoıýdan zardap shekken Qos Estek aýylynyń turǵyndarymen kezdesti.

Aýyldyqtarmen áńgimelesken ol jaǵdaıdyń birinshi kúnnen bastap-aq onyń jeke baqylaýynda ekenin atap ótti.

Óńir basshysy:

"Arnaıy top qurylyp, jumys jasap jatyr. Onyń quramyna prokýratýra, polısıa, jergilikti atqarýshy organdardyń ókilderi kirdi. Aýdan ákimdigi men demeýshiler barlyq zardap shekkenderge materıaldyq kómek kórsetti. Osyǵan kináli jandar Qazaqstannyń zańnamasyna sáıkes jazasyn alatyn bolady. Sondaı-aq, jekelegen polısıa qyzmetkerlerin jaýapkershilikke tartý máselesi qaralady",-dep sendirdi.

Kezdesýde bolǵan Aqtóbe oblysynyń Polısıa departamentiniń bastyǵy Mahambet Ábısatov atalmysh is boıynsha tórt kúdikti anyqtalǵandyǵyn baıandady. Árqaısysynyń tulǵararalyq qarym-qatynas pen materıaldyq paıda kórýdi kókseý sıaqty óz ýáji bolǵan. Tergeý amaldary jalǵasyp jatyr. Kezdesý sońynda aýyldyqtar kórsetilgen materıaldyq kómek pen qoldaý úshin alǵystaryn bildirdi.